Roma 16

Le'te mba ntag nzenze

1Tshù mfèt be ze mènnzwi, Fébé, z'a be ngafa' ntse'te benkristô mà Kenkréa là, me fà i bin; 2bin lo' i num Tshùaben ntùm mat z'a ku'ni ze ben nelàn nà, bin ywimt'é mba ntùm zit nu lo z'a tshùa i là, nummbe mba yi ywimte ben yàme, mba kua' tu wul àm.

3Bin #Mfa' Gha. 18.2tsha'te Prisila mba Akila shunfa' tshàm num Kristô Yésu; 4tshen ben nà lo fà tu wut yub num àm, a ke nda' me bèn nke ndabte yube. 5Bin tsha'te mba benkristô tse bo num ntse'te ndà Prisila mba Akila là. Bin tsha'te nshun nkôni àm Ebènètô z'a be mbwe mèn z'a kaṅ ntù i mfà Kristô ntùm ngô Asia là. 6Bin tsha'te Maria z'a fa' bin neshu là. 7Bin tsha'te Andrônikô mba Yunia, ba la' bag, shun tshàm ndàtsha, lén sob ju'ni netèt ghantum, bo lo bwôg be benkristô me. 8Bin tsha'te Ampliatô, nshun nkôni àm num Tshùaben. 9Bin tsha'te Urbanô, nshun fa' àm num Kristô, mba nshun nkôni àm Stakis. 10Bin tsha'te Apélés, mèn nenùn num Kristô. Bin tsha'te ba ndà Aristôbul. 11Bin tsha'te Hérodion, nzwit yag. Bin tsha'te ba ndà Narkisô tse bo be num Tshùaben nà. 12Bin tsha'te Trifène mba Trifôs tse bo be mfa' Tshùaben neshu là. Bin tsha'te Pèsida nshun ze tanjoṅ z'a fa' num Tshùaben yàm nà. 13Bin #Mark. 15.21tsha'te Rufô ze tanjoṅ num Tshùaben, mba màab z'a be mba yàm nà. 14Bin tsha'te Asinkri, Flègô, Hèrmès, Patrôpas, Hèrmas, mba njoṅ fètfèt fa tse bo à bo be là. 15Bin tsha'te Filôlôgô mba Yulia, Néréo mba mfèl i ze mènnzwi, Olimpas mba njoṅ ben nelàn fa tse bo à bo be là. 16Bin tsha'te wut tsin bin bin ntùm nenyô nge' ze nelàne. Njoṅ ntse'te benkristô fa tsha'te zine.

17Fèt tshàm, me le'te zine, bin zete num ben tse bo ke ma' fagte mba ywi' num netswite ze bin na' nzi'te là, bin kù yube. 18Nummbe lèn tshen ben nà ke' be fa' à Kristô Tshùaben be, là bo ke mfa' à num bam sube; bo num ntshùa num ntshob nedùmte mba mbwô ntshobe, mfùte ghabam njoṅ i fa. 19Nummbe zin neju' ntshu tam toṅ njoṅ benntùn fa; ndùlala me tsiaṅte num bin. Là, me kô ndù bin ghù zenu num numebwô, ndàn num nukebwô. 20Nsi fite nsi gho' Satan tun nku min ndende. Kondèn Tshùaben Yésu Kristô be njoṅ zin fa. Amén.

21Nshunfa' #Mfa' Gha. 16.1àm Timôtio tsha'te zine, mba Lukius, Yason mba Sôsipatèr nzwit yag. 22Me Tèrtius ze me kite yen ṅwa'ni li là tsha'te zin num Tshùaben. 23Gaius #Mfa' Gha. 19.29; 1 Korin. 1.14; 2 Tim. 4.20mèn z'a lo' àm ngùn i mba njoṅ ntse'te benkristô fa là tsha'te zine, Erasta ngalé' nkàb ngô tsha'te zine, mba mfèt be Kuartus. [ 24Kondèn Tshùaben be Yésu Kristô be njoṅ zin fa. Amén.]

25Ndùlala, me lem zin Nsi z'a ku'ni nefà tànntù bin njam nkùn mebwô àm mba Yésu Kristô ze me num ntshob là, njam netswite tsham s'a na' ndem fe tà mbwe, 26là ntum num miag benntùn ndonni ntùm ṅwa'ni ghatshob ntshob Nsi, mba Nsi z'a tswe yoṅ ntshù' tshob là, ndùlala ndù njoṅ ghakelèn Nsi fa lène, nju' ntshu Nsi ntùm bamntù. 27Ghamte be Nsi z'a be nzenu tù' i ngu'ngu' ntshùa njam Yésu Kristô là. Amén.

Currently Selected:

Roma 16: BMa

Highlight

Copy