Roma 14

Nefènte netèt fètfèle

1Bin #Kol. 2.16lo' mèn z'a bot ntùm bamntù là, ke soṅte nu num nkwatenu. 2Mo' mèn num mbam ndù a ku'ni nejù njoṅ i fa, là mèn z'a bot là fèt njab. 3Kà mèn z'a num njù là wag mèn z'a ke' be jù là; kà mèn z'a ke' be jù là tsho'te mèn z'a num njù là. Nummbe Nsi lo' i. 4Wù, o b'a we kà nke ntsho'te mènghua à? K'a tsin tù, k'a vù nsi, mba yen nà lôt'a tàfa' i. Là, a nsi tsin tù, nummbe Nsi b'a mèn neta num neghù a tsin tù. 5Mo' mèn be ndo' mo' lé'njù ntshùa mo'o, mo' mèn lo' njoṅ lé'njù fa be ndaṅndaṅ; a bwô mba we lo tshùb nkwatenu mi kua' mebwô. 6Mèn z'a num ngamte tsemo' lé'njù là, ke ngamte yub à num Tshùaben; mèn z'a num njù là, ke njù à num Tshùaben, nummbe a num nde'te Nsi, mèn z'a ke' be jù là, ke' be jù i à num Tshùaben, mba yi num nde'te Nsi. 7Sàm mèn netèt be ke ke njôg à num tu wul i, sàm mèn ke ke nkwù à num tu wul i. 8Nummbe, a be ze be yôg là, mba be yôg à num Tshùaben; a be ze be kwù là, mba be kwù à num Tshùaben. Ndùlala, ke be yôg, ke be kwù, mba be b'a ben Tshùaben. 9Nummbe Kristô kwù, mbèn njôge, ndùlala ndù a be Tshùaben fe ben mba ben tse bo be ntùn nà. 10Là #2 Korin. 5.10wù, numk'o nke ntsho'te mfèl o à? Nummbe njoṅ be fa nsi tsin mbwe diaṅ ntsha Nsi, 11nummbe #Es. 45.23bo kite ndù: Tshùaben tshob ndù: Me b'a ntùn, njoṅ ntunkekwi' fa nsi kwim mbwe àm, njoṅ ndém fa fà ghamte Nsi. 12Ndùlala, mba zit mèn no netèt be nsi soṅ ze nu mbwe Nsi be tu wul i.

13Ndùlala, kà bag à bin bèn netsho'te wut be, be be, là bin zete ndù kà bin yab nu fa'te ke ywi' lo mbwe mo' mfèle. 14Me lène, mbèn ndèn kua' mebwô num Tshùaben Yésu ndù sàm ju ke' be ze nesagte num i, là, a b'a nesagte num mèn z'a kwate ndù a sagte là. 15Nummbe, a be z'o tshùa num jujù ngù mfèl o nywin nà, mb'o ke' bèn nke nzin à ntùm nkôni. Kà ghù nu jujù ghù mèn ze Kristô kwù num i là bi. 16Ndùlala kà bin bam bo tshabte ju mebwô ze bin kwé là. 17Nummbe nufen Nsi ke b'a jujù mba ju nenu, a b'a nunetsine, fite mba tsiaṅte ntùm Ywèt Nelàne. 18Nummbe mèn z'a num mfa' Kristô ndùlala là, num mbwô Nsi, benntùn nke nyàmt'é.

19Ndùlala bag à bin ke ndiag à nu fite mba nu nekut yôg be, be be. 20Kà bagte fa' Nsi num nu jujù, njoṅ jujù fa b'a nelàne, là nukebwô num bwe, a be ze mèn z'a num njù njoṅ i fa tù' ywi' là. 21Mebwô b'a ndù k'o fèt mbàb, ke nu ndu', ke ghù sàm ju z'a ghù mfèl o fa'te là. 22Bamntù z'o ghù là, a bwô, a lôt'a wù bin Nsi. Mènfen b'a mèn z'a ke' be tsho'te wul i ntùm nu z'a lo' mba nunenùn nà. 23Là mèn z'a be magte, ngelaṅ z'a tshwèt njù jujù là, vù ntsha, nummbe yen nà ke fe à bamntù. Njoṅ tshu fa ts'a ke' fe à bamntù là, b'a nukebwô.

Currently Selected:

Roma 14: BMa

Highlight

Copy