Nesiaṅe 22
22
Tshô Balaam
1Bon ba Israél nèn nkut mbàn yub ntùm tômbo' Moab, yoṅ ntse Yordan, mbwe ngô Yériko.
2Balak, nshum Tsipor, yen njoṅ nu fa tse Israél na' nke ngù num ba Amor là, 3Moab bwôg mbwe tshen bwoṅ benntùn nà, bwôg tshùb i mbwe bon ba Israél. 4Moab tshob kamkam Madian ndù: Yen bwoṅ benntùn nà nsi mi njoṅ benntùn fa tse bo num ndiaṅ be mbum nà, be ndaṅndaṅ mba nyàmna' num mfèt nenàfi tshwèt là. Balak, nshum Tsipor na' mb'a mfen ba Moab num yen ngelaṅ nà. 5A #Nes. 31.8; 2 Pét. 2.15-16; Yu. 11tum benntùn ju Balaam, nshum Béor, ntùm ngô Pétor, kaṅntse ngô ze bo bwe i bwe là, ndù bo ntshob yi ndù: Bag ghù tsemo' benntùn nsen ni ndù bo tum à Egipto, bo lo' njù fa, tshù bo li tse bo yà tshùa kà ntsin mbwe àm nà. 6Me le't'o, nse'e, naṅ ndon tu tshen benntùn ni, nummbe bo ta ntshùa àm, mo' ndù, me ton yube, njoṅ yub me la', nummbe me lèn ndù, o num naṅ fite num mèn, mba fite nsi be yi, nenaṅ be ndon tu mèn, mb'o naṅ.
7Ba kamkam Moab mba tse Madian ket tshu, tse bo tsho fà ngatshob ntshob Nsi là. Bo zin kum ju Balaam, nsoṅ i njoṅ nu fa ze Balak tum yub bwe là. 8Balaam tshob bo ndù: Bin zi nsen ni yen tèttswe' li, me nsi bùnte nu bin ngelaṅ ze Tshùaben nsi tshob nu me là. Tshen kam nà zi ju Balaam. 9Nsi se' Balaam, ntshob yi ndù: A b'a ba we là la' o à? 10Balaam tshob Nsi ndù: Balak nshum Tsipor, mfen Moab bèn ntum yube, bo tshob me ndù: 11Tshù tsemo' benntùn ni tse bo tum Egipto là, ndù bo lo' ngô, se'e, naṅ ndon tu bo, num lén sàm, mo' ndù me ton yube, njoṅ yub me la'. 12Nsi tshob Balaam ndù: Kà nèn bin à bo. Kà naṅ ndon tu tshen benntùn nà, nummbe bo naṅ mbotni num i. 13Njù làn Balaam tsiaṅ kamkam Balak, ntshob bo ndù: Bin bèn la' bin nummbe Tshùaben ke' bam ndù bag bin nène. 14Tshen kamkam Moab là bèn njam ju Balak ntshob yi ndù: Balaam ke' kô ndù bag bo se'e. 15Balak bèn ntum tsemo', ndù bo yàm, mbèn nkuni, ntshùa tse mbwe. 16Bo zin nkum ju Balaam ntshob yi ndù: Tshù, Balak, nshum Tsipor tshob ndù: O ko ndèn mi, kà gha nese'e me la'! 17Me nsi fà tshu kam wù yàme. Me nsi ghù mba ke lo z'o bètte me là. Se' là naṅ ndon tu tshen benntùn ni me. 18Balaam bùnte tshe' Balak ndù: Balak fà be nkàb fa, mba tùn gol fa ts'a be ndà i là me, mba me ke nsi ghù sàm ju ze nke'e, ke ze ndùb lo, ze Tshùaben Nsi àm ke' kô là. 19Bin zi nsen ni, bag bin, num nebéb ju ze Tshùaben nsi tshob me là. 20Nsi se' Balaam tèttswe' ntshob yi ndù: A be ze tshen ben nà nse' tsiaṅ o là, o nèn bin à bo, là o nsi ghù à be ju ze me nsi tshob wù là.
Kekwèn Balaam
21Njù làn, Balaam ko' num kekwène, nèn boa kamkam Moab. 22Là Nsi ya ntù yi mb'a nèn nà, Angél Tshùaben tsin num manze, ntshèt manze yi ngelaṅ z'a ke nèn boa tshe' tse bàa tse bo ke nèn tshag i là, 23kekwèn yen Angél ndù a tsin num manze, ndù a tshùb ṅwi bu i, a kù num manze nèn tshwèt. Balaam lab kekwèn ndù a bèn num manze. 24Angél Tshùaben tsin num mo' manze ndù tô bwe, manze nke nèn ntùm nà ntù ndu', netèt bontsit sagba' bàa. 25Kekwèn yen Angél Tshùaben, nèn ntsin mbaṅ sagba', Balaam bèn nke ndab i. 26Angél Tshùaben tshùa ntsin num manze neféle, dù' ze be sàm mèn ke bémte ntshùa bu zwim ke bu kwéb lo là. 27Kekwèn yen Angél, nkôg wul i mfà nsi. Balaam ya ntù ndab i shua'a. 28Tshùaben ghù kekwèn tshob, ntshob Balaam ndù: Ju ze me ghù wù k'o nke ndab àm ntshu tat là b'a ke? 29Balaam tshob yi ndù: Nummbe o tshwèt nke ngù be mb'o kô là, ṅwi lo mbe bu àm mba me zwi o be ndonni. 30Kekwèn tshob Balaam ndù: Me ke' b'a kekwèn o z'o num nke nko' fe tà ndù ke lo ké? A b'a yàm mat nu neghù wù ndùlala ké? A tshob ndù: Nga!
31Tshùaben gha' miag Balaam, a yen mba Angél tsin num manze ndù a tshùb ṅwi bu i, mbag wul i nsi, ngwù nsi kabkab. 32Angél Tshùaben tshob yi ndù: Numk'o nke ndab kekwèn o yoṅ tat à? Yene, a b'a me bèn nse' netshèt manze wù, nummbe o tshwèt ndo' yen nezin ni mba metsit ju là. 33Kekwèn yen àm yoṅ tat nde'e mbaṅ àm. A lo nyà ke le' mbaṅ àm, mba me zwi o be dù' i, njôg mfaṅ i a yôg tse. 34Balaam tshob Angél Tshùaben ndù: Me ghù nukebwô nummbe me lo ke lèn ndù o bèn ntsin mbwe àm num manze àm. Ndonni, a be z'o yen ndù dù' ze me nèn nà ke' bwô o là, mba m'a' bèn tshàm njam. 35Là Angél Tshùaben tshob yi ndù: Nèn bin tshen benntùn nà, nda' ndù o nsi tshob à ju ze me nsi tshob wù là. Balaam nèn boa kamkam Balak.
Balaam bo Balak bumte
36Balak be ju' ndù Balaam tshwèt nse'e, nèn ndo' i Ir-Moab num dù' ze Arnon ghù ndùngô i là. 37Balak tshob yi ndù: Me ke' tum benntùn wù yàme ndù bo tsiaṅ o ké? Numke o ke se' à? Me ke' ku'ni neghù njoṅ nu nku'ni fa num o ké? 38Balaam bùnte Balak ndù: Ṅ, me se' ndonni njen o, me ku'ni netshob mba mit ntshob lo wù ké? Me nsi tshob ntshob mi Nsi fà ntshu àm ndù me tshob là. 39Balaam nèn boa Balak nkum Kiryat-Husot. 40Balak fà tshu nele'te tse ndùb mba tse nke'e, ntum ze ju Balaam mba ben ndùbndùb tse bo be njam i là.
41Njù làn, Balak lo' Balaam, bo yi ko' nèn Balaam-Baal dù' ze bo ke njen mo' bag benntùn bwe là.
Currently Selected:
Nesiaṅe 22: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
