Matio 9
9
Neyate kekale
(Mark. 2.1-12; Luk. 5.17-26)
1Yésu tsho ntùm kenu, ndut diaṅnkat ntse, nèn ntùm ngô i. 2Tshù, bo se' mo' kekat mbwe i ndù a nô num kunndà. Yésu be yen bamntù yub ntshob kekat ndù: Mén àm, fèn ntù, nukebwô tsho mi. 3Tshù, tsemo' ben netèt ghalèn ṅwa'ni Nsi tshob bo bo ndù: Yen mèn ni tshwèt ntshabte Nsi. 4Yésu lèn nkwatenu mube, ntshob ndù: Numke bin ngù men nkwate nukebwô là ntùm ntù tsin à? 5Netshob ndù nukebwô tsho mi, ke netshob ndù lo tù, nène, a mit ntshob netèt men ni ndù a fùag à? 6Là ndù bin lèn ndù Mén mèn ghù ngù' nelagte nukebwô ntùm yen njù li. Ndùlala a tshob kekat là ndù: Lo tù nket kun su, nèn la' o. 7A lo tù, nèn la' i. 8Bwoṅ benntùn be yen yen nu là, mbwôge, bo ghamte Nsi z'a fà lèn yen ngù' là benntùn nà.
Mba Yésu tsiaṅ Matio là
(Mat. 4.18-22; Mark. 2.13-17; Luk. 5.27-32)
9Yésu tum yen dù' là, mbe tshùa, njen mo' mèn bo ke ntsiaṅ i Matio là, ndù a tswe dù' nekwé fé', a tshob yi ndù: Bwe àm! A lo tù, mbwe i. 10Mb'a #Luk. 15.1-2na' mbe num téblé ntùm ndà là, ghakwéfé' mba ben kebwô yàm se', ntswe boa bo mba ghazi'te nu i num téblé. 11Ba Férésia be yen ntshob ghazi'te nu Yésu ndù: Numke ngatswite zin nke njù jujù boa ghakwéfé' mba ben kebwô à? 12Là, a be ju' ntshob ndù: A ke' b'a benntùn tse bo tswe mebwô là ke ndiag ngaghù fu, là nda' ben tse bo tswe kebwô là. 13Bin #Mat. 12.7; Os. 6.6nèn nzi'te tun men ntshob li ndù: Me kô à kondèn ke b'a ju nele'te Nsi. Nummbe me ke na' nse' netsiaṅ à ben netsine, là ben kebwô.
Netswe nziku'u
14Ghazi'te nu Yohané se' mbaṅ Yésu, ntshob ndù: Numke bag mba ba Férésia nke ntswe nziku'u, là ghazi'te nu o ke be tswe yub à? 15Yésu bùnte bo ndù: A be shun ndungon tswe ntùm ntsenyà ngelaṅ boa ndungon ke' l'a ndùke? Tsemo' lé'njù nsi be se' bo lo' ndungon netèt bo, a yen ngelaṅ nà ze bo nsi tswe nziku' là. 16Sàm mèn ke' be yab kam nzwe nswe num njwèn nzwe, nummbe kam nzwe a' tshùb ze njwèn, ntsho't'é, tô se bèn mbag neshu. 17Be bo ke ne mbèn naṅ ndu' nswe ntùm ntu' njwèn; a be ze bo ghù ndùlala là, mba ntu' a' tsit, ndu' fètte, bo bi ntu'. Là bo num naṅ ndu' nswe ntùm ntu' nswe, ngù njoṅ i bàa fa.
Ngon Yairô
(Mark. 5.21-43; Luk. 8.40-56; Yoha. 5.21,28)
18Yésu nke ntshobte, tshù, mo' ngalôte sinagogue se' ngwù nsi mbwe i, ntshob ndù: Ngon àm kwù, a ke' yoṅ ngubte, là se' njab bu o num i, a nsi yôge. 19Yésu lo nsi, ntam njam i boa ghazi'te nu i. 20Tshù, mo' mènnzwi z'a na' ngù ntsekebwô fe ngu'njù ntshob bàa gham nà, se' njamnjam, nkwag nzwe Yésu. 21Nummbe a lo ke ntshob ntù i ndù: A be ze me kwag mba nda' nzwe i là, mba m'a' yôg. 22Yésu kaṅ wul i njam, njen i ntshob yi ndù: Ngon àm, fèn ntù, bamntù o yôg o. Be num yen ngelaṅ nà yen mènnzwi là yôg. 23Yésu be kum ndà ngalôte sinagogue, njen ghatô ndô mba bwoṅ benntùn ntùm tshu'te vù, 24ntshob ndù: Bin tume, nummbe ménngon ke' kwù, là, a nezi. Bo zwi i. 25Ngelaṅ bo sô benntùn ntshag njù là, a tsho ndà, ntshùb bu ménngon, ménngon lo nsi. 26Tshô yen nu là sa ntùm yen bag ngô là.
Neyate nzenze
(Mark. 8.22-26; 10.46-52)
27Yésu tum yen dù' là, mbe tshùa, tsemo' mfùmiag bàa tam njam i, nke nkua' ntshob ndù: Mén David, ko ndèn mage! 28Ngelaṅ z'a tsho ndà là, ba mfùmiag se' mbwe i. Yésu tshob bo ndù: Bin bam ndù me ku'ni neghù yen nu là ké? Bo tshob ndù: Ṅ, me Tshùaben. 29A kwag miag mub ntshob ndù: A ghù num bin ndaṅndaṅ mba bamntù zin be là. 30Miag mub gha'. Yésu tshobte yub ntshob ndù: Bin bam nà neghù mèn lène. 31Là bo tum nèn nsa yen tshô là ntùm yen bag ngô là. 32A ke yoṅ ngubte mba tshen ben nà tum nà, tshù, bo se' mo' ketshob ze ywètkebwô ke ntô i là mbwe i. 33A ta' ywètkebwô, ketshob to' netshobe. Bwoṅ benntùn nyàmte, ntshob ndù: Nu z'a be ndaṅndaṅ mba yen ni là ke' yoṅ nto' tum ntùm ngô Israél. 34Là #Mat. 10.25; 12.24; Mark. 3.22; Luk. 11.15ba Férésia tshob ndù: A ke ndo' à mfen ba ywètkebwô, nta' ba ywètkebwô yi.
35Yésu #Mat. 4.23; Mark. 1.39; Luk. 4.44nke nzin ntùm njoṅ ngô fa mba ntaṅla'; nke ntswite ntùm ba sinagogue tshobe, nke ntshob nkùn mebwô nufen Nsi, nke njate njoṅ ngokèt fa mba njoṅ lo' nzenze fa. 36A #Nes. 27.17; 1 Fen. 22.17; 2 Kron. 18.16; Ez. 34.5; Mark. 6.34be yen bwoṅ benntùn, ndèn mub ko i, nummbe bo lo bole, njobe, mbe ndaṅndaṅ mba njùmbwe tse ngabéb yub ke' be là. 37Ndùlala #Luk. 10.2a tshob ghazi'te nu i ndù: Tshu netsho' yàm, là ghafa' b'a metsili. 38Bin bu' mbu Tàfa' ndù a tum tsemo' ghafa' ntùm dù' fa' se.
Currently Selected:
Matio 9: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.