Matio 28
28
Mba Yésu lo num vù là
(Mark. 16.1-7; Luk. 24.1-8; Yoha. 20.1,2)
1Sabbat lo tôge, a be nkebnjù mbwe lé'njù ntùm ngabnjù, Maria ze Magdala mba mo' Maria se' nelôte fi. 2Tshù, tsha' nyi'te kua' yàme, nummbe Angél Tshùaben lo swe' kamànyam, mbwoṅte loṅ, ntswe num bwe, 3nke ṅwa'ṅwa' mba lagnyam, nzwe i nke mfôg mba mbem nà. 4Yen nà ghù ghabéb fi bwôg, mvèle, ntù' mba ben nekwù là. 5Là Angél tshob men ntshob li bènnzwi ndù: Kà bin bwôg, nummbe me lèn ndù bin ke ndiag à Yésu ze bo kwimt'é num fanta'tù là. 6A ke b'a nsen ni, nummbe a bam num vù mb'a na' ntshob là. Bin se' njen dù' ze bo na' njab i là. 7Bin nèn ndende, ntshob ghazi'te nu i ndù a lo num vù; tshù, a' kwé mbwe bin mà Galiléa, a bwe là ze bin yen i là. A nu ze me ghù netshob bin nà.
8Bo lo mbaṅ fi, nèn ndende ntùm bwôg mba tsiaṅte ndùb, nkù nde nèn nsoṅ ghazi'te nu i yen tshô là. 9Tshù, Yésu bumte boa tshen bènnzwi là ntshob ndù: Me tsha'te zine! Bo se' mbaṅ i, ngwù nsi kabkab, ntshùb nku mi, ngamt'é. 10Yésu tshob bo ndù: Kà bin bwôg, bin nèn ntshob fèt tshàm ndù bo nèn Galiléa, a bwe là ze bo nsi yen àm nà. 11Ngelaṅ bo nèn nà, tshù, tsemo' ghabéb fi se' ntùm ngô, nsoṅ ghale'te Nsi tse ndùbndùb njoṅ nu fa ts'a tôg là. 12Bo kùmte, ngù ntse'te boa ghakwé mbwe, mfà nkàb yàm ba soyé, 13ntshob ndù: Bin ke ntshob: Ghazi'te nu i se' tèttswe' ngelaṅ bag ke nzi là, njé fe i. 14A be ze yen nu là nèn tà nkum toṅ ngomna là, mba bag a' fite ntù i, nsô zin ntùm nu. 15Bo kwé nkàb ngù be ndaṅndaṅ mba bo tswite bo là. Men ntshob là sa netèt ba Yuda tà nse' nkum sènni.
Mba Yésu tèt ghazi'te nu i mà Galiléa
(Mark. 16.12-20; Luk. 24.13-53; Yoha. 20.19-29; 21.1-24)
16Ghazi'te #Mat. 26.32; Mark. 14.28nu Yésu tse ntshob ntshù' gham nèn Galiléa num mbat dù' ze Yésu na' ntshob bo ndù bo nèn bwe là. 17Bo be yen i, ngwù nsi kabkab ngamt'é, là tsemo' nke magte. 18Là Yésu se' mbaṅ bo ntshob men ntshob li bo ndù: Nsi fà njoṅ ngù' fa me fe kamànyam mba num nsitsha'a. 19Ndùlala, #Mfa' Gha. 1.8bin nène, ngù njoṅ nzwit benntùn fa tù' ghazi'te nu àm, bin nyu' yub ntse num lén Tà mba Mén mba Ywèt Nelàne, 20bin tswite yub neze njoṅ tshu fa tse me na' ntshob bin nà. Tshù, bag à bin bèn ke be njoṅ lé'njù fa, tà kum miagte njù.
Currently Selected:
Matio 28: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.