Matio 24
24
Nesate Ndà Nsi. Miagte ngelaṅ
(Mark. 13.1-13; Luk. 21.5-19)
1Yésu tum Ndà Nsi, nke nène, ghazi'te nu i se' mbaṅ i, nda'te mba bo kut Ndà Nsi là yi. 2Yésu bùnte bo, ntshob ndù: Bin tshwèt njen tshen tshu là; kua' nenùne, me tshob bin ndù: Bo ke nsi faṅ loṅ nsen ni ke sate. 3Là ngelaṅ a tswe nsi num mbat ntene, ghazi'te nu i se' mbaṅ i tù' bo ntshob ndù: Soṅ yag ngelaṅ tshen tshu là nsi bumte là, mba lèn z'a nsi la'te ngelaṅ z'o nsi se' ntùm ghamt'o mba miagte njù là.
4Yésu bùnte ntshob bo ndù: Bin bam nà, kà mèn fùte zine, 5nummbe benntùn yàm nsi se' lo' lén sàm, tshob ndù: A b'a me bèn mbe Kristô, bo nsi fùte benntùn yàme. 6Bin nsi ju' nu ntsho mba tshu'te ntsho, bin bam nà, kà bin vètte; nummbe a bwô tshen tshu là se'e, là, a ke' yoṅ mb'a miagte nu. 7Nummbe mo' ngô nsi lo, ma' mo' ngô ntsho; mo' nufen nsi lo, ma' mo' nufen ntsho; nziku' nsi be, tsha' bèn nyi'te ntùm dù' nzenze. 8Njoṅ tshen nà fa b'a neto'te ya.
9Bo #Mat. 10.22nsi tshùb zin fà ntùm nge', zwi zine, njoṅ ngô fa nsi bàn zin num lén sàm. 10Benntùn yàm nsi vù ntùm ywi', bo nsi swèn wut tshob bo bo, bèn bàn bo bo. 11Ghatshob ntshob Nsi tatte yàm nsi lo, fùte benntùn yàme. 12A nsi tshùa mba nukebwô nsi ke yàm nèn mbwe là, nkôni benntùn bole. 13Là #Mat. 10.22mèn z'a nsi fènte tà nèn miagte là, mba yen mèn nà nsi yôge. 14Bo nsi tshob yen nkùn mebwô nufen Nsi là ntùm njoṅ njù fa, ndù a be ju nekwé nta njoṅ ngô fa kà miagte nu se'e.
15Ngelaṅ #Dan. 9.27; 11.31; 12.11bin nsi yen nebagte mba nesate tsin dù' z'a lo mbe ke bwô ndù a tsin bwe mba ngatshob ntshob Nsi Daniel na' ntshob là; wù z'o tshwèt nsiaṅ nà, ju' mebwô, 16a bwô ndù ben tse bo be Yudéa là kù nèn num mbale, 17mèn #Luk. 17.31z'a be mfe num tuba' là, k'a zwe' ntsho ndà i num nelo' ju z'a nèn yi là; 18mèn z'a be mà tshwèt là, k'a bèn njam num nelo' kummbaṅ se. 19Bènnzwi tse bo be jùm nà mba tse bo tshwèt nyô bon nà nsi b'a ntùm nge' num tshen lé'njù là! 20Bin le'te Nsi ndù kà zin nekù se' à ngelaṅ ndù sàne mba lé' Sabbat. 21Nummbe #Dan. 12.1; Apok. 7.14nge' ndùb nsi be, nge' ze mèn ke' yoṅ nto' yen lèn i fe ngelaṅ Nsi nabte njù tà nkum ndonni, mbe ndù lèn i ke nsi bèn be là. 22A be ze bo ke' sébte tshen lé'njù là là, mba sàm mènntùn ke nsi yôge. Là, a tshùa num ben ts'a tsho' yub là, nsébte tshen lé'njù là.
23Là, a be ze mèn tshob bin ndù: Tshù, Kristô b'a nsen ni, tshù, a b'a nsen nà là, kà bin bam. 24Tsemo' benntùn nsi lo, tatte tshob ndù bo b'a Kristô, tsemo' bèn ntshob ndù bo b'a ghatshob ntshob Nsi; bo nsi ghù nsà ndùbndùb mba nu netshàme, kà fùte mba ben tse Nsi tsho' yub là, a be ze bo ku'ni là. 25Tshù, me bwôgmbwe nsoṅ zin yen nu là.
26A #Luk. 17.23-24be ze bo tshob bin ndù: Tshù, a b'a kônkwa, kà bin nèn bwe. Tshù, a b'a ntùm to'ndà, kà bin bam. 27Ndaṅndaṅ mba beba'mbaṅ be ntum bag ntumnyam, nké' tà nèn nkum bag mbinyam nà, a b'a mba Mén mèn nsi se' ntùm ghamt'é là. 28Dù' #Luk. 17.37ze fe ju be bwe là, mba ghammàtat nsi bumte bwe. 29Là #Es. 13.10; 34.4; Ez. 32.7; Yo. 2.10; 3.4; 4.15; Apok. 6.12-13nge' tshen lé'njù là nsi yoṅ be mi, lagnyam sène, maṅwù ke bèn mfà nka' i, nsà mfe kamànyam nsi vùte nsi, neta mfe kamànyam bèn nyi'te. 30Yen #Dan. 7.13; Sak. 12.10-14; Apok. 1.7ngelaṅ nà, lèn z'a nsi la'te Mén mèn nà nsi tume, nké' mfe kamànyam; njoṅ nzwit benntùn fa nsi lab ntù yub mbu, yen Mén mèn se' num ndot kamànyam boa neta mba nkuni yàme. 31A nsi tum ba Angél tse boa tshu'te nta ndùb, bo nsi tse'te ben ts'a tsho' yub là, num bag njù kuà, fe num mo' tôg kamànyam nèn nkum mo' tôg i.
32Bin zi'te yen nu li, ndo' mfi' num nga'lone; ngelaṅ nkaṅ mi tshwèt mfite, mfu mi tum nà, bin num ndèn ndù dum ghebte. 33Be ndaṅndaṅ, mba bin zin, ngelaṅ bin nsi yen njoṅ tshen tshu là fa là, bin lèn ndù a ghebte nzendà. 34Kua' nenùne, me tshob bin ndù: Yen zwiaṅ benntùn ni ke nsi tôge, ke be ndù njoṅ tshen tshu là fa se'e. 35Kamànyam mba tsha' nsi tôge, là ntshob màm ke nsi tôge.
36Mbe se' mba sen lé'njù là ke nyam lo, sàm mèn ke' lèn, mba ba Angél mfe kamànyam, mba Mén mèn, là nda' Tàa tù' i. 37Ndaṅndaṅ #Net. 6.5-8mb'a na' mbe num tse lé'njù Noa là, a nsi bèn be be ndaṅndaṅ ngelaṅ Mén mèn se' ntùm ghamt'é là. 38Ntùm tshen lé'njù là ts'a be kà tse dibambaṅ nse' là, benntùn lo ke njù, nu, nso bènnzwi, mfà ngonngon tshob ntùm nandà tà nèn nkum lé'njù se Noa tsho ntùm kenu là; 39bo #Net. 7.6-24lo ke ju' sàm nu tà nèn nkum lé' se dibambaṅ se' nket njoṅ yub fa là: A nsi be be ndaṅndaṅ ngelaṅ Mén mèn se' ntùm ghamt'é là. 40Ben bàa nsi be mà tshwèt, bo lo' mo', mfaṅ mo'. 41Bènnzwi bàa nsi ke gho' bàn, bo lo' mo', mfaṅ mo'. 42Ndùlala bin zi tshùalo, nummbe bin ke' lèn lé'njù se Tshùaben se' là. 43Bin #Luk. 12.39-40lèn yen nu li ndù: A be ze tàndà lèn nyam ze tshô nsi se' yi tèttswe' là, mb'a' zi tshùalo ke faṅ ndù bo to ndà i. 44A ndùlala, mba bin zin, bin be tswe, nke mbébe, nummbe Mén mèn nsi se' à num nyam ze bin ke' kwate ndù a' se' là.
45A zit ngafa' ze nenùne, mbèn mbe ngazete ze be tàfa' faṅ ba ndà i yi ndù a ke mfà jujù bo ngelaṅ i à? 46Ngafen b'a yen ngafa' là ze tàfa' nsi be bèn njam tèl i, a ke ngù ndùlala là. 47Kua' nenùne, me tshob bin ndù mb'a' faṅ njoṅ tshu tse fa yi, a nke ndé'é. 48Là, a be yen ngafa' ze kebwô li tshob ntù i ndù: Tàa nsi sène, 49nto' nelab tsemo' ghafa', njù, nu, boa ghabum ndu', 50tàfa' se' mum lé' s'a lo mbe ke ke mbéb là, mba num nyam z'a ke' lèn nà, 51mfagt'é, njab ze bag i boa ghamfùm. Nekua' mba nefèt nsô nsi be yen dù' là.
Currently Selected:
Matio 24: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.