Matio 22
22
Tànkùt num nandà
(Luk. 14.15-24)
1Yésu bèn nto' netshob nu bo tànkùt, ntshob ndù: 2Nufen kamànyam fut'a mo' mfen z'a na' nabte nandà mén i là. 3A tum tshe' tse ndù bo nèn ntsiaṅ ben ts'a na' ntsiaṅ yub num nandà là, là bo ke kô nese'e.
4A bèn ntum tsemo' tshe' tse, ntshob ndù: Bin tshob ben tse me na' ntsiaṅ yub là ndù: Tshù, m'a na jujù, nzwite ba mfô mba ba nyàm tse bo ghù zit là, njoṅ tshu fa ku'u, bin se' num nandà. 5Là bo wag yen nu là, nèn tshobe; mo' nèn ntùm nà i, mo' nèn ntàn mi; 6tsemo' ghom tshe'mfen nà, ngùtni yube, nzwi yube. 7Là mfen ya ntù, ntum soyé tse ndù bo nèn nzwite tshen ben nà, mbèn nton ngô yube. 8A bèn ntshob tshe' tse ndù: Jujù nandà ku'u, là ben tse me na' ntsiaṅ yub là lo ke ku'ni. 9Ndùlala bin nèn ba mfagte manze, ntsiaṅ njoṅ ben fa tse bin fon nà num nandà. 10Tshen tshe'mfen nà tum nèn num ba manze, ntse'te njoṅ benntùn fa tse bo fon nà, ben kebwô mba ben mebwô kà ndà nandà dun.
11Mfen tsho ndà nelôte ben tse bo tswe téblé là, njen mo' mèn bwe ndù a ke' ma' nzwe nandà, a tshob yi ndù: 12Nshun àm, o tsho nsen ni à ndùke, ke be ndù o ghù nzwe nandà à? A tswe ntshu mi'i. 13Mfen #Mat. 8.12; 25.30; Luk. 13.28tshob ghafa' ndù: Bin kut nku mi mba mbu mi, ma' i njù ntùm dù' njame. Nekua' mba nefèt nsô nsi be yen dù' là. 14Nummbe ben tse bo tsiaṅ yub là b'a yàme; là tse bo tsho' yub là b'a metsili.
Nsi mba Kàsà
(Mark. 12.13-17; Luk. 20.20-26)
15Ba Férésia tum, nèn ngù ntse'te ndù bo lo' ta' ntshob mbùn i yi, 16bo tum ghazi'te nu yub boa ben Hèrodé mbaṅ i, bo tshob ndù: Ngatswite, bag lèn ndù o b'a ngatshob nenùne, nummbe o ke' be lôte se benntùn. 17Ndùlala, tshob mb'o kwate là bag. Ntshù' bam ndù mèn fà ntshub Kàsà ké, ke nga à? 18Là Yésu lèn nukebwô yub ntshob ndù: Ghamfùm, bin laṅt'àm numke? 19Bin lo' lèn nkàb ntshub ntswite me. Bo lo' ta' denario mfà yi. 20A tshob bo ndù: A tu we li num bwe à, lén we li num bwe à? 21Bo tshob ndù: A b'a ze Kàsà. A tshob bo ndù: Ndùlala, tshu Kàsà bin fà Kàsà; tshu Nsi, bin fà Nsi. 22Bo be ju' men ntshob li, ntshàm neshu, mfaṅ i nène.
Nebam num vù
(Mark. 12.18-27; Luk. 20.27-40)
23Be #Mfa' Gha. 23.8num sen lé'njù là, ba Sadukai tse bo ke ntshob ndù nelo num vù ke' be là, se' mbaṅ i, mbètt'é nu, ntshob ndù: 24Ngatswite, #Neb. 25.5Mosé lo tshob ndù: A be ze mèn kwù ke bwe bon nà, mba mfèl i nsi so mfôge, mbwe bon ngù nzwit mfèl i yi. 25Tsemo' fèt sammbàa lo be netèt bag, mbwe i z'a ghù mènnzwi là kwù ke ghù nzwit, mfaṅ nzwi i mfèl i. 26Be ndaṅndaṅ num mbatte bàa, mbatte tat tà nèn nkum num njoṅ yub ntu sammbàa fa; 27bo kwù, mènnzwi bèn nkwù ze. 28Ndùlala, ngelaṅ ze nelo num vù nsi ku' là, mènnzwi nsi b'a ze we netèt ben sammbàa, mba njoṅ yub fa so i l'à?
29Là Yésu bùnte, ntshob bo ndù: Bin fàn manze, bin ke' lèn ju ze bo na' nkite là mba neta Nsi. 30Nummbe ntùm nelo num vù, benntùn ke so mènnzwi ke bèn mfà ngonngon tshob ntùm nandà, là bo nsi be à mba ba Angél mfe kamànyam nà. 31Mbe se' mba nelo ben tse bo na' nkwù là num vù là, bin ke' yoṅ nsiaṅ men ntshob li Nsi na' ntshob bin ndù: 32Me #Netu. 3.6b'a Nsi Abraham, mba Nsi Isak, mba Nsi Yakob; a ke' b'a Nsi fe ben, là, a b'a Nsi ben bo be ntùn nà. 33Bwoṅ benntùn be ju'u, ngamte nu z'a tswite là neshu.
Ntshù' Nsi mi ndùb
(Mark. 12.28-34; Luk. 10.25-37)
34Là ba Férésia be ju' ndù Yésu ghù ba Sadukai tswe ntshu mi'i, mbèn ntse'te, 35mo' #Luk. 10.25-28ngalèn ntshù' Nsi netèt bo laṅte Yésu mbètt'é ndù: 36Ngatswite, a mit ntshù' bèn mbe mi ndùb ntùm ntshù' Nsi à? 37A #Neb. 6.5tshob yi ndù: Ke nkô Tàan Nsi o, njoṅ ntù o fa, njoṅ zwiag so fa, mba njoṅ nkwatenu mu fa. 38Yen ni b'a ntshù' ze ndùb, mbèn mbe mbwe i. 39Mbatte #Lev. 19.18bàa fut'é: O nsi ke kô mèn z'a ghebte mbaṅ o là mba yu tu wut là. 40Njoṅ ntshù' Nsi fa mba ghatshob ntshob Nsi b'a ntùm men ntshù' mbàa là.
Kristô mén David
(Mark. 12.35-37; Luk. 20.41-44)
41Yésu bètte ba Férésia tse bo tse'te là, ntshob ndù: 42Bin kwate ndùke num Kristô à? A b'a mén we? Bo tshob yi ndù mén David. 43A tshob bo ndù: Kà David na' ntshùa njam Ywèt nke ntsiaṅ i Tshùaben à ndùke, ntshob ndù:
44Tshùaben #Yobk. 110.1tshob Tshùaben àm ndù:
Tswe num bag bu àm ze zwim,
tà nkum ngelaṅ me nsi ma' ghakeban tsho nsi
tun nku mu là.
45Mba David tsiaṅ i Tshùaben nà, be a bèn mbe mén i à ndùke? 46Sàm mèn ke ku'ni nebùnte ta' ntshob yi mba ntshù'; fe num sen lé'njù là, sàm mèn ke bèn mfèn ntù nebètt'é nu.
Currently Selected:
Matio 22: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.