Matio 18
18
Mèn ndùb ntùm nufen Nsi. Nu nebe ywi'
(Mark. 9.33-37; Luk. 9.46-48; 22.24-27)
1Be #Luk. 22.24num yen ngelaṅ nà, ghazi'te nu Yésu se' mbaṅ i, ntshob ndù: Kà we z'a be mèn ndùb ntshùa tsemo' ntùm nufen kamànyam à? 2A tsiaṅ metsit ménfi mbaṅ i, nte i netèt bo, 3ntshob #Mark. 10.15; Luk. 18.17ndù: Kua' nenùne, me tshob bin ndù: A be ze bin ke' kaṅ ntù tsine, ke bèn ntù' mba bontsit bônke' là, mba bin ke nsi tsho ntùm nufen kamànyam. 4Mèn z'a nsi lo' wul i, nèn yi nsi mbwe yen metsit ménfi li là, mb'a b'a mèn ndùb ntshùa tsemo' ntùm nufen kamànyam. 5Mèn z'a nsi lo' mo' metsit ménfi mba yen ni num lén sàm nà, mba ng'é lo' à me.
6Mèn z'a nsi ghù mo' metsit mén netèt tshen ni tse bo num mbam àm nà vù ntùm ywi' là, mb'a bwô ndù bo taṅ loṅ bàn tô i, ma' i ntùm lamntse. 7Nge' num tu njù num nu nefa'te. Ṅ, a yôg mbwô ndù nu nefa'te se'e, là nge' tu mèn ze nu nefa'te tshùa num i kà se' là. 8A #Mat. 5.30be ze bu o ke ku o lo ghù ndù o vù ntùm ywi' là, o keb i, ngua' i ngùanesà mbaṅ o; a bwô wù netsho ntùm yôg bu ntshù' ke ku ntshù' lo, ntshùa mb'a be o ghù mbu mbàa mbàa nku mbàa, bo ma' o ntùm mbwôg z'a tswe matmat là. 9A #Mat. 5.29be ze lag so ghù ndù o vù ntùm ywi' là, o tsho' i, ngua' i ngùanesà mbaṅ o; a bwô wù netsho ntùm yôg lag ntshù', ntshùa mb'a be o ghù miag mbàa, bo ma' o ntùm mbwôg là.
10Bin bam nà newag mo' metsit mén netèt tshen ni. Nummbe me tshob bin ndù ba Angél tshob mfe kamànyam num ndôte se Tàa mfe kamànyam njoṅ ngelaṅ fa. [ 11Nummbe #Luk. 19.10Mén mèn se' neyôg à z'a na' mbi là.] 12Bin kwate ndùke? A be ze mo' mèn ghù njùmbwe nkù, mo' ta' i netèt tshen ni bi là, mb'a ke faṅ tse ntshob bwe'e ṅam bwe'e num mbale, nèn nediag z'a bi là ké? 13A be z'a diag i kà mfon i là, mba me tshob bin kua' nenùn ndù mb'a' tsiaṅte num i ntshùa tse ntshob bwe'e ṅam bwe'e tse bo ke' bi là. 14Be ndaṅndaṅ, Tà zin mfe kamànyam ke' kô ndù mo' metsit mén netèt tshen ni bi.
Nelagte nukebwô. Tshe' mfen nga ke ko ndèn
15A #Luk. 17.3be ze mfèl o ghù nukebwô wù là, o nèn ntèl i, nsoṅ i nu z'a ghù wù là, ntswe bin yi ntu bàa, ntshobt'é; a be z'a ju' o là, mb'o yôg mfèl o. 16A #Neb. 19.15be z'a ke' ju' o là, o lo' ta' mèn ke ben bàa lo, bin à bo nèn ntèl i ndù njoṅ ntsha fa mi num ntshu ghakwénta bàa ke tat lo. 17A be z'a ke' ju' tshen ben ni là, o tshob ntse'te ben Kristô; a be z'a ke' ju' mba ntse'te ben Kristô là, o lo' i mba ngakelèn Nsi mba ngakwéfé' là. 18Kua' #Mat. 16.19; Yoha. 20.23nenùne, me tshob bin ndù njoṅ tshu fa tse bin nsi kut num nsitsha' là, bo nsi bèn kut kamànyam; njoṅ tshu fa tse bin nsi kiagte num nsitsha' là, bo nsi bèn kiagte kamànyam.
19Me bèn ntshob bin kua' nenùn ndù: A be ze benntùn bàa netèt bin num nsitsha' tamte ntshu ntshù' num mba zit nu lo, a be ze bo bètte là, mba Tàa mfe kamànyam nsi fà bo. 20Nummbe mba yà lo ze ben bàa ke tat lo tse'te num lén sàm nà, me num netèt bo.
21Pétro #Luk. 17.3-4se' mbaṅ i, ntshob yi ndù: Tshùaben, mfèl àm ghù nukebwô me yoṅ si' mba m'a' ke ndagte yi à? Tà nkum yoṅ sammbàa ké? 22Yésu tshob yi ndù: Me ke' tshob wù ndù: Tà nkum yoṅ sammbàa, là tà nkum yoṅ ṅam sammbàa yoṅ sammbàa.
23A ndùlala nufen kamànyam fut'a mo' mfen z'a na' nke ndiag nesiaṅte tshu tse boa tshe' tse ts'a na' ndem tshu bo là. 24Ngelaṅ a to' nesiaṅte là, bo lo' mo' nganjo z'a ke mbètt'é talaṅto ntsha' gham nà nse' yi mbwe i. 25Là mba yen mèn ni na' mbe ke ghù ju netô ze njo yi là, tshùaben tshob ndù bo swèn i, nzwi i mba njoṅ tshu fa ts'a ghù là, ndo' ntô ze njo yi. 26Tshe' i là vù nsi kabkab, mbu' mbu mfen, ntshob ndù: A bwô ndù o fènte, me nsi tô njoṅ yàm njo fa wù. 27Tshùaben ko ndèn tshe' i, nkag i, mbèn mfaṅ njo yi.
28Ngelaṅ ze yen tshe'mfen ni tum nà, a bumte bo mo' tshe'mfen z'a ghù njo i yi denario nkù là, ntshùb i ntôntô, ntshob ndù: Tô njo ze me tshwèt mbètt'o là. 29Yen tshe'mfen nà vù nsi mbwe i, mbu' mbu yi, ntshob ndù: A bwô ndù o fènte, me nsi tô yàm njo wù. 30A ke bam, là, a nèn ma' i ndàtsha tà nkum ngelaṅ z'a tô ze njo yi là. 31Tsemo' tshe'mfen be yen nu z'a tôg là, nywin kua' neshu, nèn ntshob njoṅ nu fa ts'a tôg là tshùaben yub. 32Ndùlala tshùaben tsiaṅ i mbaṅ i, ntshob yi ndù: Tshe'mfen kebwô, me lo faṅ njoṅ yu njo fa wù, nummbe o lo bu' mbu me. 33O lo ke ku'ni neko ndèn mfèl o, mba me ko ndèn mu là ké? 34Tshùaben i ya ntù, mfà i ghabéb ndàtsha tà nkum ngelaṅ z'a nsi tô njoṅ ze njo fa là. 35Mba Tàa mfe kamànyam nsi ghù num bin be ndaṅndaṅ, a be ze mba we lo netèt bin ke' be lagte nukebwô mfèl i ngô ntù i fa là.
Currently Selected:
Matio 18: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.