Matio 15
15
Num nesôg mbu kà njù jujù
(Mark. 7.1-13; Luk. 11.37-41)
1Tsemo' ba Férésia mba ghalèn ṅwa'ni Nsi fe Yérusalém, nse' mbaṅ Yésu, ntshob ndù: 2Numke ghazi'te nu o nke mbagte nu ba mbwe na' ntshob l'à? Nummbe bo ke' be sôg mbu kà njù jujù. 3Là, a bùnte, ntshob ndù: Numke mba bin zin nke mbagte ntshù' Nsi num nu bin tshob l'à? 4Nummbe #Netu. 20.12; 21.17; Neb. 5.16; Lev. 20.9Nsi lo tshob ndù: Ku'ni tàan mba màan, mba ndù: Mén z'a tshabte tàab mba màab là, mba bo a' tsho'te ntsha, nzwi i. 5Là bin, bin num ntshob ndù: Mèn z'a tshob tàab mba màab ndù: Me ku'ni neywimt'o, là yen neywimte là b'a ju neghamte Nsi yi, 6ndùlala mb'a ke bèn neku'ni tàab mba màab. Bin biagte ntshob Nsi ntshùa num nu ze bin tshob là. 7Ghamfùm, Esaya lo tshob ntshob Nsi kua' mebwô mfà num bin, ntshob ndù:
8Yen #Es. 29.13nzwit mènntùn ni ke ngamt'àm à nkub ntshu,
là ntù tshob be tà ngùanesà mbaṅ àm.
9Bo ke ngamt'àm à banban,
nummbe bo ke ntswit'a tshu ts'a b'a
nda' ntag benntùn nyiaṅtu là benntùn.
10A tsiaṅ bwoṅ benntùn mbaṅ i, ntshob bo ndù: Bin kù' ntoṅ, nju'u! 11A ke b'a ju z'a num ntsho ntshu mèn nà ke nsagt'é, là ju z'a num ntum ntshu mèn nà, a yen nà bèn nke nsagt'é. 12Ghazi'te nu i se' mbaṅ i, ntshob yi ndù: O lèn ndù ba Férésia lo mbe ju' men ntshob là, mfa'te bwe à? 13Là, a bùnte ntshob ndù: Njoṅ ntù fa mi Tàa mfe kamànyam ke bèn njwit là, bo nsi tsho'o. 14Bin #Luk. 6.39faṅ yub là; bo b'a ba mfùmiag, ghatshagte ba mfùmiag. Là, a be ze mfùmiag tshagte mo' mfùmiag là, mba ntu tshob bàa fa nsi vù ntùm tàme. 15Pétro bùnte, ntshob yi ndù: Bagte tun yen tànkùt là bag. 16Là, a tshob ndù: Mba bin zin ke' ke ghù zenu ké? 17Bin ke' lèn ndù ju z'a num ntsho ntshu mèn nà, num nèn ntùm bam se, bo bèn ngua' i ntùm kot ké1 18Là #Mat. 12.34tshu ts'a num ntum ntshu mèn nà ke mfe à ntùm ntù i, a tshen ni bèn nke nsagte mèn. 19Nummbe nkwate nukebwô ke ntum à ntùm ntù benntùn, nezwi mèn, neghù màndà, nekale, tshô, nekwé nta tatte mba tshabte. 20A tshen ni nke nsagte mèn, là nejù ju mbu ke sôg ke' be sagte mèn.
Mba Yésu yate mén ngon Sirôfènikia là
(Mark. 7.24-30)
21Yésu tum yen dù' là, nèn ntùm bag ngô Tiro mba Sidon. 22Tshù, mo' nzwi Kanaan tum yen bag ngô là, nkua' neta, ntshob ndù: Tshùaben mén David, ko ndèn màm, mo' ywètkebwô tshwèt ntô ngon àm kua' kebwô. 23Là, a ke bùnte sàm nu yi. Ghazi'te nu i se' mbaṅ i, mbu' mbu yi, ntshob ndù: Lé't'é nummbe a tshwèt nkua' njam be. 24Là, a bùnte ntshob ndù: Bo tum àm à nda' num njùmbwe tunndà Israél ts'a bi là. 25Là mènnzwi là se', ngwù nsi mbwe i, ntshob ndù: Tshùaben, ywimt'àm. 26Là, a bùnte ntshob ndù: A ke' bwô ndù bo lo' bàn bônke', ma' bon mbù. 27Là, a tshob ndù: Ṅ me Tshùaben, nummbe mba bon mbù num njù mbe'te bàn mi a tum num téblé tà tshob ngwù nsi là. 28Yésu bùnte ntshob yi ndù: Mènnzwi, bamntù o b'a ze ndùb. A ghù num o mb'o kô là. Fe num yen ngelaṅ nà, ngon i yate.
Mba Yésu bèn nkém benntùn ntsha' kuà là
(Mat. 14.15-21; Mark. 7.31-37; 8.1-10)
29Yésu tum yen dù' là, nèn kaṅ dibantse Galiléa, nko' num mbale, ntswe bwe. 30Bwoṅ benntùn yàm se' mbaṅ i ndù bo lo' ba kekat, ba mfùmiag, ba ketshob mba tsemo' ghangokèt yàme, njab mbaṅ nku mi. 31A yate yube, kà bwoṅ benntùn be yen mba ba ketshob tshwèt ntshobe, ba nke'kèt tswe mebwô, ba kekat nke nzine, ba mfùmiag nke njen nze là, nyàmte; bo fà ghamte Nsi Israél.
32Yésu tsiaṅ ghazi'te nu i mbaṅ i, ntshob ndù: Ndèn bwoṅ benntùn ni ko àm, nummbe be tswe bo à bo lé'njù tat, bo ke ghù ju nejù. Me ke' kô nelé'te yub bo nèn nziku'u, mbwôg ndù kà neta bwoṅ bo manze. 33Ghazi'te nu i tshob yi ndù: Be be lo' bàn à yà k'a ku'ni nekém yen njoṅ bwoṅ benntùn ni yi, bo ywèt, num kônkwa à? 34Yésu tshob bo ndù: Ntu' bàn num bin si'i? Bo tshob yi ndù: Sammbàa mba bon ndô ngontse. 35A ghù bwoṅ benntùn tswe nsi num tsha'a. 36A lo' men ntu' bàn sammbàa là mba tshen ngontse là, nde'te Nsi, mbe'te, nke mfà ghazi'te nu i, ghazi'te nu i nke mfà bwoṅ benntùn. 37Njoṅ yub fa jù, njwèle, ntse'te mbe'te mi mi a tù' là, a dun nta' sammbàa. 38Ben tse bo na' njù là na' mb'a bandum ntsha' kuà, ke kwa bènnzwi mba bônke'. 39A be miagte nelé'te bwoṅ benntùn, ntsho ntùm kenu nèn nkum bag ngô Magadan.
Currently Selected:
Matio 15: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.