Matio 13
13
Tànkùt num nufen kamànyam
(Mark. 4.1-9; Luk. 8.4-8)
1Ntùm sen lé'njù là, Yésu tum ndà, ntswe kaṅ dibantse. 2Bwoṅ #Luk. 5.1-3benntùn yàm se' ntèl i, ndùlala a tsho ntùm kenu, ntswe bwe, njoṅ benntùn fa tsin kaṅ ntse.
3A lo' tànkùt, ntshob nu yi bo yàm ntshob ndù: Tshù, ngama'nsa lo tum nke nèn nema' nsa. 4Ngelaṅ z'a ke ma' là, mo' bag i vù nkaṅ manze, bon nsaṅ se' mfèle. 5Mo' bag i vù ntùm dù' ndoṅ, dù' tsha' na' mbe ke yàm bwe là, mbit ndende, nummbe tsha' lo ke tsho. 6Là nyam yoṅ mbe tume, a lab, njume, nummbe nga tse lo ke be bwe. 7Mo' bag i vù ntùm dù' ngumndot, ngumndot ko' bo yi, mfam i. 8Là mo' bag i vù ntùm dù' tsha' mebwô, njam tsha tse, mo' miag nkù, mo' ṅam ntôge, mo' ṅam ntat. 9Mèn z'a ghù ntoṅ nà, a ju'.
10Ghazi'te nu i se' mbaṅ i, ntshob yi ndù: Numk'o ntshob bo ntùm tànkùt à? 11A bùnte, ntshob ndù: A bin nà ze bo fà tsham nufen kamànyam bin nà, là bo ke' fà tsemo' ben. 12Nummbe #Mat. 25.29; Mark. 4.25; Luk. 8.18; 19.26mèn z'a ghù ju là, mba bo a' fà mo' yi, a ghù yàme; là mèn z'a ke' ghù là, mba bo a' kwé mba z'a ghù là. 13A ndùlala bèn ngù kà me ntshob bo ntùm tànkùt, nummbe bo num njene, ke yen, nju'u, ke tshùb ju bo ju' là. 14Num #Es. 6.9-10bo, ntshob Esaya bumte, mi a tshob ndù: Bin a' ghù nju' ntoṅ mine, ke tshùb ju bin ju' là; nke ndôte yàme, ke yen. 15Ntù yen ngô li sege, a fùn ntoṅ mi, a mem miag mi, mbwôg ndù k'a yen miag mi, ke bèn nju' ntoṅ mi, mbwôg ndù k'a ju' ntù i ke bèn nkaṅ ntù i ndù me yat'é.
16Ghafen #Luk. 10.23-24b'a miag mine, nummbe a tshwèt njene, ghafen b'a ntoṅ mine, nummbe a tshwèt nju'u. 17Kua' nenùne, me tshob bin ndù: Ghatshob ntshob Nsi yàme, bo ben netsin yàme, lo diag neyen ju ze bin tshwèt njen nà ke yen, ndiag neju' ju ze bin tshwèt nju' là ke ju'.
18Ndonni bin ju' tànkùt ngama' nsa. 19Mba we lo z'a num nju' ntshob nufen Nsi ke tshùb là, mèn kebwô num nse'e, ntsho' ju ze bo ma' ntù i là. Yen mèn ni b'a nzwit ju ze bo na' ma' nkaṅ manze là. 20Dù' ndoṅ dù' ze bo ma' nsa bwe là, b'a mèn z'a num nju' ntshob Nsi, nkwé ndende ntùm tsiaṅte, 21là, a ke ywim nga ntù i, là, a ke tswe yàme, ngelaṅ nge' mba netsho' nku kebàn se' yi num ntshob Nsi mi a kwé là, a yoṅ mfa'te bwe ngwù nsi. 22Dù' ngumndot dù' ze bo ma' nsa bwe là, b'a mèn z'a num nju' ntshob Nsi, là nelab wut num yôg se ntùm njù mba nekô nu nkàb se' mfam ntshob mbile, a ke yam ntàm mi là. 23Dù' tsha' mebwô dù' ze bo ma' nsa bwe là, b'a mèn z'a num nju' ntshob Nsi ntshùb là; yen mèn ni num njame, ngù ntàme, mo' nkù, mo' ṅam ntôge, mo' ṅam ntat. 24A bèn mfà mo' tànkùt bo ntshob ndù: Nufen kamànyam fut'a mo' mèn z'a na' njwit ju mebwô ntùm nà i là. 25Ngelaṅ benntùn ke nzi là, ngakeban i se', njwit nzwit ju kebwô netèt ngefele, nèn tse. 26Ngelaṅ ngefet bit mfa' ko' tse là, mba nzwit ju kebwô bèn ntum ze. 27Ghafa' tàndà se' mbaṅ i, ntshob yi ndù: Tshùaben, o lo ke ywil à nzwit ju mebwô ntùm nà o ké? Kà nzwit ju kebwô yôg mfe à yà? 28Là, a tshob bo ndù: A b'a mèn z'a b'a ngakeban nà bèn ngù yen ju là. Là ghafa' tshob yi ndù: O kô ndù bag nèn ntsho'te yub ké? 29Là, a tshob bo ndù: Nga, mbwôg ndù kà bin tsho' nzwit ju kebwô, ntsho' mba ze mebwô. 30Bin faṅ njoṅ i bàa fa ku' tà nkum ngelaṅ netsho' tshu, me nsi tshob ghafa' ndù: Bin bwôgmbwe ntsho' nzwit ju kebwô, nkut ntsha'ntsha' ntone, là ntse'te ngefele, njab ntùm nta àm.
31A bèn mfà mo' tànkùt bo ntshob ndù: Nufen kamànyam fut'a metsit nzwit tù ze mo' mèn na' ndo' njwit ntùm nà i là. 32Yen metsit nzwit tù li kag ntshùa njoṅ nzwit tshu fa, là ngelaṅ a bile, nku' là, a sag ntshùa memo' ntù, ntù' tù ndùb ndù bon nsaṅ mfe kamànyam se' nke mfite ntùm nkaṅ mi.
33A bèn ntshob mo' tànkùt bo ndù: Nufen kamànyam fut'a ntsha' ze mo' mènnzwi na' ndo'o, ndem ntùm mfi' mbab bàn ntat, tà nkum ngelaṅ ze njoṅ i fa ko' là.
34Yésu tshob njoṅ tshen tshu là bwoṅ benntùn à ntùm tànkùt, a ke tshob sàm nu bo k'a ke b'a be ntùm tànkùt. 35Ndùlala #Yobk. 78.2ndù men ntshob li mi ngatshob ntshob Nsi na' ntshob là, bumte ndù: Me nsi gha' ntshu àm tshob ba tànkùt; me nsi soṅ njoṅ tshu nelemte fa ts'a be fe ngelaṅ nenabte njù là.
36Ngelaṅ a faṅ bwoṅ benntùn nà, a nèn ntsho ntùm ndà. Ghazi'te nu i se' mbaṅ i, ntshob ndù: Tote tànkùt nzwit ju kebwô ntùm nà bag. 37A bùnte, ntshob ndù: Mèn z'a ywit nzwit ju mebwô là b'a Mén mèn. 38Nà b'a njù; nzwit ju mebwô b'a bon nufen Nsi; nzwit ju kebwô b'a bon mèn kebwô. 39Ngakeban z'a ywil i là b'a Satan, ngelaṅ netsho' tshu b'a miagte njù; ghafa' b'a ba Angél. 40Ndaṅndaṅ *gi*mba bo tsho' nzwit ju kebwô nton mbwôg là, a nsi be be ndaṅndaṅ ngelaṅ miagte njù. 41Mén mèn nsi tum Angél tse, bo nsi tsho' njoṅ njwi' fa mba njoṅ benntùn fa tse bo num ngù nukebwô là ntùm nufen se, 42ma' yub ntùm tômbwôg z'a be nkù ke bi là; nekua' mba nefèt nsô nsi be yen dù' là. 43Là ben netsin nsi ké' mba lagnyam nà ntùm nufen Tà yub. Mèn z'a ghù ntoṅ nà, a ju'.
44Nufen kamànyam fut'a mo' junkàb z'a lem ntùm mo' nà, mo' mèn fon, ndem nà; ntùm tsiaṅt'é, a nèn nswèn njoṅ tshu fa ts'a ghù là, njun yen nà là yi. 45Nufen kamànyam bèn mfut'a mo' ngatantàn z'a ke ndiag ntshèn ntôgntse là. 46Là, a fon nda' ta' ntshèn ntôgntse ntshù', ndù a tanjoṅ neshu, a nèn nswèn tshu fa ts'a ghù là, njun i yi.
47Nufen kamànyam bèn mfut'a mo' mbunjà ze bo ma' ntùm dibantse a ghom tshu nzenze là. 48Ngelaṅ a dun nà, bo soṅ njab kaṅ ntse ntswe nsi, ntse'te ts'a bwô là, naṅ ntùm ntsi, ngua' ts'a ke' bwô là. 49A nsi be be ndaṅndaṅ ngelaṅ miagte njù: Ba Angél nsi tume, fagte ben kebwô netèt ben netsine, 50ma' yub ntùm mbwôg z'a be nkù ke bi là; nekua' mba nefèt nsô nsi be yen dù' là.
51Bin ju' njoṅ tshen nu là fa ké? Bo tshob yi ndù: Ṅ, bag ju'. 52Là, a tshob bo ndù: A b'a ndùlala mba zit ngalèn ṅwa'ni Nsi lo z'a zi'te nu num nufen kamànyam nà, fut'a mo' tàndà z'a num nsô tshu nswe mba tse njwèn ntùm junkàb i là.
Yésu mà Nazarèt
(Mark. 6.1-6; Luk. 4.16-30; Yoha. 1.11)
53Ngelaṅ Yésu miagte netshob tshen tànkùt li là, a tum yen dù' là, 54nèn nkum ntùm ko' ngô i, ntswite yub ntùm sinagogue tshobe, kà bo tshàm, nke ntshob ndù: Yen zenu li mba tshen nsà li fe à yà yen mèn ni à? 55A ke' b'a mén ngave li ké? Bo ke' be tsiaṅ màab ndù Maria, fèt tse ke' b'a Yakob, Yosèf, Simon mba Yuda ké? 56Njoṅ fèt tse tse bènnzwi fa ke' b'a nsen ni netèt be ké? Tshen nu li fe à yà yen mén ni à? 57Bo #Yoha. 4.44fa'te num i. Là Yésu tshob bo ndù: Bo ke' be wag ngatshob ntshob Nsi k'a ke nda' ntùm ko' ngô i, mba ntùm la' se. 58A ke ghù nsà yàm bwe, nummbe ntù yub lo ta, bamntù yub ke be.
Currently Selected:
Matio 13: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.