Lévitiko 8

Nefà mfa' Aron boa bon tse

(Netu. 29.1-37)

1Tshùaben tshob Mosé ndù: 2Lo' Aron boa tse nshum, ba nzwe, mfèt yo', fot mfô netamte fa yi, nkomnjù mbàa bo ntsi bàn ze bo ke' te ywibte se là; 3tsiaṅ mbumte bon Israél ntshundà ndà mbumte.

4Mosé ghù ju ze Tshùaben tshob yi là; mbumte bon Israél be ntshundà ndà mbumte. 5Mosé tshob mbumte bon Israél ndù: Tshù ju ze Tshùaben bètte ndù be ghù li: 6Mosé ghù Aron boa tse nshum ghebte, a sôg yub ntùm ntse. 7A ma' kum num Aron, ntaṅ kob tun i, ma' kum num i, ma' kum nesag se bo ke nkel à num ngelaṅ fa' là num i, ndo' kob sen kum nesag là ntaṅ bwe. 8Mosé ma' kum s'a ke nswe' nkabt'a ntù mèn nà num Aron, njab urim bo tummim num bwe. 9Mosé te tshe' tu Aron, njab ta' bag gol num mbwe tshe' là, yen nà b'a kétmbùm se nelàne. A ghù à kua' mba Tshùaben na' ntshob yi là.

10Mosé lo' mfèt yo', njo' dù' nelàn yi boa njoṅ tshu fa ts'a be ntùm bwe là, ndànt'é. 11A miagte mfèt num tômbwôg yoṅ tse sammbàa; njo' tômbwôg boa tshu ndà tse fa, kab tshab bo tun i, ndùlala ndù a lànte yub fa. 12A naṅ mfèt yo' num tu Aron, njo' i, ndùlala ndù a lànt'é.

13Mosé ghù mba tse nshum Aron ghebte; a ma' ba nkum nesag num bo, ntaṅ nkob tun bo, nkut ba ntshe' tu bo ndaṅndaṅ mba Tshùaben tshob yi là.

14A ghù fot mfô netamte fa yi ghebte, Aron boa tse nshum yab mbu num tu fot mfô netamte fa yi, 15Mosé wal i, ndo' lem tse, nso ntu bu i bwe, njab num ba ndô tômbwôg ndiaṅ mbume, ndànt'é, ndànt'é ndùlala num netamte fa bwe. 16A lo' nzit fa mi a num mbe num tshu bam tse là, nkal i boa mba zwe' mi mbàa, nzit mi, nton njoṅ i fa num tômbwôge. 17Là, nton fot mfô, ngub i, mbàb i, boa mbèt mi njam mbàn ndaṅndaṅ mba Tshùaben na' ntshob yi là.

18Mosé ghù komnjù se bo ton nà ghebte. Aron boa tse nshum yab mbu mub num tu komnjù. 19Mosé wat komnjù, naṅ lem tse num tômbwôg ndiaṅ mbume. 20Mosé kebte komnjù nkam nkam, nton tu i, nkam nkam mi boa nzile. 21A lo' ntse nsôg tshu bam tse yi boa nku mi, nton njoṅ komnjù fa num tômbwôge: Yen nà b'a nyàm netone, mbe jule'te ze bo ton mbwôg là, ndù njwèt mi lamte Tshùaben kua' mebwô. Njoṅ i fa tôg à mba Tshùaben na' ntshob Mosé là.

22A ghù semo' komnjù ghebte. Sen komnjù là b'a se neghom kam yi, Aron boa tse nshum yab mbu num tu komnjù. 23Mosé wal i, ndo' lem tse njab num bàb toṅ Aron ze zwim, njab num madu' bu i ze zwim bo madu' ku i ze zwim. 24A ghù tse nshum Aron ghebte, a yab lem num bàb toṅ sob se zwim, njab num madu' bu yub ze zwim bo madu' ku yub ze zwim. A fètte lem num tômbwôg ndiaṅ mbume. 25A lo' nzile, nkun, njoṅ nzit fa mi a num mbe num tshu bam tse là, mba zwe' mi mbàa boa nzit mube, mba bu i ze zwim; 26a lo' ba bàn ntùm kesoṅ, bàn bo ke' te ywibte se là. Bo na' nte sen kesoṅ n'a Tshùaben. A lo' ta' makela' ze ntsha' ke bwe là, ta' makela' ze mfèt be bwe là bo tag nekate, njab tshen tshu tse mfèt be bwe là bo tag nekate num nzit mba num bu nyàm ze zwim. 27Mosé fà njoṅ tshen tshu là mum mbu Aron boa nshumnshum tse, nshùte bag bag mbwe Tshùaben, nyi'te njoṅ i fa. 28Yen nà be tôg Mosé bèn nkwé tshen tshu là mum mbu mube, nton num tômbwôge, num nyàm z'a mbwôg là: Yen nà b'a jule'te ze neghom kame, mbe jule'te ze netone, ze njwèt mi lamte Tshùaben kua' mebwô là. 29Mosé lo' nônsi komnjù neghom kam yi, nyi't'é bag bag mbwe Tshùaben: Yen nà b'a ze ju Mosé ndaṅndaṅ mba Tshùaben na' ntshob yi là. 30Mosé lo' mfèt yo' bo lem ts'a lo mbe num tômbwôg là; ndo' miagte num Aron mba num nzwe tse; a lànte Aron boa nzwe tse, nshumnshum Aron boa nzwe tshobe.

31Mosé tshob Aron boa nshumnshum tse ndù: Bin ghù bo na mbàb ntshundà ndà mbumte; a bwe là ze bin nsi fèt mbàb bo bàn z'a be ntùm kesoṅ neghom kam yi kua' mba me na' ntshob là. Me lo tshob ndù Aron boa tse nshum nsi fèt yen mbàb là. 32Bin nsi ton ju z'a nsi tù' num mbàb bo bàn nà ntùm mbwôge. 33Bin ke nsi lo mbwe ntshundà ndà mbumte num lé'njù sammbàa, tà nkum lé'njù tse bo ghom zin kam nsi bumte là; nummbe bo nsi lo' à lé'njù sammbàa kà ghom zin kam yi. 34Ju z'a tôg sènni Tshùaben bèn ntshob ndù bo ghù ndùlala ntamte fa yi num bin. 35Ndùlala bin nsi tswe ntshundà ndà mbumte num lé'njù sammbàa, mbwôgtshù mba tèttswe', ke ze ntshù' Tshùaben, mbwôg ndù kà bin kwù; nummbe yen nà b'a ju ze Tshùaben na' ntshob me là.

36Aron boa nshumnshum tse ghù njoṅ tshen tshu là fa tse Tshùaben na' ntshob Mosé là.

Currently Selected:

Lévitiko 8: BMa

Highlight

Copy

Compare