Lévitiko 26

1Bin #Netu. 20.4; Lev. 19.4; Neb. 5.8; 16.21-22; 27.1ke nsi nabte ba neto, bin ke ghù nekome, ke ze nebom bom no, ke bèn nte nesà loṅ ntùm ngô, se bo tshebte ba netshaṅ bon tshu bwe, nke ngwù nsi mbwe i là; nummbe me b'a Tshùaben Nsi zin. 2Bin nsi ze Sabbat tshàm, ke lo' dù'ntswe àm kua' ntùm nku'ni. Me b'a Tshùaben.

Ntshob kondèn

3A #Neb. 11.13-15; 28.1-14be ze bin ze ntshù' màm, a be ze bin tshùb nkàn màm, nke nze njoṅ i fa là, 4mba me nsi ke tum mbaṅ bin ngelaṅ i, tsha' fà tshu, ntù mi a num njam ntàm nà yam ntàm mube. 5Bin nsi tsham nsa tà nèn kum ngelaṅ nekeb nsa, lo num ngelaṅ nekeb nsa nèn kum ngelaṅ neywit tshu. Bin jù bàn zin kà njwèle, tswe ntùm zin ngô kua' ntùm fite. 6Me nsi ghù fite tsho ntùm ngô, bin zi mèn ke kamte zin num miaglo; me nsi biagte tshùagkèt nyàm ntùm ngô, ṅwi be ke tshùa ntùm zin ngô. 7Bin nsi yab njam ghakeban tsine, ta' yub kà wat yub be kua' mbwe bin. 8Ben tàn netèt bin nsi yab njam tse nkù, ben nkù yab njam tse ntsha' gham, bin watte yub be kua' mbwe bin. 9Me nsi kaṅ wul àm lôte zine, me nsi ghù bin sine, ghù bin yàme, me bèn nke mbéb kàn sàm se bag bin wat là. 10Bin nsi jù njwèn tshu, sô njwèn tshu kà tse nswe fon dù' netsho bwe. 11Me nsi te dù'ntswe àm netèt bin, ntù àm be ke ke mbag num bin. 12Me #2 Korin. 6.16nsi zin netèt bin, be Nsi zin, bin be yàm nzwit mèn. 13Me b'a Tshùaben Nsi zin, me na' nsô zin Egipto, nsô zin ndà kuan; me lo keb nkù kele' sine, ngù bin be zin nke ntshag tu zin tù.

Ntshob ndon

(Neb. 28.15-68)

14Là, a be ze bin ke' ju' ntshu àm, ke ke nze nkàn màm fa, 15a be ze bin wag ntshù' màm, ntù zin nke mbag be nebag num ntag màm, kà bin ke ke nze tsin nkàn màm, ntam kàn sàm ku là, 16mba tshù ju ze me nsi ghù bin ni. Mba me nsi tum nge' kebwô num bin: Mbwôge, nejume, saṅte wut, bo sènte miag mine, ntù zin yen nge'; bin nsi ywit tsin tshu à banban, nummbe ghakeban tsin nsi bèn tsho' i fa. 17Me nsi tsho' lag sàm num bin, ghakeban tsin kab mbu num bin be kua' num miag mine; ghakeban tsin nsi tô zine, bin ke nkù ke be ndù mèn ta' zine.

18A be ze mba tà ndùlala bin ke' ju' ntshu àm nà, mba me nsi yab nu num bin num nukebwô tsin yoṅ sammbàa. 19Me nsi be' ju z'a be mfà neta bin, nke ngù bin nka'te là. Me nsi ghù sin kamànyam ta mba tùn nà, tsha' tsin ta mba tùn meba là. 20Neta zin nsi yub à banban, tsha' tsin ke nsi bèn fà tshu, ntù neyam be ke bèn njam ntàm mi.

21A be ze bin tùn tu me, ke kô neju' ntshu àm nà, mba me nsi lab zin yoṅ sammbàa tshùa mba nukebwô tsin be yi là. 22Me nsi tshag ba nyàm tshwèt num bin, tse bo nsi ghom bon tsine, ghom nyàm tsine, ghom kua' mbe' yàm benntùn netèt bin; tsin manze nsi b'a fam, sàm mèn be ke bèn nke ntshùa bwe.

23A be tshen nge' là ke' tagte zine, bin nke nke' ntùn be tu me, 24mba tu wul àm yàm nsi tùn tu bin, lab zin yoṅ sammbàa tshùa mba nukebwô tsin be yi là. 25Me nsi ghù ṅwi se' num bin, njagte mba' num kàn sàm; me nsi tum keya' netèt bin ndùse bin nsi kùmte ntùm ntusô min nà, swèn zin ntùm mbu ngakeban. 26Ndùse me nsi be' nkô bàn zin nà, bènnzwi gham nsi na bàn num ta' tômbwôg ntshù'; bo nsi fà yen bàn nà bin, bin jù ke ywèt.

27A be ze mba tà ndùlala bin ke' ju' ntshu àm, nke nke' ntùn tu me là, 28mba me nsi tùn tu bin yab nge' num bin ntùm tshùagntù àm yoṅ sammbàa tshùa mba nukebwô tsin be yi là. 29Bin nsi fèt mbàb nshumnshum tsin mba ze ngonngon tsine. 30Me nsi sate tsin mbwe', tsham neto tse bin te tù num lén lagnyam nà, yab fe tsin num fe nka neto tsine, ntù àm tsho' num bin, nu tsin bag àm. 31Me nsi lo' ntusô min kaṅ kônkwa yi, biagte tsin dù' ghamte, ke bèn nke mfit njwèt tsin labinda ts'a be ndamte kua' mebwô là. 32Me nsi sate ngô. Ghakeban tsin tse bo nsi tswe bwe là nsi tshàme, bwôge. 33Me nsi sate zin tshag ntùm ngôngô, tsho' ṅwi njam bin. Ntusô min nsi tù' kônkwa, ndù bo sate ngô zine.

34Ndùlala ngô nsi tsiaṅte num tse Sabbat, num njoṅ ngelaṅ fa tse bo sat'é, bin ke' ntùm ngô ghakeban tsin nà; yen ngelaṅ nà la' nsi be ntùm fite ke tsiaṅte num tse Sabbat. 35La' nsi tswe ntùm fite ndùs'a nsi tù' tù' i là, tsiaṅte num Sabbat tse tshùa mb'a na' mbe ndùse bin ke ntswe ntùm ngô là.

36Me nsi ghù bwôg dun ntù ben tse bo nsi ke' ntùn nà ntùm ngô ghakeban tshobe. Futù nsi nyi'te bo tsho' nkùù; bo nsi kù kua' mba bo num nkù mbwe ṅwi là, vù nsi, ke be ndù mèn tshwèt nta' yube. 37Mèn nsi vù num mfèl i, bo ke ngwù nsi mèn num mo' mba bo b'a mbwe ṅwi là, ke be ndù mèn tshwèt nta' yube. Bin ke nsi tum ntshu ghakeban tsine. 38Bin nsi bite netèt ngôngô, ntùm ngô ghakeban tsine, bo biagte zine. 39Ben tse bo nsi ke' ntùn nà nsi yub ntùm ngô ghakeban tshob num mfànnu mube; bo nsi yub mba num mi mfànnu tà tshobe.

Nsi a' kwimte kàn se

40Bo nsi bam nukebwô tshob boa tse tà tshobe, bam mfànnu mi bo ghù num àm nà, bo tùn tu ze bo ghù mbwe àm nà; 41nukebwô ze mba tu wul àm nsi tshùa njam bwe tùn tu bo, lo' yub nèn yi ntùm ngô ghakeban tshob là. Ntù yub z'a sag là nsi fà wut nsi, bo bèn mfènte lèt nukebwô yub. 42Me #Net. 17.7-8; 26.3-4; 28.13-14nsi kwimte kàn sàm se bag Yakob wat là, kàn se bag Isak wat là, kwimte kàn se bag Abraham wat là, kwimte mba ngô. 43Bo nsi ghua' ngô, ngô ke ntsiaṅte num tse Sabbat ndùs'a nsi tù' tù' i, bo b'a ngùanesà mbaṅ i là; bo nsi tô njo mfànnu mube, nummbe bo wag ntshù' màm, nu ntshù' màm nke mbag yub ntù bo neshu. 44Là, ndùse bo nsi be ntùm ngô ghakeban tshob là, me ke yoṅ ngua' yub kua' neghua'a, nu tshob ke yoṅ mbag àm kà me biagte yub kà nkeb kàn se bag à bo wat là; nummbe me b'a Tshùaben Nsi yub. 45Me nsi bèn kwimte njwèn kàn àm num yub tu. Njam sen kàn nà, me lo sô yub Egipto, num miag ngôngô, ndù me be Nsi yub. Me b'a Tshùaben.

46Men ni b'a nkàn, ntag boa ntshù' mi Tshùaben tshùa njam Mosé nte netèt tu wul i boa bon Israél num mbat Sinaï là.

Currently Selected:

Lévitiko 26: BMa

Highlight

Copy

Compare