Lévitiko 22
22
Nefèt mbàb tshule'te
1Tshùaben tshob Mosé ndù: Tshob Aron mba tse nshum, 2ndù kà bo jù tshu nelàn tse bon Israél fà me là, ke bèn ndo' lén sàm se nelàn mba ju banban nà. Me b'a Tshùaben. Tshob bo kua' ndùlala.
3Mba we lo netèt nzwit zin z'a ghebte num tshu nelàn tse bon Israél fà me Tshùaben, ndù ng'é ghù mo' nesagte num i là, mba bo nsi sô yen mèn nà, lo' i lo yi num miag màm. Me b'a Tshùaben.
4Mba we lo ntùm nzwit Aron z'a ghù nkin ke satnswe lo là ke nsi jù tshu nelàne, tà nkum ndùs'a bèn ndàn nà. A b'a be ndaṅndaṅ num mèn z'a kwag mèn z'a sagte wul i num ta' fe mèn, mèn z'a bagte dù' là, 5mèn z'a kwag nyàm z'a num nsoṅ bam se nsi nsagte wul i là, ke mèn ze mo' ju nesagte ghom i, a tshùa njam bwe nsagte wul i lo. 6Mèn z'a kwag tshen tshu là là nsi sagte tà kum mfetnjù; a nsi jù tshu nelàne, là a nsi sôg wul i ntùm ntse; 7ndùse lagnyam nsi bi là, a nsi be nelàne, bèn jù tshu nelàne, nummb'a b'a jujù i. 8A ke nsi fèt nyàm z'a kwù là, ke ze ju bèn nsé't'é lo, ndùlala ndù k'a sagte wul i num bwe. Me b'a Tshùaben.
9Bo nsi ze ntshù' màm, mbwôg ndù kà bo ket lèt nukebwô yub, mba ndù kà bo kwù, mba bo lo' tshu nelàn mba tshu banban nà. Me b'a Tshùaben, mbe ndù me bèn nke ndànte tshen tshu là.
10Sàm ngùn ke nsi jù tshu nelàne; mèn z'a tshwèt ntswe ndà ngale'te bo ngafa' là ke nsi jù tshu nelàne. 11Là, ta' nkuan ze ngale'te lo' nkàb njun i yi là ghù nejù tshu nelàne, mba mèn ze bo bwe i ntùm ndà i là; bo nsi jù jujù i. 12Ngon ta' ngale'te z'a na ndà bo mèn z'a ke' be ngale'te Nsi là ke nsi jù tshu nelàn tse bo be fà Tshùaben mbù' tù là. 13Là, ngon ta' ngale'te z'a nsi tù' mfôge, ke ze ndu i ta' i, ke be ndù a ghù mén, a bèn ndà tàab mbe bwe mb'a na' mbe ndùs'a ke' ngon nà, ghù nejù jujù tàab. Sàm mo' mèn ghua ke' ghù nejù ju bwe.
14A be ze mèn jù ju nelàn ke lèn nà, mb'a' fà njoṅ ntshu ntàn i ngale'te, mbèn nkwi'te ju bwe, z'a be njoṅ ta' bag yen ju là, a be ze bo ghabt'é nze tàn nà. 15Ghale'te ke nsi bam ben banban jù tshu nelàn tse bon Israél nabte njab nefà Tshùaben nà. 16A be ndùlala mba bo a' ghù bo ket lèt nukebwô yub, mba bo jù tshu nelàn nà. Nummbe me b'a Tshùaben, ndù me bèn nke ndànte tshen tshu là.
Mat lo' ndiag tshule'te
17Tshùaben tshob Mosé ndù: 18Tshob Aron, tse nshum boa njoṅ bon Israél fa ju ze me nsi tshob wù là: Mba zit ze Israél lo, ke mba zit ngùn no ntùm ngô Israél z'a tshwèt mfà ju bwôntù, z'a be nyàm netone, Tshùaben num nezwiagte nka'ni yi, ke z'a kô mfà lo là, 19mb'a bwô ndù a fà ndu nyàm ze kelo', fot mfô, komnjù, ke mén mbwe lo, a be z'a kô ndù ze nu tshùa là. 20Kà #Neb. 17.1bin fà sàm nyàm z'a ghù lo' là, nummbe mba yen nu là ke nsi tshùa.
21Ndùse mèn ke mfà jule'te z'a tshwèt nda'te ndù mèn tamte bo Tshùaben nà mb'a bwô ndù nyàm nà b'a ke lo', k'a nyàmna' ke mbwe lo, k'a b'a nezwiagte nka'ni yi, k'a b'a nekô mfà lo, ntag ndùlala mba yen nu là ke nsi tshùa. 22Bin ke nsi fà nyàm z'a vù fù, mbe nke'kèt, ku i ke bu i lo be', mbàn ghom i, kôglag ke mbàn nzin no tshùb i là Tshùaben. Bin ke nsi ton lèn yen nyàm nà Tshùaben num tômbwôg se. 23A be z'o ke mfà ju bwôntù mb'o kô là, mb'o ghù nefà nyàmna' ke njùmbwe lo ze nku mi boa mbu mi ke' be ndaṅndaṅ, mo' sag ntshùa mo'o, mo' bèn mvôg ntshùa mo' là, là, bo ke' bam lèn yen nyàm nà num nezwiagte nka'ni. 24Bin ke nsi fà nyàm ze bo nyu' mba tse, ntsit mba tse ke ne nsô mba tse là lo Tshùaben. Kà bin se nyàm ntùm zin ngô. 25Kà bin bam nekwé lèn tshen nyàm nà bu ngùn mfà jujù yi zin Nsi; Nummbe bo b'a nke'kèt, ndù bo ghù lo'. Be tshen nyàm nà ke tshùa num nu bo tum ndà num bwe là.
26Tshùaben tshob Mosé ndù: 27A bwô ndù nyàmna', mén njùmbwe ke mén mbwe lo tswe mbaṅ màab lé'njù sammbàa ndùse bo bwe i là; a be z'a kum mbatte lé'njù fom nà, mb'a be bo ton i Tshùaben num jule'te. 28A ke' bwô ndù bin zwi nyàm bo mén i num lé'njù ntshù', k'a b'a nyàmna' ke njùmbwe lo.
29Bin ke nkagtùn ndù Tshùaben bam jule'te zin z'a tshwèt nda'te ndù mèn tamte bo Tshùaben nà ndùse bin fà yi là. 30Bin fèt yen nyàm nà be kua' lé' se, ke bam ndù tshé' i zi ndà tà nkum nkebnjù. Me b'a Tshùaben.
31Bin ke ntshùb ntshù' màm, nke nze njoṅ i fa. Me b'a Tshùaben. 32Bin ke nsi lo' lén sàm se nelàn mba ju banban nà, ndùlala ndù lén sàm be nelàn netèt bon Israél. Me b'a Tshùaben, 33ndù me bèn nke ndànte zine. Me Tshùaben na' mbèn nsô zin ntùm ngô Egipto num nebe Nsi zin. Me, b'a Tshùaben.
Currently Selected:
Lévitiko 22: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
