Lévitiko 21
21
Mat neyôg ghafà tshule'te
1Tshùaben tshob Mosé ndù: Tshob ghale'te, tse nshum Aron, men ntag li m'a' tshob wù là: Kà sàm ngale'te sagte wul i num ta' fe mèn netèt ze nzwit mèn, 2kà ntag nda' ben tse bo b'a tse lem nà: Màab, tàab, nshum i, ngon i, mfèl i ze mandum, 3mfèl i ze mènnzwi z'a be ntswe bo yi là, a be z'a ke' à ménngon bo ke yoṅ ntabt'é, a ke yoṅ na ndà là; a ghù nesagte wul i num fe i a be z'a yà na ndà là; 4mb'a b'a mfen netèt ze nzwit mèn nà, a ke' bwô ndù a sagte wul i, ke lo' se fa' mba ju banban nà.
5Ghale'te #Lev. 19.27-28; Neb. 14.1ke nsi kom ta' dù' tèt tu bo, ke kom mbaṅ nyiaṅ ntshu tshobe, ke tshebte mfaṅ num bo. 6A bwô ndù bo be ben nelàn num Nsi yub, ke lo' lén Nsi yub mba ju banban nà; nummbe bo bèn nke nton tshule'te Nsi yub num mbwôge; yen nà b'a jujù Nsi yub. Bo nsi b'a ben nelàne. 7Bo ke nsi so kattù mènnzwi ke z'a ghù yôg kebwô lo. Bo ke nsi so mènnzwi ze ndu i ta' i là, nummbe bo b'a nelàn num Nsi yub. 8O nsi lo' ngale't'a mba mèn nelàn nà, nummb'a nke mfà jujù Nsi o; a nsi be mèn nelàn num o, nummbe me Tshùaben ze me num ndànte zin nà b'a nelàne.
9A be ze ngon ngale'te bagte wul i, nkat là, mb'a bagte tàab. Mb'a bwô ndù bo ton i mbwôge.
10Ngale'te z'a tshùa tsemo' fèt tse, yen nà ze bo na' naṅ mfèt tu i njo' i, ngom i kame, ma' nzwe fa' Tshùaben num i là, ke nsi faṅ tu i nge ke bèn mfagte nzwe tse. 11A ke nsi nèn mbaṅ sàm fe mèn; a ke nsi sagte wul i, ke num fe tàab ke fe màab lo. 12A ke nsi tum dù'ntswe, ke lo' dù'ntswe Nsi i mba ju banban nà; nummbe mfèt mi Nsi na' njo' i yi là b'a ndot fen yi. Me b'a Tshùaben.
13Ngale'te nsi so à ménngon ze bo ke' yoṅ ntabt'é là. 14A ke nsi so mfôg mènnzwi, ke mènnzwi ndu i ta' i lo, ke mènnzwi z'a bagte wul i ke nekat lo là; là, a nsi so à ménngon ze bo ke' yoṅ ntabt'é, z'a tum à netèt ze nzwit mèn nà. 15A ke nsi bagte tse bon netèt ze nzwit mèn; nummbe me b'a Tshùaben, mbe ndù me bèn nke ndànt'é.
Tshu ts'a ku' nekàn nefà tshule'te là
16Tshùaben tshob Mosé ndù: 17Tshob Aron ndù: Num njoṅ zwiaṅ njù fa, sàm mandum netèt nzwil o z'a ghù lo' num wul i là, ke nsi ghebte num nefà jujù Nsi i. 18A ndùlala njoṅ ben tse fa tse bo ghù lo' num bo là ke tshob ntùm nka; num fa' Tshùaben. Tshen ben nà b'a: Ba mfùmiag, nke'kèt, ben tse mo' kam wut yub tsi là, tse mo' ju kwi'te num bo là, 19ba nke'kèt num ku bo, ke num bu bo lo, 20ba tu'mvèn ke ba fènnsi lo, ben tse bo ghù lo' num lag sobe: Sa, mbàne, nyulag, ke tse mba tshob tsit lo. 21Sàm mandum netèt nzwit Aron ngale'te ke nsi fà tshule'te tse bo ton mbwôg là Tshùaben, a be z'a ghù lo' num wul i là. Mb'a ghù lo' num wul i là, a ke' ku'ni neghebte mfà jujù Nsi i. 22Là, a ku'ni nejù jujù Nsi i, z'a tum num tshu bwôntù ts'a làn neshu boa ts'a làn nà. 23Là, a ke' ghù neghebte mbaṅ kam nzwe ke mbaṅ tômbwôg lo, nummb'a ghù lo' num wul i; a ke nsi lo' dù'ntswe tshàm mba ju banban nà, nummbe me b'a Tshùaben, mbe ndù me bèn nke ndànte tshen dù'ntswe là.
24Tshù mba Mosé na' ntshob Aron boa tse nshum, mba njoṅ bon Israél fa là.
Currently Selected:
Lévitiko 21: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
