Lévitiko 15

Nesagte satnswe num mandum

1Tshùaben tshob Mosé bo Aron ndù: 2Bin tshob bon Israél ndù:

Mba zit mandum no z'a ghù satnswe là tshùa njam bwe mbe ndù a sagte. 3A tshùa njam satnswe se kà mbe ndù a sagte. A be ze wul i lem nswe ke nekag i a nke ntum no là, mb'a sagt'a be nesagte. 4A be z'a nô num ta' kunndà ke netswe num ta' ju lo là, mba ju mbit sagte ndaṅndaṅ mba kunndà là. 5Mèn z'a kwag kunndà se là nsi sôg nzwe tse, sôg wul i ntùm ntse, be nesagte kum mfetnjù.

6Mèn z'a tswe num ju z'a tswe bwe là nsi sôg nzwe tse, sôg wul i ntùm ntse, be nesagte kum mfetnjù.

7Mèn z'a kwag wul i là nsi sôg nzwe tse, sôg wul i ntùm ntse, be nesagte kum mfetnjù. 8A be z'a tôg ntsi num mèn z'a ke' ghù satnswe, ndàn nà, mba ng'é nsi sôg nzwe tse, sôg wul i ntùm ntse, be nesagte kum mfetnjù.

9Mba ke lo z'a ko' ntswe num bwe là sagte. 10Mèn z'a kwag mba zit ju lo z'a na' ngù là, be nesagte tà nkum mfetnjù. Mèn z'a ket yen ju là là nsi sôg nzwe tse, sôg wul i ntùm ntse, be nesagte kum mfetnjù.

11Mèn ngaghù satnswe kwag i ke be ndù a sôg a mbu mi ntùm ntse là, nsi sôg nzwe tse, sôg wul i ntùm ntse, be nesagte kum mfetnjù. 12A be z'a kwag kab tsha' là mb'a bwô netsit kab, a be z'a b'a kab tù là, mb'a bwô nesôg ntùm i ntse.

13Ngelaṅ z'a nsi sôg làn num nswe z'a tshwèt ntum num i là, mb'a bwô ndù a siaṅ lé'njù sammbàa num yen nu là; a nsi sôg nzwe tse, sôg wul i ntùm ta'ntse, be nelàne. 14A mbe kum mbatte lé'njù fom a lo' bwoṅ saṅ bàa ke bwoṅtambia' bàa lo nèn yi mbwe Tshùaben, mbwe nzendà ndà mbumte, mfà men nsaṅ nà ngale'te. 15Ngale'te nsi fà men nsaṅ nà num jule'te: Semo' num ze tamte fa yi, semo' num ze netone; ngale'te nsi tamte fa num tu i mbwe Tshùaben, num nu nswe z'a tum num i là.

16Mèn z'a bagte dù' là nsi sôg wul i fa ntùm ntse, be nesagte kum mfetnjù. 17Mba zit nzwe lo bo mba zit ngub lo z'a tshùb yub là, mba bo nsi sôg yub ntùm ntse, bo be nesagte nkum mfetnjù.

18A be ze ta' mènnzwi nô bo lèn yen mandum nà là, mb'a bwô ndù bo sôg wut tshobe, mbe nesagte nkum mfetnjù.

Nesagte satnswe num mènnzwi

19Mènnzwi ze lem tshwèt ntum num i là nsi tswe ntùm nesagte lé'njù sammbàa. Mèn z'a kwag yen mènnzwi là nsi be nesagte kum mfetnjù.

20Kunndà s'a nô bwe yen ngelaṅ nà z'a be ntùm nesagte là sagte; mba ke lo z'a tswe bwe yen ngelaṅ nà là sagte.

21Mba we lo z'a kwag kunndà se là nsi sôg nzwe tse, sôg wul i ntùm ntse, be nesagte kum mfetnjù.

22Mba we lo z'a kwag ju z'a tswe num bwe là nsi sôg nzwe tse, sôg wul i ntùm ntse, be nesagte kum mfetnjù.

23A be ze ju be num kunndà ke num ju z'a tswe num bwe lo là, mba mèn z'a kwag yen ju là là nsi be nesagte kum mfetnjù.

24A be ze ta' mandum nô bo yen mènnzwi, sagt'é tsho num mandum nà, mb'a' be nesagte num lé'njù sammbàa; kunndà s'a nô bwe là nsi be nesagte.

25Ndùse lem tum num mènnzwi lé'njù yàme, ntôg mb'a be nto' mbe ndùs'a tshwèt njen ṅwù, lem nà tum ntôg ngelaṅ z'a be mbe ntùm nesagte là, mb'a nsi b'a ntùm nesagte num yen ngelaṅ nà lem tshwèt ntum num i là. A nsi ghù à be mb'a be ngù ngelaṅ z'a tshwèt njen ṅwù là.

26Mba sit kunndà lo s'a nô bwe ndùse lem tshwèt ntum num i là nsi b'a mba s'a be nô bwe ndù neyen ṅwù là; mba ke lèn ju lo z'a tswe bwe là nsi be nesagte mb'a be mbe ndùs'a tshwèt njen ṅwù là.

27Mba we lo z'a kwag tshen tshu là nsi be nesagte. A bwô ndù ng'é sôg nzwe tse, nsôg wul i ntùm ntse, mbe nesagte nkum mfetnjù.

28Ndùs'a nsi sôg làn num lem ts'a tshwèt ntum num i là, mb'a bwô ndù a siaṅ lé'njù sammbàa, tshen lé'njù là be tôg k'a mbe nelàne. 29A be mbatte lé'njù fom mènnzwi là lo' bwoṅ saṅ bàa ke bwoṅtambia' bàa lo nèn mfà ngale'te nzendà ndà mbumte. 30Ngale'te nsi fà semo' saṅ nà num jule'te ze tamte fa, fà semo' num jule'te ze netone. Ngale'te nsi tamte fa num tu mènnzwi mbwe Tshùaben, num nu lem ts'a tum num i nsagt'é là.

31Tshù mb'a bwô bin ywimte bon Israél, bo ke nsôg ndàn num sagte yub là. A nsi tshùa ndùlala bo be ke kwù ntùm sagte yub mba bo bagte dù'ntswe àm z'a be netèt bo là.

32Tshù ntshù' z'a kwag satnswe ke nebagte z'a tum num ntse wut mi a tum num mèn nà lo. 33Yen ntshù' là tshwèt nkwag mènnzwi z'a tshwèt njen ṅwù là; nke mbèn nkwag mba zit mèn no, mandum ke mènnzwi lo ze lem tshwèt ntum num i là. Ntshù' li kwag mba mandum z'a nô bo mènnzwi z'a sagte mb'a tshwèt njen ṅwù là.

Currently Selected:

Lévitiko 15: BMa

Highlight

Copy

Compare