Netume 29

Neyo' ghale'te

(Lev. 8.1-36)

1Tshù mb'o nsi ghù kà yo' yub num fa' sàm ni: Lo' metshab fot mfô boa nkomnjù mbàa, tse bo ke' ghù lo' là; 2mbèn ngù bàn ze bo ke' te ywibte se là, ba makela' tse bo ke' ma' ntsha' bwe, ndo' à mfèt mbu'te yi là, boa tag tse bo tonte, ndo' mfèt njo' i yi là; a bwô ndù o lo' à mbab ngefet kà ndo' nka njoṅ i fa yi. 3O nsi yab njoṅ i fa ntùm ntsi, fà yoṅ ntshù' boa metshab fot mfô mba nkomnjù mbàa.

4O nsi lo' Aron boa nshumnshum tse nèn yi nzendà ndà mbumte sôg yub bwe ntùm ntse. 5O nsi lo' ba nzwe, ma' kum nesag se bo ke nkel à num ngelaṅ fa' là, kel i tshub bàa bo kum s'a ke nswe' nkabt'a ntù mèn nà num Aron. Taṅ mba kam nzwe sen kum nà tô i. 6Lo' kam nzwe ndam tu i yi. A bwô neyab keki mba bo yo' i là num kam nzwe bo lam tu i yi là. 7Yen nà mbe tôge, o lo' mfèt mi neyo' mèn yi, naṅ num tu i ndo' njo' i yi. 8Ndùs'o la'te nshumnshum tse là, mb'o a' ma' kum num bo. 9Ntaṅ kob tun bo, nte ntshe' tu bo. Yen ngelaṅ nà fa' nsi lôt'a bo num ta' ntshù' z'a nsi, ndù a ghô matmat là. O nsi ghom Aron boa nshumnshum tse num sen fa' là.

10O nsi lo' metshab fot mfô nèn yi mbwe ndà mbumte. Aron boa nshumnshum tse nsi yab mbu mub num tu metshab fot mfô. 11Tu wul o nsi sù tô sen metshab fot mfô là mbwe Tshùaben ntshundà ndà mbumte. 12O nsi lo' lem metshab fot mfô, so ntu bu o bwe yab num ba ndô tômbwôge. Ndùse yen nà tôg là, o fètte tshé' lem tun tômbwôge. 13O nsi lo' njoṅ nzit fa mi a be ṅabte num tshubam tse là boa mba zwe' mi mbàa mba ba nzit mi a be bwe là ton num tômbwôge. 14Là, lo' mbàb i, ngub i boa ntô mi, tshag se, ntum nton njam mbàn. Yen nà b'a jule'te num nukebwô.

15Yen nà mbe tôg o lo' mbwe komnjù. Aron boa nshumnshum tse yab mbu mub num tu komnjù. 16O nsi sù tô komnjù, lo' lem tse miagte num tômbwôg diaṅ bume. 17O nsi watte komnjù nkam nkam, sôg ntô mi boa nku mi, yab num nkam mi bo tu i. 18Ton #Ef. 5.2; Fili. 4.18njoṅ komnjù fa num tômbwôge. Yen nà b'a nyàm z'o ton Tshùaben nà, a b'a ju nelamte z'a be njwèt jujù ze bo ton Tshùaben nebott'é yi là.

19Yen nà mbe tôg o lo' mbatte komnjù mbàa. Aron boa nshumnshum tse yab mbu mub num tu komnjù. 20O nsi sù tô komnjù lo' lem tse yab num bàb toṅ Aron se zwim, yab num bàb toṅ nshumnshum tse, yab num màdu' bu yub ze zwim bo màdu' ku yub ze zwim. Lo' tsemo' lem miagte num tômbwôg ndiaṅ mbume. 21O nsi lo' lem ts'a tômbwôg là bo mfèt yo', miagte num Aron boa num nzwe tse, miagte num nshumnshum tse mba nzwe tshobe; a nsi tshùa ndùlala bo tù' ben nelàne, Aron boa nzwe tse, nshumnshum tse boa nzwe tshobe. 22O nsi lo' dù' ts'a tshote là num komnjù, nkun i, nzit mi a be ṅabte num tshubam tse là, bat se, mba zwe' mi mbàa, mba nzit mi a be bwe là, mba bwe tun se se zwim, nummb'a b'a ta' komnjù se neghom kam yi. 23O nsi bèn lo' tu' bàn, lo' tàm makela' mfèt bo makela' nkun ntùm ntsi bàn ke te ywibte se ze bo te mbwe Tshùaben nà. 24O nsi yab njoṅ i fa num mbu Aron mba num mi nshumnshum tse. Ghù ndù bo lo' mat mbétni ndo' nèn yi mbwe Tshùaben. 25Bèn kwé mum mbu mube, nèn nton num tômbwôge, bo nyàm z'o ton nà. A b'a ju nelamte mbwe Tshùaben nelo' mbott'é yi. 26O nsi lo' nônsi komnjù neghom kame, z'a b'a ze Aron nà. Lo' mbétni ndo' nèn yi mbwe Tshùaben bin yen nônsi komnjù là. Yen nônsi komnjù là nsi b'a yu ju. 27O nsi lànte nônsi komnjù ze bo nèn yi mbwe Tshùaben nà bo bwe tun se se bo lo' là, ju bo nèn yi mbwe Tshùaben mba ze bo lo' num komnjù neghom kame, z'a be ze Aron boa nshumnshum tse là. 28Yen nà nsi b'a mi ntsi' Aron boa nshumnshum tse, ndù bo bèn ngù ntsha bwe matmat num bon Israél. Tshù, yen nà b'a ntshub, mbe ndù a nsi b'a ntshub num ze tu bon Israél. Bo nsi ke lo' à num tshob tshule'te tse nelon fite. A b'a ntshub z'a bwô nefà Tshùaben nà.

29Bo nsi fà ba nzwe fa' Aron nshumnshum tse; bo nsi ke nket nka, bo yo' yube, ngom yub kame. 30Nshum Aron z'a nsi ghù be ngale'te ze ndùb num ze dù', ke tsho ndà mbumte, num nefa' ntùm dù' nelàn nà, nsi ket tshen nzwe là num lé'njù sammbàa.

31Lo' komnjù neghom kam na mbàb i num ta' dù' nelàne. 32Aron boa nshumnshum tse a' fèt yen mbàb là bo bàn z'a ntùm ntsi là ntshundà ndà mbumte. 33Bo nsi jù ju ze bo lo' mbiagte fa yi ndù neyo' yub, bo neghom yub kam nà. Be mèn banban ke fèt nummb'a b'a ju nelàne. 34A be ze njù be làn mbàb bo lo ngom kam yi ke' bo bàn nà, mb'o a' ton tshe' tse. A ke' bwô bo bèn njù, nummb'a làn. 35Tshù mb'o nsi ghù Aron boa nshumnshum tse, ndaṅndaṅ mba me la'te wù là. O nsi ke ghom yub kam num lé'njù sammbàa. 36Mba zit lé'njù lo, wat ta' metshab fot mfô num nelo' mbiagte fa yi num nukebwô. Fà jule'te tômbwôg num nukebwô, ghù mba bo be mbiagte fa là, njo' i neghù ndù a tù' nelàne. 37O nsi ke ghù mat nebiagte fa num tômbwôg num lé'njù sammbàa, ke lànt'é, a tshùa ndùlala tômbwôg làn neshu. Mba ke lo z'a nsi kwag bwe là nsi tù' nelàne.

Jule'te ze njoṅ ndù fa

(Nes. 28.1-8)

38Bèn ntshù ju z'o nsi ke nèn yi tômbwôg li: Njùmbwe tse bo ghù tamngu' là, bàa num ta' lé'njù, ndùlala matmat. 39Ke nabte mbwe njùmbwe num nkebnjù, nabte mbatt'é num ndù mfetnjù, ndùse njù tamte là. 40Mbwe njùmbwe ghù nguan kesoṅ mbab bàn bwe, mi bo lo' nguan ntshaṅ mfèt bàa ntébte yi là. Mfèt b'a mi bo ke' bwete là. A bwô ndù nguan ntshaṅ ndu' bàa mi bo ma' là be bwe. 41Mbe se' mba mbatte njùmbwe là, nabt'é num mba njù tamte là. Yab be njoṅ ju bwôntù z'a lo mbe mbaṅ ze nkebnjù là bwe bo ndu' mi o ma' nsi là. A b'a ju nelamte z'a be njwèt jujù ze bo ton Tshùaben nebott'é là. 42Tshù mba nyàm neton Tshùaben ngu'ngu' nsi ke tôg là. A nsi ke b'a mbwe ndà mbumte, mbwe me Tshùaben. Bag ngô nsi ke bumt'a bwe kà me tshob nu wù. 43Me nsi ke bumte yen dù' li bag bon Israél, dù' ze nkuni màm nsi lànt'é là. 44Me nsi yo' ndà mbumte bo tômbwôge; me nsi yo' Aron boa nshumnshum tse ndù bo ke mfa' fa' sàm. 45M'a' ghô netèt bon Israél, ke be Nsi yub. 46Bo nsi lèn ndù a b'a me bèn mbe Tshùaben, mbe Nsi yub, me ze me na' nsô yub ntùm ngô Egipto num netswe netèt bo là. A b'a me Tshùaben bèn mbe Nsi yub.

Currently Selected:

Netume 29: BMa

Highlight

Copy

Compare