Mfa' Ghantum 27

Mba Paulo ke nèn mà Roma là

1Ngelaṅ bo nabte ndù bag tsho sitima nèn Italia là, bo fà Paulo mba tsemo' ghandàtsha mo' tà ba soyé, lén se Yuliô; a na' mb'a num ntshu ntsho Kàsà. 2Ngelaṅ bag ko' ntùm sitima ba Adramatia s'a ke nèn nze kaṅ ntse Asia là, bag nèn, bag à Aristarkô ze Tésalônikà mà Màkédônia. 3A be mbatte lé'njù, bag kum Sidon. Yuliô lo' Paulo mba mènntùn nà, mbam a nèn ndôte shun tse ndù bo ywimt'é. 4Bag lo bwe ntshùb nze nenèn kaṅ ntse Kiprô, nummbe fetmbaṅ na' nke ntum à mbwe bag. 5Ngelaṅ bag dut dibantse z'a be mbwe Kilikia mba Pamfilia là, bag kum ngô Mira mà Likia. 6Tà ba soyé yen sitima ba Aléksaṅdria bwe, a nke nèn Italia. A ghù bag tsho ntùm bwe. 7Bag zin be nda'nda' ntùm nge' lé'njù yàme, nèn nkum mfe tu Knidô, fetmbaṅ ke bèn nebam bag zin ndaṅndaṅ, bag tù' tshùa tun Krèta, ngô tètntse mbaṅ Salmône, 8ndo' à be nge' yàm kà nkum yi num mo' dù' ze bo ke ntsiaṅ ndù ntshuntse mebwô, mbaṅ ngô Lasaya là.

9Mb'a na' ntshùa ngelaṅ yàm fe mba bag be num ntse, nelo' sitima nzin yi nke nta nèn be mbwe, nummbe ngelaṅ netswe nziku' lo à tôg là, Paulo tagte yub, 10ntshob ndù: Benntùn, me yen ndù nelo' sitima nèn yi mbwe nsi tôg à ntùm fetmbaṅ ndùb, be be miagte, ngù bi yàme, ke b'a nda' num tshu mba sitima, là mba benntùn. 11Là tà ba soyé ju' ntshu ghatshagte sitima mba ngasitima ntshùa neju' ju ze Paulo ke ntshob là. 12Mba yen ntshuntse là na' mbe ke bwô netswe bwe ngelaṅ ndùsàn nà, benntùn yàm be ntshu ntshù' nelo bwe nèn Fénix, mo' ntshuntse Krèta z'a be nze bag mbinyam nà, nejù sàn bwe.

Mba fetmbaṅ ma' sitima ntùm ntse là

13Là mo' fetmbaṅ fe nze mà ntèn, ntshu'te mén nda'nda', bo kwate ndù a bwô bo nèn mbwe. Bo kiag sitima ndo ndiaṅte kaṅ ntse mbaṅ Krèta, ngô tètntse. 14Là, a be ghubte, mo' fetmbaṅ ndùb bo ke ntsiaṅ i ndù Eurakilôn nà tum ntùm ngô, ngwù num ntse, 15ntèn sitima nkel i nke nèn yi kà bag ke bèn nku'ni neghù sàm ju, bag tù' faṅ tshag sitima nèn dù' ze fetmbaṅ kô là. 16Ngelaṅ bag ke ntshùa tun Klaudia mo' metsit ngô tètntse là, bag yen nge' neshu kà ntshùb metsit sitima num nete i ntùm se ndùb.

17Ngelaṅ bo miagte nete i ntùm bwe là, bo lo' tshu ywimte, nkut sitima ndiaṅ mbume; mba bo ke mbwôg nenèn ntsham num Siria là, bo kôg nzwe sitima, mfaṅ sitima nke nèn mb'a kô là. 18Njù be làne, fetmbaṅ nke nta nèn be mbwe, bo ghua' tshu ntàn ntùm ntse. 19A be mbatte lé'njù tat, bo ghua' tshu sitima ntùm ntse mbu mube. 20Ntùm lé'njù yàme, lagnyam mba nsa ke be, fetmbaṅ nke nta nèn be mbwe yàme, kà njoṅ nenywinte yôg fa mi num bag.

21Mb'a na' ntswe yàm sàm mèn ke jù ju là, Paulo lo tù netèt bo, ntshob ndù: Bin na' mb'a kà nju' ntshu àm, be ke lo Krèta, mba bin ke' bi tshen tshu li mba neyen yen ngùtni là. 22Ndonni me tshwèt ntagte zin ndù bin fèn ntù: Sàm mèn netèt bin ke bi, nda' sitima bèn bi. 23Yen tèttswe' li, Angél Nsi z'a ghù àm, ze me ke mfa' yi là ṅwag me, 24ntshob ndù: Paulo, kà bwôg! A bwô ndù o tsin mbwe Kàsà; tshù, kondèn Nsi fà ben tse bin à bo be là wù. 25Bin tshùb fènntù zine, nummbe me yab ntù àm num Nsi ndù nu z'a lo netshob me là nsi bumte. 26Là, a bwô ndù sitima kum num mo' ngô tètntse, ntsin num nkwa.

27Mbatte tèttswe' ntshob kuà gham lo be se'e, mba bag be num dibantse Adria, a nke ndo' yag nèn yi bag bag là, num nguan tshaṅ tèttswe', ghafa' ntùm sitima kwate ndù bo tshwèt ngebte num tsha'a, 28bo so nta'tù ntse nezwi'te mfi' ntse yi, njen a be ma' ṅam mbàa; ngelaṅ bo bèn nèn mbwe mén nda'nda' là, bo bèn nso, njen ma' ntshob tàn gham. 29Mba bo ke mbwôg nenèn ntsham num loṅ nà, bo lo' hanga nkuà, ma' ntùm ntse, njam sitima, nke nde'te Nsi ndù njù làne. 30Là ghafa' ntùm sitima ma' num ntse, ndo' latnta yi ndù bo nèn ma' à hanga ntùm ntse mbwe sitima. 31Paulo tshob tà ba soyé ndù: A be ze tshen ben ni ke' tswe ntùm sitima là, mba bin ke nsi yôge. 32Ndùlala ba soyé keb nkù metsit sitima, mfaṅ a vù ntse.

33Bo be béb njù làne, Paulo nke ntagte benntùn ndù bo jù ju, ntshob ndù: A b'a mbatte lé'njù ntshob kuà gham ni mba bin tswe, nke mbéb ke jù sàm ju là. 34A ndùlala me tagte zin ndù bin jù ju, nummbe a' ywimte zin num yôg sine; mba ntàn nyiaṅtu sàm mèn netèt bin ke nsi bi. 35Ngelaṅ z'a tshob ndùlala là, a lo' bàn, nde'te Nsi mbwe njoṅ benntùn fa, mbe'te nto' nejù. 36Njoṅ yub fa fèn ntù, njù yub jujù mba Paulo là. 37Tshù, Bag na' mb'a benntùn ntshob ntôg bon sammbàa nkù bàa ntùm sitima. 38Ngelaṅ bo ywèt là, bo sô nsa ma' ntùm ntse num neghù sitima fùage.

39Ngelaṅ njù làn nà, bo yen tsha'a, là ke lèn dù' ze bo be là; bo yen nda' mo' kaṅ ntse ndù nkwa be bwe, bo kwate ndù a bwô netèn sitima nèn nkum yi num nkwa, a be ze bo ku'ni là. 40Bo kebte nkù hanga nkag ntùm dibantse, nkiagte nkù sitia, mbù' nzwe sitima, ntam nze nèn ndaṅndaṅ kaṅ ntse. 41Là bo nèn ngwù num mo' kam tsha' ze ntse ke ntshùa bwe bag bàa là, ntsham sitima, tu i tsin num tsha' ke bèn nenyi'te, tun i tù' njam, fetntse nke nshùm i, mbe't'é mfémfé. 42Ba soyé nke ndiag nezwite ghandàtsha, mbwôg ndù kà bo vù ntse, nda ntse nkù. 43Là tà ba soyé be diag mb'a yôg Paulo là, nga nkwatenu mube, ntshob ndù ben tse bo ku'ni là vù ntse, nda ntse, nèn num tsha'a. 44A bèn ntshob tsemo' ndù bo tshùb mbag tù mi a be'te num sitima là. Ndùlala njoṅ benntùn fa nèn kà ntum num tsha' ntùn.

Currently Selected:

Mfa' Ghantum 27: BMa

Highlight

Copy