Mfa' Ghantum 22

1Fèt tshàm mba tà tshàm, bin ju' ju ze me ghù netshob bin, ndo' nkwé nta wul àm yi mbwe bin ndonni là. 2Ngelaṅ ze bo ju' a nke ntshob nu bo à ntshob Héber là, bo tswe ndù kam. 3Paulo #Mfa' Gha. 5.34-39lo' nu nèn yi mbwe: Me b'a mèn Yuda ndù bo bwe àm à Tarsô mà Kilikia, là ndù me ku' à ntùm yen dù' li mbaṅ nku Gamliél, nzi'te neze ntshù' ba tà be mb'a ku'ni là, nke nkô Nsi mba njoṅ zin fa sènni là. 4Me #Mfa' Gha. 8.3; 26.9-11lo tsho' nku yen nu Yésu li kebàn à ntùm nekwù, nke nkut bandum mba bènnzwi, ma' yub ndàtsha. 5Ngale'te Nsi ze ndùb mba njoṅ ghakwé mbwe fa b'a tshàm ghakwénta. Me na' nke nkwé ṅwa'ni à bo kà nèn ntèt fètfèt yi Damas num nekut ben tse bo be bwe là, ndo' yub nse' yi Yérusalém ndù bo naṅ ntsha tu bo.

Paulo soṅ mb'a kaṅ ntù i là

6Là ngelaṅ me be num manze nke ngebte Damas nguan njagnyam nà, be ngelaṅ mbile, mo' nka' swe' mfe kamànyam, nké' mba beba'mbaṅ nà, ndiaṅ àm mbume. 7Me vù nsi, nju' mo' nze nke ntshob me ndù: Saulo, Saulo, numk'o nke ntsho' nku màm kebàn à? 8Me bùnte ndù: Tshùaben, o b'a we? A tshob me ndù: Me b'a Yésu ze Nazarèt z'o num ntsho' nku mi kebàn nà. 9Ben tse bag à bo be là lo yen yen nka' là, là ke ju' nze mèn z'a ke ntshob me là. 10Me tshob ndù: Tshùaben ke ze me ghù à? Tshùaben tshob me ndù: Lo tù nèn Damas; bo nsi tshob njoṅ tshu fa ts'a bwô ndù o ghù là bwe. 11Me lo ke bèn neyen nze num nkuni yen nka' là, ndùlala ben tse bag à bo be là tshùb bu àm, nsoṅt'àm tà me kum Damas.

12Mo' Anania, ngabwôg Nsi mba ngaze ntshù' Nsi ze njoṅ ba Yuda Damas fa ke nkwé nta mi kua' mebwô là, 13se' ntèl àm, ntsin mbwe àm ntshob ndù: Mfèl àm Saulo, bèn njen nze! Be ndùse me yen nze. 14A bèn ntshob me ndù: Nsi ba tà be lo tsho' o ndù o lèn ze nekô, ndù o yen mèn netsine, mbèn nju' nze z'a tum ntshu i là. 15Nummbe o nsi be ze nkwénta mbwe njoṅ benntùn fa num nu ts'o ju' mbèn njen nà. 16Ndonni kà ghubte, lo nsi ntsiaṅ lén Tshùaben, bo nyu' o ntse, sôg nukebwô tsho.

17Ngelaṅ me bèn njam Yérusalém nà, mo' lé'njù me nke nde'te Nsi ntùm Ndà Nsi, ngwù nsi ntù àm tum, me yen i, 18a tshob me ndù: Lo nsi, tum Yérusalém ndende, nummbe bo ke nsi bam kwénta z'o nsi fà num àm nà. 19Me bùnte ndù: Tshùaben, bo lèn kua' mebwô ndù me lo ke nèn ntùm sinagogue nzenze ngom ben tse bo bam o là bwe, ngù bo ma' yub ndàtsha, mbèn ndab yube, 20mba #Mfa' Gha. 7.58ndù ngelaṅ bo fètte lem Etiènne ngakwénta mu là, me lo be bwe, mbame, nke mbéb nkummbaṅ ben tse bo zwi i là. 21A tshob me ndù: Tam manze, nummbe m'a' tum o ngùanesà ju ghakelèn Nsi.

22Bo ju' i tà nkum num men ntshob li, ntshob kua' mà neta ndù: Bin zwi yen mèn nà, nummbe a ke' ku'ni neyôge. 23Bo bèn nke nkua' kua' neta, nke ma' nzwe tshob nsi, mbèn nke mfùag mbabe. 24Ndùlala, mfen ba soyé tshob bo lo' Paulo nèn yi ndà ba soyé, mbèn ntshob ndù bo lo' nshua' mbètt'é ju z'a ghù kà benntùn nke nkua' njam i là. 25Ngelaṅ bo ke ndiag nekul i nkù là, Paulo tshob tà ba soyé z'a be bwe là ndù: Ntshù' bam bin ndù bin ke ndab mèn Roma ke be ndù bo tsho't'é a vù ntsha ké? 26Tà ba soyé be ju' men ntshob li, nèn nsoṅ mfen yub, ntshob ndù: Be a' ghù à ndùke? Yen mèn nà b'a ze Roma.

27Mfen ba soyé nèn mbaṅ Paulo, ntshob yi ndù: Soṅ àm, o b'a ze Roma à? A bùnte ndù: Ṅ. 28Mfen ba soyé bèn ntshob ndù: Tu wul àm, me fà nkàb yàm kà ngù sen lén nà, Paulo tshob ndù: Là tu wul àm b'a mèn Roma ntùm nebwe. 29Be ndùse ben tse bo ke nèn lab i nshua' bètt'é nu là, bènte njamnjam. Mba mfen ba soyé bwôg, ngelaṅ z'a ju' ndù Paulo b'a mèn Roma là, nummbe a lo ghù bo kul i ntùne.

Paulo mbwe ba Yuda

30Njù làn, mfen ba soyé diag nelèn ju ze ba Yuda bote Paulo num bwe là kua' ndaṅndaṅ, ngù bo kiagt'é, ntshob bo tsiaṅ ghale'te Nsi tse ndùbndùb mba njoṅ ntse'te ghatsho'te ntsha fa, ngù Paulo swe' tù, a te i netèt bo.

Currently Selected:

Mfa' Ghantum 22: BMa

Highlight

Copy