Mfa' Ghantum 20

Paulo mà Makédônia mba Grikia

1Ngelaṅ ze tshu'tu mi là, Paulo tum bo tsiaṅ ghazi'te nu Yésu, a tagte yube, ndé'te yub nèn Makédônia. 2A tshùa ntùm tshen ngô là, ntagte yub njam ntshob yàme, nèn nkum Grikia. A tswe bwe ṅwù tat. 3Ngelaṅ a ke ndiag netsho kenu nèn Siria là, ba Yuda bùn i ywi', ndùlala a yen ndù mebwô b'a nebèn njam ntshùa Makédônia. 4Shun zin tse na' mb'a Sôpatèr mén Pirô ze Bèréa, Aristarkô mba Sekundô bon Tésalônikà, Gayô ze Dèrbe mba Timôtio, Tikikô mba Trôfimô bon Asia. 5Tshen ni kwé mbwe, mbéb yag Trôa. 6Mba bag là, lé'njù Pasa be tshùa, bag tsho kenu Filipi, ntswe num ntse lé'njù tàn kà nkum mbaṅ bo Trôa dù' bag à bo tswe bwe lé'njù sammbàa là.

Paulo mà Trôa

7A be num mbwe lé'njù ntùm ngabnjù, bag tse'te nebe'te bàn, Paulo tshobte bo à bo tà nèn nkum tshaṅ tèttswe', nummbe njù lo ke ndàn a nèn nkebnjù. 8Ndambo lo be ntùm to'ndà tù, dù' ze bag tse'te là. 9Mo' ménnshum lén se Eutikô, tswe num tôndà, miaglo tshùb i kua' yàme, ngelaṅ Paulo ke nke' ntshobte boa fètfèt là. Miaglo ghùtni i k'a ba' num mbatte laṅ ba' tat ngwù nsi. Bo be bù' i ndù a kwù. 10Là Paulo swe' nsi, mben wul i num i, nkel i mum mbu mi, ntshob ndù: Kà bin neghùtni wut tsine, nummbe zwiag se ke' ntùm wul i. 11Paulo bèn nko' tù, mbe'te bàn njù, mbèn ntshob ntshob Nsi tà nèn nkum mfôgnjù, ndo nène. 12Bo lo' ménnshum nà ntùn, nse' yi. Yen nu là fite ntù benntùn neshu.

Mba Paulo nèn Milét là

13Mba bag là, bag tsho kenu, nkwé mbwe nèn Asôs dù' ze bag à Paulo nsi bumte, mb'a na' ntshob bag là. Nummbe tu wul i zin à nku. 14Ngelaṅ z'a kote yag Asôs là, bag lo' i ntùm kenu, nèn bag à bo mà Mitiléné. 15Bag lo bwe, nkum mbaṅ Kiôs nkebnjù, ntshùa mbaṅ Samôs mbatte lé'njù, ntsin Trôgilion, nkum Milét ntum kenu bwe mbatte lé'njù tat. 16Paulo lo yen ndù a ke' bwô netsin Efésô, nummbe a lo ke kô nebagte ngelaṅ Asia. A lo ke nànte nebe Yérusalém ntùm lé'njù Pentekôte, a be ze ngelaṅ bam nà.

Mba Paulo lé'te ghakwé mbwe Efésô là

17Mà Milét, Paulo tum bo nèn ntsiaṅ ghakwé mbwe netèt ntse'te benkristô. 18Ngelaṅ bo se' nkum mbaṅ i là, a tshob bo ndù: Bin lèn mat mba me na' mbe netèt bin njoṅ ngelaṅ fa, fe num mbwe lé'njù ze me na' nkum ntùm ngô Asia là, 19me lo ke mfa' Tshùaben ntùm nefà wut nsi, ntùm ntsenyà mba ntùm nge' tse ba Yuda ke mbùn àm yi là. 20Me lo ke to' bènte njam num tshu ts'a ku'ni neywimte zin nà; me lo ke ntshobe, mbèn nke ntswite zin ntshob Nsi mbwe benntùn mba ntùm ndà. 21Me lo ke nkwé nta mbwe ba Yuda mba ba Grikia ndù bo kaṅ ntù tshobe, mbèn njam ntèt Nsi, mbèn mbam Tshùaben be Yésu Kristô.

22Tshù, ndonni me b'a mbu mvèt bu Ywèt Nelàne, nke nèn Yérusalém ke lèn ju z'a nsi tsho ghù àm bwe là, 23là me lèn ndù ntùm njoṅ dù' fa Ywèt Nelàn be nkwé nta, ntshob me ndù mvèt mba nge' num mbwe àm, nke mbéb àm. 24Là #2 Tim. 4.7yôg sàm ke b'a ju tanjoṅ num miag màm k'a ke nda' ndù me miagte nde mi me tshwèt nkù là, mbèn ngù ndù fa' se me na' nkwé Tshùaben Yésu là bumte; yen nà b'a ndù nekwé nta mfà num nkùn mebwô kondèn Nsi.

25Tshù, ndonni me lèn ndù bin ke nsi bèn yen se àm, njoṅ zin fa tse me na' ntswe netèt bin, nke ntshob nufen Nsi là. 26Ndùlala me tshob bin mbèn ndo' zin mba ghakwénta là sènni ndù me b'a nelàn num lem njoṅ zin fa. 27Me lo ke to' bènte njam num nebe ke soṅ zin nekô Nsi fa. 28Bin lôte tu wut tsin mba bwoṅ njùmbwe ze Ywèt Nelàn yab zin ghalôte netèt bwe num nebéb ntse'te ben Nsi z'a na' ndo' à be kua' lem tse ntse'te yi là.

29Me lèn ndù ngelaṅ me nsi nèn nà, ba tshùagkèt ngwayit nsi se' mbaṅ bin, mbagte bwoṅ njùmbwe; 30netèt bin benntùn nsi lo bwe, tshob ba nu tatte num nesoṅte ghazi'te nu Yésu yi, mfà njam bo. 31Bin zi tshùalo, nke nkwimte ndù ntùm ngu'njù tat, tèttswe' mba mbwôgtshù, me lo ke fite netagte mba we lo netèt bin, ntùm ntsenyà. 32Ndonni me lem zin Tshùaben mba ntshob kondèn i z'a ku'ni nekut mbèn mfà ntsi' netèt njoṅ ben fa tse Nsi lànte yub là.

33Me lo ke ghe'te silba ke gol ke nzwe sàm mèn no. 34Tu wut tsin lèn ndù mbu màm lo ke mfà tshu ts'a bwoṅ me là, mba ben tse bag à bo na' mbe là. 35Num njoṅ i fa, me lo ke ntswite ben nebole, nke nkwimte ntshob Tshùaben Yésu, nummbe tu wul i lo tshob ndù: Fen num ntùm nefà ntshùa nekwé.

36A be miagte netshob yen nu li bo, nte nkekwi' mi nsi, nde'te Nsi boa njoṅ yub fa, 37njoṅ yub fa fètte ntsenyà, ntsho' ngwù num tô Paulo, ntat'é, 38nke nywin neshu mb'a tshob ndù bo ke nsi bèn yen se i là. Bo nèn nte i ntùm kenu.

Currently Selected:

Mfa' Ghantum 20: BMa

Highlight

Copy