Mfa' Ghantum 19

Paulo mà Efésô

1Ngelaṅ Apôlô na' mbe Korintô là, Paulo tshùa bag ngô z'a be mfe tu là, nswe' nèn Efésô. 2A tèt tsemo' ghazi'te nu Yésu bwe, ntshob bo ndù: Bin lo kwé Ywèt Nelàn ngelaṅ bin na' mbam Yésu là ké? Bo bùnte yi ndù: Bag lo ke yoṅ nju' nu mfà num Ywèt Nelàne. 3Paulo bèn mbètte yub ndù: Bin na' nkwé à zit kwéntse à? Bo bùnte ndù: Kwéntse Yohané. 4Paulo #Mat. 3.11; Mark. 1.4,7-8; Luk. 3.4,16; Yoha. 1.26-27tshob bo ndù: Yohané lo ke mfà kwéntse ze nekaṅ ntù, nke ntshob benntùn ndù bo bam mèn z'a tshwèt nse' njam i là, yen nà b'a ndù Yésu. 5Bo be ju' ndùlala bo nyu' yub ntse num lén Tshùaben Yésu. 6Paulo yab mbu num bo Ywèt Nelàn swe' num bo; bo to' netshob ntshob nzenze, mbèn nke ntshob mba ghatshob ntshob Nsi là. 7Bo na' mb'a nguan ntshob bàa gham.

8Paulo tsho sinagogue, nke ntshob nu num nufen Nsi ke bwôg, num maṅwù tat, fa' se ke tshùa banban. 9Là tsemo' ben nke nta be ntù ke bam, nke mbagte manze Tshùaben mbwe benntùn; a tum netèt bo, mfagte ghazi'te nu Yésu num bo, nke ntswite nu Yésu njoṅ lé'njù fa ntùm ndà ṅwa'ni Tirano. 10A ghù ndùlala num ngu'njù bàa; njoṅ benntùn fa tse bo ke ntswe Asia, ba Yuda mba ba Grikia là ju' ntshob Tshùaben, 11Nsi tshùa njam Paulo, ngù ba nsà nekuni, 12ndùlala kà benntùn nke ndo' nkam nzwe mba kob ts'a kwag ngub i là, nèn nke ntshwinte ghangokèt yi; ngokèt mi num bo, mba ba ywètkebwô bèn nke ntum num bo.

Ba Yuda ghata' ywètkebwô

13Là mba tsemo' ba Yuda ghata' ywètkebwô tse bo ke nzin be tùtù là, to' netsiaṅ lén Tshùaben Yésu num ben tse bo ghù ywètkebwô là, nke ntshob ndù: Me tshob bin num lén Yésu ze Paulo tshwèt ntshob là. 14Bo na' mb'a sammbàa, bon mo' ze Yuda ngale'te Nsi, lén se Skéva; bo na' mbèn nke ngù ndùlala. 15Là ywètkebwô bùnte ntshob bo ndù: Me lèn Yésu, mbèn ndèn mèn ze Paulo be yi là; là bin, bin be zin à ba we? 16Mèn ze ywètkebwô be num i là, tsho' ngwù num bo, ntù' ngatô tse bàa, ntsham yub kà bo kette mfaṅ, mbèn ntum à tunntôg yen ndà là kà nkù nène. 17Njoṅ ba Yuda fa mba ba Grikia tse bo ke ntswe Efésô là lèn yen nu là; bwôg tshùb njoṅ yub fa, lén Tshùaben be neghamte.

18Tsemo' ben netèt tse bo na' mbam Yésu là to' netshobe, nke ntote nu tse bo na' nke ngù là. 19Benntùn yàm netèt tse bo na' nke ngù ka là lo' ba ṅwa'ni ka nse' yi, nton mbwe benntùn. Bo siaṅte, njen ndù njoṅ i fa b'a drakma ntsha' ṅam ntàn. 20Ndùlala ntshob Tshùaben nke nta nèn mbwe, nke nda'te neta i.

Mba Demètriô tshu' tu ngô Efésô là

21Tshen nu li lo be tôge, Paulo nabte ndù a nsi tshùa Makédônia mba Akaya kà nèn Yérusalém, mbèn ntshob ndù: Ngelaṅ me nsi kum Yérusalém, lôte dù' là, mb'a bwô ndù me nèn njen mba Roma. 22A tum tsemo' ghaywimt'é bàa Makédônia, Timôtio mba Erasta, ntù' mbèn ntswe Asia mo' mén ngelaṅ.

23Num yen ngelaṅ nà, mo' tshu'tu ndùb tum num nu Yésu. 24Mo' mèn lén se Demètriô, ngave z'a ke ndo' tùn nabte bontsit tèmpèl Artémis yi là, lo ke ngù ghave tse ghù bin yàme. 25A tse'te mba tsemo' ghafa' tse bo be ghave là, ntshob bo ndù: Ben tshen, bin lèn ndù be ke njôg à num sen fa' li. 26Bin yen ndù ke b'a nda' Efésô, là ntùm ngô Asia fa, Paulo tshwèt ntswite, mbèn nke mbagte tu benntùn ntshob ndù: Ba nsi tse benntùn nabte mbu mub là ke' b'a ba nsi. 27Nge' z'a be bwe là ke' b'a nda' ndù fa' be a' bagte, là, a b'a ndù mba tèmpèl Artémis, Nsi ndùb ke nsi bèn be sàm ju, lén se se njoṅ ba Asia fa mba njoṅ njù fa num ngamte là bèn mbi.

28Men ntshob li so yantù ntùm ntù tshobe, bo kua' neta ntshob ndù: Artémis ba Efésô b'a ze ndùb. 29Tshu'te vù ntùm ngô, njoṅ yub fa tèn bwoṅ ngwù num ndà dù' neghù sa, nsoṅ Gayô mba Aristarkô ba Màkédônia, shun zin Paulo. 30Paulo nke ndiag netsho netèt benntùn, là ghazi'te nu Yésu to' i. 31Mba tsemo' kamkam Asia tse bo na' mb'a shun tse là tum bo nèn ntagt'é ndù k'a nèn ndà dù' neghù sa.

32Tsemo' nke ntshob yen ni, tsemo' nke ntshob yen nà, nummbe tshu'tu lo vù ntùm ntse'te kà ben yàm ke bèn nelèn tu nu ze bo lo ntse'te bwe là. 33Bo sô Aléksaṅdre netèt bwoṅ benntùn, ba Yuda tènt'é ntshag mbwe. Aléksaṅdre ma'te bu, ndiag netshob nu benntùn. 34Ngelaṅ bo lèn ndù a b'a mén Yuda là, njoṅ yub fa kua' nze ntshù' nguan nyam bàa, ntshob ndù: Artémis ba Efésô b'a ze ndùb.

35Là ngakite ṅwa'ni ngô ghù bwoṅ benntùn mi', a tshob ndù: Ba Efésô, we z'a netèt benntùn ndù a ke' lèn ndù ngô ba Efésô bèn nke ndé' tèmpèl Artémis ze ndùb mba neto i z'a swe' mfe kamànyam n'à? 36Sàm mèn ke' be ta ntshu num yen nu là, a bwô ndù bin mi ntswe ke ke ngù ju ntùm nenànte. 37Nummbe bin lo' tshen ben ni nse' yi; bo ke bagte tèmpèl ke bèn ntshabte Nsi be Artémis. 38A be ze Demètriô mba ghave tse bo à bo be là ghù ntsha boa mèn nà, a bwô bo bot'é; lé' netsho'te ntsha num bwe mba ba ngomna bèn mbe! 39A be ze bin bèn ngù tsemo' nu là, mba bo a' tsho't'a ntùm ntse'te ntshù' ngô. 40Be bo lo' be mba ghabagte ngô là num nu z'a tôg sènni là, nummbe be be ke soṅ tunu z'a ghù be tse'te là. 41A tshob ndùlala, ngù ntse'te sate.

Currently Selected:

Mfa' Ghantum 19: BMa

Highlight

Copy