Mfa' Ghantum 16

Fa' Paulo mba Timôtio

1A nèn nkum Dèrbe mba Listra. Tshù, mo' ngazi'te nu Yésu lo be bwe, lén se Timôtio, mén mo' ngon Yuda z'a bam nu Yésu là, tàab be ze Grikia. 2Fètfèt tse bo be Listra mba Ikônia là lo ke nkwé nta mi kua' mebwô. 3Paulo kô nenèn bo yi, ndo' i, ngù a si ket num ba Yuda tse bo be tshen dù' là là, nummbe njoṅ yub fa lo lèn ndù tàab b'a ze Grikia. 4Ntùm njoṅ ngô fa tse bo tshùa bwe là, bo soṅ yub ju ze ghantum mba ghakwé mbwe nabte Yérusalém ndù bo ke nze là. 5Ndùlala bamntù njoṅ ntse'te benkristô fa nke nta nèn mbwe, bo nke nkwi'te njoṅ ngelaṅ fa.

Mba Paulo nèn Màkédônia là

6Mba Ywèt Nelàn to' yub ndù kà bo tshob ntshob Nsi Asia là, bo tshùa ntùm ngô Frigia Galatia. 7Bo be kum mbaṅ Mésia, nkwate nenèn Bitinia, là Ywèt Yésu ke bam bo. 8Bo tshùa Mésia ke tsin, nswe' nèn Trôa. 9A be tèttswe', Paulo yen mo' njem: Mo' ze Makédônia tsin tù mbwe i, mbu' mbu yi, ntshob ndù: Dut nse' Makédônia, njwimte yage! 10Be kua' ngelaṅ Paulo yen njem nà, bag diag nenèn Makédônia, nummbe bag lo bam ndù Tshùaben bèn ntsiaṅ yag netshob nkùn mebwô bo.

Mba Lidia kaṅ ntù i là

11Bag tsho kenu Trôa, ntshùb nze ndaṅndaṅ, nèn nkum Samotraké, nkum Néapoli mbatte lé'njù, 12ndo bwe, nkum Filipi z'a be mbwe ngô Makédônia, mbèn mbe nte' ba Roma là. Bag tswe tsemo' lé'njù ntùm yen ngô là. 13A be lé'njù Sabbat, bag tum ntùm ngô, nèn kaṅ ntse dù' ze bag kwate ndù nele'te Nsi a' be là. Bag tswe nsi ntshobte bag à bènnzwi tse bo na' ntse'te là. 14Mo' mènnzwi lén se Lidia, nke nju'u; a na' mb'a ngaswèn nzwe meba z'a fe ngô Tiatire là, mbe ngaghamte Nsi. Tshùaben gha' ntù i ndù a ju' ju ze Paulo tshwèt ntshob là kua' mebwô. 15Ngelaṅ ze bo nyu' i ntse mba tunndà i là, a tsiaṅ yag ntshob ndù: A be ze bin yen ndù me b'a ngabam Tshùaben nà, bin tsho ndà àm ntswe bwe. A bu' mbu bag, mbèn nànte yage.

Mba ngabéb ndàtsha kaṅ ntù i là

16Mo' lé'njù bag nke nèn dù' le'te Nsi, mbumte bag à mo' ngafa' ze mènnzwi z'a ghù ywèt netshaṅ ngàm nà, a lo ke mfà bin yàm ba tàfa' tse njam netshaṅ ngàme. 17A tam njam bag, nke nkua' ntshob ndù: Tshen ben ni b'a kuan Nsi mfe tù, bo ke nsoṅ zin à nze yôg. A ghù ndùlala lé'njù yàme. 18Yen nu là ya ntù Paulo, a kaṅ wul i njam ntshob ywèt là ndù: Me tshob wù num lén Yésu Kristô ndù o tum num i. Be ngelaṅ mbile, a tum. 19Ba tàfa' tse be yen mba bin ze bo ke nywinte bi là, ntshùb Paulo mba Silas, nsoṅ yub nèn yi ntshundà ngomna, 20mbèn ndo' yub nèn mfà ghakeb ntsha, ntshob ndù: Tshen ben nà tshwèt mbagte ngô yage; bo b'a ba Yuda. 21Bo tshwèt ntshob matnu ze ntshù' ke' bam ndù bag ba Roma bame, ke bèn nze là. 22Bwoṅ benntùn tamte nja ntù num bo, ghatsho'te ntsha ghù bo sô nzwe num bo, ntshob bo lab yub nshua'a. 23Ngelaṅ bo kebte yub nshua' yàm nà, bo ma' yub ndàtsha, ntshob ngabéb ndàtsha ndù a béb yub kua' mebwô. 24Ngabéb ndàtsha ju' ndùlala, ndo' yub ma' tshaṅ ndàtsha, ma' kebu' nku bo.

25A be nguan tshaṅ tèttswe', Paulo mba Silas nke nde'te Nsi, mbèn nke njob kwi ngamt'é yi; ghandàtsha nke nju' mba bo tshwèt njob là. 26Tshù, tsha' nyi'te kua' mà neta, kà tun ba' ndàtsha nke mvètte. Be ndùse, njoṅ nzendà fa gha' nte nge, nkù ntùn tse bo kut ghandàtsha yi là kebte ngwùte nsi. 27Ngabéb ndàtsha bam num miaglo, njen ndù nzendà ndàtsha b'a nge, nsô ṅwi i, nke ndiag nesob wul i yi, nummbe a ke nkwate ndù njoṅ ghandàtsha fa kù. 28Là Paulo kua' neta, ntshob ndù: Kà ghù nukebwô num o, njoṅ yag fa b'a nsen ni.

29Ngabéb ndàtsha bètte nka' nkù nde nèn tshaṅ ndàtsha, ngwù num nku Paulo mba Silas, nke mvètte, 30ngù bo tum, a tshob bo ndù: Tà tshàm, ke z'a bwô ndù me ghù kà njôg à? 31Bo tshob ndù: Bam Tshùaben Yésu o nsi yôge, wù mba tunndà o.

32Bo tshob ntshob Nsi yi mba njoṅ benntùn fa tse bo be ndà i là. 33Be num yen ngelaṅ nà, tèttswe', ngabéb ndàtsha lo' yub nèn nsôg ntshu mfaṅ num bo. Be ndùse, bo nyu' i ntse mba njoṅ ben tse fa. 34A lo' yub nèn yi ndà i, mfà jujù bo, mbèn ntsiaṅte boa njoṅ tunndà i fa, mb'a bam Nsi là.

35Njù be làne, ghatsho'te ntsha tum ghabéb ntshundà ju ngabéb ndàtsha, ntshob ndù: Kag tshen ben nà. 36Ngabéb ndàtsha tshob men ntshob là Paulo: Ghatsho'te ntsha tum benntùn, ntshob ndù bo kag zine. Ndonni, bin tum nzin fite nène. 37Paulo tshob bo ndù: Bo lo ndab yag nshua' mbwe benntùn ke tsho'te ntsha, mbèn ma' yag ndàtsha, bag tse bag b'a ba Roma là; ndonni bo tshwèt nsô yag nelemte! Nga, a ke b'a ndùlala, a bwô nese' yub tu, nsô yag ntum yi njù.

38Ghabéb ntshundà bèn njam, ntshob men ntshob li ghatsho'te ntsha; bo be ju' ndù bo b'a ba Roma, bwôg tshùb yube. 39Ghatsho'te ntsha se' mfite ntù yube, nsô yube, mbu' mbu bo ndù bo tum ntùm ngô nène. 40Ngelaṅ bo tum ndàtsha là, bo nèn ndà Lidia, mbe yen fètfèt, ntagte yube, ndo nène.

Currently Selected:

Mfa' Ghantum 16: BMa

Highlight

Copy