Mink 3
3
Nde *nlem be Zambe
(Mink 4:1-10; Sam 37:3-6)
1A mone wom te vuane ñye'elane wom
a nleme wôé ô tame ba'ale mebendé mam:
2amu ma ye kô'ôlane nté ya melu môé,
mimbu ya ényiñe jôé a *mvo'é jôé.
3Nsemane metiñ a bebela bi bo'o te kôlô be wo,
tiñeti'i bie e tyiñe jôé.
Tili'i bie ako'o ya nleme wôé.
4Nalé ate wo ye nyoñe *mvam a nya ñwô'ane mam
e mise me Zambe a bôt.
5Va'a womiene be Zambe a nleme wôé ôse,
a te buni atyeñe dôé.
6E mezene môé mese été,
tame meme nye, éyoñe te a ye kôme mezene môé *zôsôô.
7Te liti e mise môé été na ô ne fek,
ve ko Zambe woñ a sa'ale abé;
8*mvo'é ñhe le asu nyôle jôé,
a ñwônan asu bivese biôé.
9Kañe Zambe a akume dôé
a *bembômô ya biôme wo bi;
10éyoñe te mengune môé ma ye jaé ne lut,
a befôndô bôé ba ye jaé a mfefé woon.
11A mone wom te biasé ébôme Zambe
nge ko mveane bijô wé woñ;
12amu nyô Zambe *a nye'e nye a ve bijô,
aval'ésaa a bo e mon *a nye'e.
Fek é ne élé y'ényiñ
(Hé 12:5-13; Mink 8; Sam 37:28-34)
13Ebotan a môt a someya fek,
nalé fe môt a yeme fas,
14amu mfi fek ja ve
ô ne mvaé a dañe wu argent,
a akume da so fek da dañe or;
15fek é ne dia a dañe meko'o me n'édima,
a biôme bise ya minkômbane miôé
bi nji ke bo ane je.
16Ayab ényiñ é ne nye mbo nnôm;
akum a duma ki mbo ngale wé.
17Mezene mé me ne mezen me ne mvaé
a mezene mé mese ma soo mvo'é;
18fek é ne élé y'ényiñ e be ba ba bi je.
A ba ba ba'ale je be ne njalan a mevak.
19Nti Zambe a nga belane fek éyoñ a nga té si,
a nga belan atyeñ éyoñ a nga yemete yôp;
20beyee be nga kuiban a ñyemane mame wé,
ñyemane mame wé ñwô fe minkut
mia miase mveñ.
21A mone wom ba'ale'e fek a mfasane mam
te kañese na bi ke wo ôyap.
22Bia ye bo ényiñe ya nsisime wôé,
a mvame ya tyiñe jôé.
23Eyoñe te wo ye wulu e zene jôé a ndi ése,
a abo dôé da ye bo te kolé ôbak;
24nge wo bômbô si, wo ye bo te ko woñ;
a éyoñ ô mbôô si wo ye ke mbamba ôyo.
25Te ko woñ to'o na jame ya ko woñ
da so atemetem,
to'o mewosane bebo *abé éyoñe ma so.
26Amu Zambe a ye bo nyô ô too nye ndi
a a ye kaman abo dôé mfa'a ya ôlam ôse.
Zambe a botan e môt *a nye'e nyô mbok
(1Yo 3:16-18; Mink 24:19-20; Eza 3:10-11)
27Te bene mbamba jame ya bo
e be ba ba yiane nye,
éyoñ ô bili ngule ya bo nye bôt.
28Te jô môte mia nye mi too na:
kelek ô beta'a zu.
Nge na a akiti ma ye ve wo!
Eyoñ ô bili jôme ya ve nye.
29Te bôndé môte mbo'o mbia jam,
éyoñ a too wo fefele ne mieññ.
30Te jeñe môte mejô te na a te bo wo mbia jam.
31Te nyamete môt a n'évô,
a te tobe jia ya mezene mé.
32Amu Zambe a yen ékotekote môt mbia jôm,
ve nye'ane wé ô ne be bôt be ne zôsôô;
33biyo'é bi Zambe bi ne e ndaa môt a ne *nkpwala,
ve a botane ndaa bôt be ne *zôsôô.
34A nji bisi bekpwe'ele bôt
ve a mvamane ba ba suu bebiene si.
35Mimfefek mia ye nyoñe duma ane ngap,
ve mekute ki ma ye nyoñ ébiasé nnen ane ngap.
Bible en langue Bulu © L'Alliance Biblique du Cameroun, 2007, 2015.