Mink 2
2
Fek ja kaman mfa'a y'abé
(Mink 4:1-13; Yk 1.5)
1A mone wom nge wo nyoñ mejô mam
a nge wo ba'ale mebendé mam e be womien,
2nge wo tu'a kee alo mfa'a ya fek,
a nge wo vit nleme wôé mfa'a ya
nya mfasane mam,
3yaa, nge wo loon atyeñ
a bete tyiñe jôé mfa'a ya
nya mfasane mam,
4nge wo jeñe wô ane argent
a tu'a jeñe wô ane bidima bi biôm:
5éyoñe te wo ye wôk ajô ya ko Nti woñ
a wo ye yeme Zambe.
6Amu Nti nye a ve fek,
ñyemane mam, a nya mfasane mam
bia so anyu dé;
7e bôt be ne *zôsôô a naane be mefok,
a ne fe ében e be ba ba wulu *zôsôô,
8a kamane mezene me ne *zôsôô,
a kamane fe mezene ya *bebuni bé.
9Eyoñe te wo ye yeme zôsôô
a nya ntyi'ane mejôô,
mbamba mboon a mezene mese ma soo ébotan.
Fek ja nyii bôt
(Mink 4:13-27; 5:1-11)
10Amu fek ja ye zu wo nlem
a ñyemane mam wo ye bo mvaé ya nsisime wôé;
11mfasan wo ye ba'ale wo,
nya fe'e a ye lôñe wo nka'alé,
12asu ya kôté wo e zene y'abé
a kôté wo e be môt a kobô bikotekote bi mam,
13e be ba ba li'i mezene me ne zôsôô
a wulu e ma me ne dibi,
14mbe ba va'a mboon abé
a liti ava'a dab e mboon ékotekot,
15mbe bete mezene mab me ne bikotekot
a mimfaka miab minkot-minkot binyi'a-binyi'a;
16asu ya kôté wo e b'éza minga
a be minga bikuu a kobô élen,
17nye ate a li'i mvôé jé ya aso mongô;
a vuan élate Zambe wé;
18amu *nda jé ja lumbu awu,
a mimfaka mié mia ke bewu be né,
19teke wua ya ba ba ke be nye
a beta so a suan e mezene y'ényiñ.
20Nalé ate wo ye wulu e zene mbamba be bôt,
a ba'ale mezene ya bezôsôô be bôt.
21Amu bezôsôô be bôt mbe ba ye tabe e si jap,
e bôt be ne *zôsôô mbe ba ye li'i été;
22ve bôt be n'abé a melo ba ye kôlô été
a ba ye titane be.
Currently Selected:
Mink 2: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.