Nlb 36
36
Bengon ba nyoñe bilik be nji yiane ke meluk atane ya meyoñe map
(Nlb 27:1-11; Yas 17:3-4)
1Bivete menda me bôte ya mebum me bone be Galad, e mone Makir, e mone Manasé, ya mvô'ô Yôsep, bi nga zu a kobô asu Môze, benya bôtô a bivete ya menda me bôt me bone b'Israél na: 2Zambe a nga bendé *nti wome na, a kabe si mengap a mboon *asimba e be bone b'Israél. Nti wom a nga nyoñe fe abendé na, a ve e ngabe Selôfad monyañe wongan, e be bobebinga bé. 3Nge ba ke meluk e be monafame wua ya meyoñe mefe y'Israél, ngabe jap ja ye vas éli'i b'ésaa bangan a ke lat a ayoñ e ntoo éndap; éyoñe te ngabe jangan é nga zu e be bia a mboon *asimba ja ye sé'éban. 4A éyoñe mbu mevak wo ye so asu bone b'Israél, ngabe jap ja ye kô'ôlane nyô ya ayoñ e ntoo éndap a vas akabe ya ayoñe b'ésaa bangan.
5Nde Môze a nga kalane bone b'Israél mebendé Nti a nga ve na: 6Ayoñe bone be Yôsep da bele. Avale di nde Nti a bendé bengone be Selôfad: be ne fili ya lu'u môt ase ba kômbô luk ve da ba yiane ke meluk abume da ya ayoñ ésaa wop. 7Ngab éli'i éziñ ya bone b'Israél ja ye bo te kôlô ayoñe di a ke ayoñ afe, ve bone b'Israél ba ye timbi, môt ase a ngab éli'i ayoñe b'ésaa. 8Ngone minga ése é bili *ngab élik e meyoñe ya bone b'Israél, a ye lu'u môte ya abume bôt da ya ayoñ ésaa, éyoñe te bone b'Israél ba ye bi, môt ase, ngab éli'i ya b'ésaa. 9Teke ngab éli'i éziñ ja ye kôlô ayoñe di a ke ayoñ afe, ve *meyoñ y'Israél ma ye timbi, ayoñ ese, a éli'i jé.
10Ajô te bengone be Selôfad be nga bo avale Nti a nga bendé Môze, 11Mala, Tirsa, Ogla, Milka a Nôa, bengone be Selôfad, be nga lu'u bobefam e be bendômenyañe bap; 12be nga ke meluk e mebume me bone be Manasé, e mone Yôsep, a ngab éli'i jap é nga tabe ayoñe ya *nda abume bôt ésaa wop.
13Mebendé a minjôan Nti a nga ve Israél a anyu Môze e minje'ese ya Môab, bebé a Yordan, zôsôôô a Yérikô mbie le.
Currently Selected:
Nlb 36: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
