Mt 6
6
1Taba'ane ntyele ya bo mame ya ñyebe wônan asu bôte na be yene mia: mi za bo te nyoñe ma'an e be ésoo wônan a ne yôp. 2Eyoñe ñhe wo ve minzôzoé jôm, te loñe de toñ ôsu viôé avale bôte bebadu'u ba bo e meba me Zambe a e minjoñ asu duma da so be bôt. Ma jô mia de bebela na, be nyoñeya ma'ane map. 3Mfa'a wôé, éyoñe wo ve ngabe bingôngole bi bôt, mbo ngale wôé wo yiane dimi e jame mbo nnôme wôé wo bo, 4nalé ate ngab éngôngole môte jôé ja ye li'i *nsolane jam a ésoo wôé, nyô a yen asoé, a ye bulane wo je.
5Eyoñe mia ye'elan, te boon ane bôte bebadu'u mbe ba nye'e ba bo meye'elane map tetele meba me Zambe a ma'ane mezen, asu ya na bôt be yene be; ma jô mia de bebela na: Be nyoñeya ma'ane map. 6Mfa'a wôé, éyoñe wo kômbô ye'elan, nyi'in étune *nda jôé ja dañ asoé, fetek e *mbé wôé a angôñ a ye'ela'an ésoo wôé valé, asoé. A ésoo wôé, nyô a yen asoé, a ye yalane wo me.
7Eyoñe mia ye'elan, te bulane zezé bifia ane bikul; ba buni na ba ye nyoñ éyalan ya meye'elane map amu abui bifia. 8Te boon ane be, amu ésoo wônan *a yem e mam mia kômbô te na mi sili nye me.
Meye'elan me Nti
(Lk 11:2-4)
9Mia, ye'ela'ane ñhe ana:
A Esaa wongan ô ne yôp
jôé dôé e bo'o étyi,
10éjôé jôé é za'ak,
nkômbane wôé ô boba'ane si nyô
aval ane wo bobane yôp.
11Va'a bia den bidi bia yiane bia môse wu.
12Jamé'é bia *abé bi boya wo
ane bia fe bia jamé *abé bôt be boya bia.
13A te kee bia e *mebôbela'a été
ve kôté'é bia e be Mbia Môt.
Amu éjôé, ngu a étôtok bi ne émbiôé nnôm éto, Amén!
14Yaa, nge mia jamé bôt abe dap, ésoo wônan a ne yôbe fe a ye jamé mia; 15Ve nge mi nji jamé bôt, ésoo wônan a ne yôbe fe a ye bo te jamé mia *abé denan.
Ntyiane bidi
16Eyoñe mia tyi bidi, te boon éyôé asu ane bôte bebadu'u ba bo; ba bo mbot asu na be tu'a liti bôte na ba tyi bidi; ma jô mia bebela na be nyoñeya ma'ane map. 17Mfa'a wôé, éyoñe wo tyi bidi, woba'an ôlobinda e nlô a sôb asu dôé, 18nalé ate ô bo te liti bôte na wo tyi bidi, ve ésoo étam nyô a ne asoé valé; a ésoo nyô a yen asoé, a ye ya'ane wo wô.
Tôka'an akum e yôp
(Lk 12:33-34)
19Te tôkan miabebien akum e *si nyô, e vôme fos ja di a ndamane biôm, a miñwuwup mia tube menda a wup. 20Ve mi tôka'ane miabebien akum e yôp e vôme fos é nji di a ndaman a miñwuwup te tube menda a wup. 21Amu e vôm a nee wo akum vôm ate fe e nleme wôé ô né.
Lambe ya nyôle jôé
22Lambe ya nyôl a ne dis. Nge dise dôé é ne ñhe *mvo'é, nyôle jôé ngumba ja ye bo éfufub été. 23Ve nge dise da kon, nyôle jôé ngumba ja ye bo e dibi été. Nge éfufup é ne be wo é ne ñhe dibi, kô fé dibi ébien da ye bo anen!
Nge Zambe nge mamoñ
(Lk 16:13)
24Te ke môt a ne saane bemasa bebaé, a ye vini wua *a nye'e nyô mbok, nge na a ye kabetane wua a biasé nyô mbok. Mi se nguleya saane Zambe baa *mamoñ.
Te tyelane minleme yôp
(Lk 12:22-31)
25Ajô te ma jô mia na: Te tyelane minleme yôp asu ényiñe jenan ajô jôm mia ye di, nge asu menyôle menan ajô jôme mia ye jaé. Ye ényiñ é nji dañe bidi, nyôle ki a dañe ngômesan' 26Fomba'an anone ya yôp: é nji bé nge kôane mvoñ, teke ke yoé je mengun, a ésoo wônan a ne e yôp a ve de bidi! Ye mi nji dañe de beta ndañan' 27A za ya be mia, amu a tyelé nleme yôp, a ne nguleya limiti ényiñe jé ve mon abim étam' 28Amu jé mia yiane tyelé minleme yôp ajô ngômesan? Tama fombane mesame ya mefup ane ma yaé, teke wu njuk nge tiñe biôm, 29a ma jô mia de na, Solômon émien, étôto'o jé ése été, a nji jaé ngômesan ane jia y'été! 30Nge Zambe a jalé élo'o ya mefup ngômesane nalé, nje é ne valé den, v'akiti ja ye wuaban!
31Nde ñhe te tyelane minleme yôp mi jô'ô na: Bia ye di jé? Bia ye nyu jé? Bia ye jaé jé' 32Mam mete mese, bikuu bia jeñe bie teke awo'on, ve ésoo wônan a ne yôp a yeme na mia yi biôme bite bise, 33Tata'a jeñan éjôé a *zôsôô Zambe, a biôm bite bise bia ye vebane mia abet. 34Ajô te te tyelane minleme yôp asu akiti; akiti da ye yep ajô da fombô ebien. Môs ôse ô bili abime nju'u dé.
Currently Selected:
Mt 6: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.