Mt 12
12
Beyé'é ba wondé fese ya di
(Mk 2:23-28; Lk 6:1-5)
1Melu mete, Yésus a lôte mefube me fôn e môse Sabat. Beyé'é béé be nga wô'ô zaé a taté na ba buk a di je. 2Eyoñe Befarizieñ be yeneya jame te be nye na: Yenek, ane beyé'é bôé ba bo jam é nji bo nkañesane ya boban e môse Sabat. 3A nga yalane be na: Ye mi nji lañe jame David a nga bo, éyoñ a nga wô'ô zaé, émien a bôte ya nsamba wé, 4ane a nga nyiin e *nda Zambe, ane be nga di belet ya mimvean, nje éte, to'o émien, to'o bôte ya nsamba wé be nji bi ngule ya di, vengevenge ve betuni' 5Nge na, ye mi nji lañ e kalate metiñe na: E môse Sabat e *nda Zambe été, betuni ba tyam étyi ya Sabat, nalé te lañebane be ane ékop' 6Ve me ma kate mia na ndañe *nda Zambe a ne va. 7Nge mi too yem atinane ya ajô di: Nkoon éngôngo ñwô ma yi sake étyi'a metuna'a, mi nji ye ve bôte ba mekua mbe be nji bo ékob été, 8amu Mona Môt a ne njôô Sabat.
Yésus a saé môte wo e môse Sabat
(Mk 3:1-5; Lk 6:6-11)
9Akôlô ya valé, a nga ke mfa'a ya *aba Zambe dap a nyiin été! 10Nde môt éziñ a mbe valé wo ñyemelan; be ve sili nye nsili wu na: Ye e ne nkañesane ya saé môt e môse Sabat? Nalé a mbe asu ya bo'olô nye. 11Ve a nga yalane be na: Za ya be mia, nge a bili ve ntômba wua, wô ve ku ébé été e môse Sabat, a ye bo teke nyoñe wô a dutu wô ébé' 12Kô fé môt a dañe ntômba! Ajô te ñhe e ne nkañesane ya bo mvaé e môse Sabat. 13Nde a jô môt ate na: Same wo. Ane a nga same wô a ô nga bulane bo *mvo'é ane wu ôvok. 14Befarizieñ, nné ane be nga kui atan, be nga tebe éso'o ya jeñ ane be ne bo na a wu.
Mbo ésaé wom nye nyô
15Eyoñe Yésus a wô'ôya de, ane a nga kôlô valé. Abui bôt e nga tôñe nye; a nga saé be bese. 16A nga bendé be a ayo'o ese na be bo te bo na bôt be yeme nye, 17nalé ate jame *nkulu mejô Ezayi a nga jô da ye tôébane na:
18Mbo ésaé wom me nga top nye nyô,
nyô ma dañe nye'e me nga yene mvaé ya top,
ma ye futi e nsisime wom e be nye,
a a ye kate foé metiñ e be *meyoñ me bôt.
19A ye bo te jeñe mintañete, a ye bo te
yôtane *tyiñ,
tyiñe jé ja ye bo te wô'é minseñ.
20A ye bo te bu'u nden é maneya tya'é,
nge dime nsañ ô ngenan ô kui ôtita
akekui a wuluya metiñ a kui ndañan.
21Meyoñ me bôt ma ye futi ndi minleme jap
e be jôé déé.
Yésus baa Bélzébul
(Mk 3:22-30; Lk 11:14-23; 12:10)
22Nde be nga zuu nye môt a bili mbia *nsisim, ndindim te kobô; a nga saé nye a kui na mvumvuk ô kobô a a yen. 23Jama bôt a mbe a jô'ôk, fe'e ne vema na: Ye nyôna a se mona David' 24Ve Befarizieñ, éyoñ be wô'ôya jame te be nga jô na: Nyôna a vaa mimbia minsisim ve a ngule Bélzébul, évete mimbia minsisim.
25Eyoñ a yemeya asimesane dap, a nga jô be na: Ejôé ése ja salé a wosan ébien ja ye tyamban; teke tison nge *nda bôt ja salé a wosan ébien ja ye tabe. 26Nge Satan a titane Satan, a saléya zañ a wosan émien: éjôé jé é ne nguleya tabe aya' 27A nge a ngule Bélzébul nje ma ma vaa mimbia minsisim, beyé'é benan be ba vaa mie a ngule za? Bebien ba ye bo betyi'i mejô benan. 28Ve nge ma vaa mimbia minsisim a ngule Nsisime Zambe, yemane ñhe na éjôé Zambe é kuiya be mia. 29Nge na: Môt éziñ a ne nguleya nyiin e ndaa ngungule môt aya a mane nyoñ akume dé, nge a nji taté mane ka'a ngungule môt? A su'ulane zu sa *nda jé. 30Nyô bia nye bi nji bo nsamba a wosane ma, a nyô bia nye bi nji kôan a tyamelan.
31Ajô te ma jô mia na: *abé ese a nkobô ébiasé ôse wo ye jamban e be bôt ve nkobô ébiasé mfa'a Nsisim wo ye bo te jamban. 32A nge môt éziñ a kobô mona môt *abé jame te da ye jambane nye, ve nge a kobô Mfufube Nsisim *abé, jame te da ye bo te jambane nye nge émo ji nge émo ja zu.
Môt a kobô mam ma so nlem
(Mt 7:16-17; Lk 6:44-45)
33Ve'ane fe'e na élé é ne mbamba élé: ébuma jé ja ye bo abeñ; ve ve'ane fe'e na ja kon: ébuma jé ja ye kon: ébuma jé ja bo na be yem ane élé é né. 34A mvoñe mekpwe, mi ne jô mbamba be mam aya mi too mbia be bôt? Amu jam anyu da jô e ne di da fuluku *nlem. 35Mbamba môt a nyoñe mbamba be biôm e mbamba mefo'o mé été; mbia môt a nyoñe mbia be biôm e mbia mefo'o mé été. 36Ve ma jô mia na: bôt ba ye bo sito'o ya minsose mise be nga kobô e môse ntyi'ane mejô. 37Amu *minkobô miôé mmie mia ye kale wo a *minkobô miôé fe mia ye kpwé wo.
Ndeme Yôna
(Mt 16:11-12; Mk 8:11-12; Lk 11:29-32)
38Eyoñe te *beyeme bekalate a Befarizieñ b'éziñ be nga nyoñe nkobô na: A Nye'ele, bia kômbô na ô liti bia ndem éziñ. 39A nga yalane be na: A mia bôt ô ne *abé a *mejian wo sili ndem! Mfa'a ajô ndem, fe ja ye bo te veban, ve ndeme *nkulu mejô Yôna. 40Amu avale Yôna a nga tabe abume kos été môse milaa a melu melaa, nalé mona môt a ye tabe si été môse milaa a melu melaa. 41Eyoñe ntyi'ane mejô, bôte ya Ninive ba ye tebe a miaé wu a ve wô mekua, amu be nga kôñelane minlem nkatane foé Yôna; yaa! Jame da dañe Yôna e ne va. 42Eyoñe ntyi'ane mejô, njô bôte ya jôbe da dim a ye tebe a bôte ya miaé wu a ve be mekua amu a nga so aku'u si asu ya zu wô'ô fe'e Solômon; yaa! Môt a dañe Solômon a ne va.
Mbia *nsisim a beta so
(Lk 11:24-26)
43Eyoñe *nsisim ô ne mvit ô kôlôya be môt, ô nga ke wo vôm e bifuse bi si bi bi ne ayet asu ya jeñ awo'on, ve teke yen. 44Eyoñe te wo jô ôbiene na: Ma zu bulan e *nda jam, e vôme me nga so. Nkuane wé, ve koone je teke môt, mvosan, nkôman. 45Eyoñe te a ke nyoñe minsisime mife mi ne mvit a dañ ôbien zamgbwa, be nyiin a tabe été. Asu'ulane môt ate da zu bo *abé a dañe di ôsu. Nalé ate fe da ye kui e be miaé bôt ô ne *abé wu.
Beza be ne *nda bôte Yésus
(Mk 3:31-35; Lk 8:19-21)
46A ngenan a kobô'ô a ba bôtô nalé, e teme na nyia a bobenyañ be ntele atan, be jeñe na be kobô nye. 47Nde môt éziñ a jô nye na: Tame yen, nyua a ésoo be tele atan, be jeñe na be laane wo. 48Yésus a nga yalane môt a ndôme kobô nye na: Za a ne nyia wom a beza be ne bobejañ' 49Ve liti beyé'é béé a wo nye na: Nyia wom a bobejañ mbe ba; 50Nyô ase a bo nkômban ésaa wom a ne yôp, nye a ne mojañ, kale jam a nyia wom.
Currently Selected:
Mt 12: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.