Lk 1
1
1Amu bôt abui be nga bo ésaé ya tili nkañete ya mam me nga bobane be bia, 2aval ane mam mete me né e mme bengaa y'atata'a be nga yen, be bobane bebo bisaé y'ajô Zambe a kalane bia me; 3Ma fe, a Monti Téôfil, éyoñe me tu'aya mane yemelane mam mese ataté metata'a, me nga yene mvaé ya tili nkañete ô ne mbamba nta'an asu dôé, 4ndembene wo ye bo nguleya buni miñye'elan ô nga nyoñ.
Nkatane foé abialé Yôanes Babtist
(Bm 13:12; 1S 1)
5Melu Hérôde a nga too njô bôt e Yudé, *ntuni éziñ a mbe jôé na Zakari, a too e nsamba betuni Abia; minga wé a mbe mvoñe bôte Aron, jôé na Elizabet. 6Bebaane bese be mbe *zôsôô asu Zambe a be mbe be tôñôk mebendé a minjôane mi Nti bise teke bijô. 7Ve be nji bi mon amu Elizabet a mbe nkôkôm a bebaane bese be ntoo minnôm.
8Eyoñe mboon ésaé asu Zambe ô nga kpwaane Zakari, ane nta'ane ya nsamba betuni wé ô nga liti; 9avale fulu ésaé betuni é né, *asimba e nga liti na e nye a yiane ve ôtu e *nda Nti é ne étyi été. 10Jama bôt ase a mbe meye'elan été atan, awolo mvean ôtu.
11Engele Nti a nga yené be nye a tele e mbo nnôm ata'a metuna'a ôtu. 12Ñyenan a nga yene nye, Zakari a nga bo fe'e ne vema, a woñ ô nga bi nye. 13Ve éngel a nga jô nye na: a Zakari, te ko woñ, amu Zambe a yalaneya meye'elane môé. Minga wôé Elizabet a ye biaé monafam a wo ye yôlé nye jôé na: Yôanes #1:13 Yôanes: Jôé te da tinane na Zambe a mvaman. Mone nyô a ne ndem ôsu ya nsoone Mesi.
14Wo ye vak a fôn amu nye, a ézu'u bôt ja ye vak amu abialé dé. 15Amu a ye bo beta môt asu Nti; a ye bo te nyu woon nge ényunyui be nga jini a a ye jaé ne lut a Mfufube Nsisim aso abume nyia wé. 16A ye bulan abui bone b'Israél e be Nti e Zambe wop; 17a ye wulu ôsu e mise me Zambe si a *nsisim a e ngul Elie, asu ya bulane minleme b'ésaa e be bone bap a ya'ale beenlô abéé na be fas ane bezôsôô be bôt nalé ate a ye kôm ayoñe bôt e ne nkômesan asu Nti! 18Zakari a nga jô éngele na: Ma ye yeme jame te a jé? Amu me ntoo nnôme môt a e minga wome ke abui mimbu. 19Engele a nga yalane nye na: Me ne Gabriél me tele asu Zambe. Me nga lômban asu ya kobô wo a kate wo e mbamba foé nyô. 20Yaa, wo ye ku mvuk a wo ye bo te nguleya beta kobô a kui e môse jame te da ye boban, amu ô nji buni mejô mam e mme ma ye tôéban éyoñe jap. 21Bôt be mbe be yange'e Zakari a be mbe be kamek na a langan e *nda Zambe été. 22Eyoñ a nga kui atan, a mbe te nguleya kobô be a be nga yeme na a nga yen ébubua éziñ e *nda Zambe été; a mbe a bo'o be mendem a mo, a too mvuk. 23Eyoñe mboon ésaé wé ô nga man, a nga bulane jale dé. 24Mvus éte, Elizabet a nga nyoñ abum; a nga solé de ngon étan; a mbe a jô'ô émiene na: 25Jame Nti a boya ma nde di, éyoñ a nga wua mise mé be ma, asu ya telé jam e mbe e va'a ma ôson e mise me bôte na e man.
Nkatane foé abialé Yésus
(Mt 1:18-23; Eza 7:14)
26E ngone Saman, Zambe a nga lôm éngele Gabriél e tison éziñ ya Galilé jôé na Nazarét, 27e be ngone minga é nga bili *atiñ aluk a fam jôé na Yôsep, e mvoñe bôte David; ngone minga é mbe jôé na Marie. 28Engele a nga nyiine be nye a jô nye na: Va'ak, a wo ô bili Mvame Zambe, mia Nti mi ne! 29A nga bo fek ne vema amu mejô mete, a sili'i émien atinane ya mebatane mete. 30Ane éngele a nga jô nye na: Te ko woñ a Marie, amu ô biya ma'a be Zambe. 31Tame yene na wo zu nyoñ abum, wo ye biaé monafam, wo ye yôlé nye jôé na Yésus. 32A ye bo beta môt a ba ye loone nye na e Mone Nyô a dañ ôyabe yôp. Nti, nyô a ne Zambe, a ye ve nye éto njôane David ésaa wé; 33a ye jôô *nda bôte Yakob nnôm éto, a e njôane wé wo ye bo teke man. 34Ane Marie a nga jô éngele na: Jame te ebien da ye boban aya, amu me ngenane te yeme fam? #1:34 Te yeme fam: Marie baa Yôsep be ngenane te fulan; nalé a ne na Marie a ngenan éndun; ve nalé a nji bo na Marie a jô na aa ye ke fulane fam *môs éziñ. 35Engele a nga yalane nye na:
Mfufube Nsisim a ye zu be wo
a e ngule Nyô a ne ôyabe yôp
ja ye buti wo éjijine jé si,
ajô te nyô a ye bialé a ye bo étyi, #1:35 Yésus e mon a ye bialé a ye wô'ane fo'o ve a Zambe. A ne e mone Zambe.
a ye lobane na e Mone Zambe.
36Tame yen Elizabet, évuvumane jôé, nye fe a ntoo abume monafam éto nnôme jé été, e ngon ébiene nyô é ne nye nyô Saman, e nyô be mbe be lo'one nkôkôm. 37Amu e mfa'a Zambe teke jôm é ne kate boban. 38Marie nye na: Ke me ne e mbo ésaé Nti a ne minga, mam mese me boba'ane fo'o ma aval ô maneya jô. Ane éngele a nga kôlô be nye.
Marie a ke jom Elizabet
(1S 2:1-10; Sam 113)
39Melu méte, Marie a nga ji'a kôlô a ke e si minkô, e tison éziñe ya Yuda. 40A nga nyiin e *nda Zakari a batan Elizabet. 41E nga bobane na éyoñe Elizabet a nga wô'ô mebatane me Marie, mon a nga san abume dé a Elizabet a nga jaé a Mfufube Nsisim. 42A nga bôé beta ñyôn a jô na: Ô ne ébotan a dañe binga bese! Ebuma ya abume dôé fe é ne ébotan! 43Da vebane be ma aya na Nyia Nti wom a zu be ma' 44Amu éyoñe mebatane môé ma te wô'é melo mam, e nde mon a te sane ma abum. 45Mvom é bo'o be nyô a nga buni: e jam e nga jôbane be nye e so'o be Nti da ye boban! 46E nde Marie a nga jô na:
E nleme wom wo kañe Nti
47a nsisime wom ô ne njalan a mefôn
amu Zambe Nyii wom,
48amu a nga kee mise méé
e be mbo ésaé wé a ne minga
a suu émiene si.
Ajô te ataté éyoñe ji,
miaé mi bôte mise mia ye yôtane na
me ne mvom.
49Amu na e Nyô a ne ngul ése
a boya ma beta be mam,
e jôé dé e ne étyi.
50E nde fe na e nleme mvame wé
wo ke e be ba bese ba ko nye woñ
ataté miaé bôte wu a kui miaé bôte wu.
51A nga litiban a e ngul ése ya wo wé;
a nga tyamelan e bôt be bili ôsimesane mebun e *nlem.
52A nga wua mingungu
e bito minjôane biabe si.
Ayôme bôt e nde a viane bete yôp.
53A nga jalé bewô'ô zaé akum,
a viane ke suu minkukum teke jôme mo.
54A nga zu volô Israél, mbo ésaé wé,
amu a nga simesane mbaa nleme wé,
55aval a nga kobô beésa bangan,
asu Abraham a e mvoñe bôte jé,
akekui nnôm éto.
56Marie a nga tabe valé baa Elizabet
bebé ngon élaa, mvus éte,
a nga bulan e jale dé.
Abialé Yôanes Babtist
(Lk 2:25-32; Lk 1:13-17, Lk 3:4-9)
57Mbôl éyoñe Elizabet a nga yiane biaé é nga kpwaan, e nde a nga biaé monafam. 58Awô'ô bôte ba bômane nye a bivuvuman be nga wô'ô na Nti a jaléya nye a mvame jé, be nga vak a nye. 59Eyoñe môse muam ô kuiya, e nde be nga zu asu ntyi'an atyele mon a be nga kômbô yôlé nye e jôé ésaa na: Zakari. 60Nyia nye na: Momo! A ye lobane na Yôanes. 61Be nye na: Teke môt éziñe ya bivuvumane biôé a be'e jôé te. 62Be nga kobô ésaa a mve'elan mam a mo, be sili'i nye na: be yôlé mone jôé na za' 63E nde a sili mon akok a tili bifia bina été na: Jôé dé e ne Yôanes; ane bese be nga kam. 64Awolo te ebien, anyu dé a ôyame vié bi nga bo *mvo'é: a kobô'ô, a va'a Zambe akéva. 65Ane woñ ô nga bi e ba bese be nga too mefôla ma bôman mete; e si minkôl ése ya Yudé, be mbe be kobô'ô ajô ya mam mete mese.
66E bôte bese be nga wô'ôtane me, be nga kpwele me e minleme miap; be kele ba silane na: Mone nyô a ye ñhe bo avale mon avé? A bebela na wo Zambe ô mbe a nye.
Jia Zakari
67Esaa wé, Zakari, a mbe njalan a Mfufube Nsisim, a nga kulu mejô a jô'ô na:
68E Nti, e Zambe Israél a bo'o ébotan,
amu a zuya jome bôte bé a tôé nkôtane wé;
69a nga bo na ngungule Nyii bôt
ô bialé bia e *nda bôte David e mbo ésaé wé.
70E nne a nga kate foé nalé
anyu mimfufube bekulu mejô béé ya kôba:
71Nyian wo kôté bia e be besiñe bangan a
e mo ba bese ba vini bia.
72A nga liti mvame jé e be b'ésaa bangan
*a simesan e mfufub élate wé
73e ngana a nga kan Abraham ésaa wongan na:
a ye ve bia afôla ya kañe nye woñe momo,
74éyoñ a maneya wôlé bia e mo besiñe bangan,
75e mbunan été a e *zôsôô été,
émien a fombô'ô bia, nté ôse bi vee.
76E mfa'a wôé, a mone mon,
wo ye lobane na nkulu Mejô Nyô a dañ ôyabe yôp, amu wo ye wulu ôsu, e mise me Nti,
asu ya kôme mezene mé,
77asu ya ve bôte béé ñyemane ya nyian wo so
amu njamane mam *abé.
78Jame te da so édo'o mbamba nleme Zambe wongan:
Amu édo'o mbamba nleme te nje
ôteté ya jôbe da tôô ô zuya jome bia
ô so'o yôp.
79Oteté ôte ô nga yené
e be ba be nee dibi a
e nsisiñ awu été,
asu ya ya'ale medaa mebo mangan
e zene *mvo'é été.
80Mfa'a mongô, a nga yaé
a nsisime wé ô nga yeme ngu;
a nga too e mevôme bôt be nji tabe
akekui e *môs a nga litiban e be Israél.
Currently Selected:
Lk 1: BDCB
Highlight
Share
Compare
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
