Nk 35

1Ane Môze a nga sulan bôt bese ya Israél a jô be na: Avale di nde Nti a nga bendé na bi bo: 2Bia ye bo bisaé tañe melu mesaman; ve môse zamgbwale, wo ye bo mia wu ô ne étyi, môse Sabat, môse ya abôk asu Nti. Môt ase a ye bo ésaé éziñ *môs ôte a ye wôéban. 3Mia ye bo te kôban nduan e vôm éziñ ya bitaba'a bienan e môse *sabat.

4Ane Môze a nga kobô ékôan bôt ése ya Israél a jô na: Avale di nde Nti a nga bendé na: 5Nyoñan, asu Nti ngap éziñ ya biôm mi bili môt ase a ne *nlem ésôs a ye zuu mvean a nga nyoñe te asu Nti: Mvot, silba, mvot; 6bindélé bi ne blum, mfô a évele, nya ndomboo a mimvot bikela; 7bikôb beyôme mintômba nduban bivele, bikôb bi tit bife bia dañe ngu; bilé bi asé; 8mbon asu éfufup; meyemete bilé me ne mbamba menyum a mbon ba wo'o bôt éyoñ ba telé bôt bito a ôlobinda ba di'i. 9Meko'o me ôniks a mefe me ne édima asu éfôd a ébuta'a tôé. 10Bôte bese ya be mia be ne mintyetyeñ ba yiane zu bo biôm bise Nti a nga bendé: 11Tabernakel, *nda éndelé jé a biôm bise bia buti je, akobe dé, mebame mé, a biba'a bié, a mekône mé, a metiñe mé; 12éwolo a mimbôñ ya été a bisua bise, vôm ya ndôba'an a éndélé ya zañ ja kandé vôm ane étyi a vôm a dañedañe étyi, 13tebele, mimbôñ mié, biôm mebelan bié bise, a belet awôm a ébaé ja tabe *tabernakel été a taté sabate nyô a kui nyô mbok. 14Ebi bifufup a biôm mebelan bié: Belambe a mbon, 15Ata'a metuna'a mimbon mi ne mbamba menyum, a mimbon ya été, mbon ba wo'o bôt éyoñ ya ntelan bito a ôlobinda asu étyita'a, éyé é tyele anyiine tabernakel; 16Ata'a metuna'a asu mimvean mi ne ngumba, *mbé mvote wé, mimbôñe mié a biôm mebelane bié; fandé a tine jé. 17Bindélé asu nseñ, mekône mé, metine mé a éyé ya *mbé ya nseñ; 18mekôn ya *tabernakel, mekôn ya nseñ a minkol miap mise; 19mimbot asu mboone ésaé vôm a ne étyi; biôm ya jaé bi ne étyi asu Aron Ntuni nnen a biôm ya jaé asu *bon ba bo ésaé betuni.

20Ane bôte bese ya Israél be nga kôlô vôm Môze a nga too. 21Ba bese be nga bili minlem mi ne ésôs be nga zu ve Nti mimvean mi so'o biôm be bili mfa'a ya lôñe *nda éndélé ya ndôba'ane, a mfa'a ésaé ése ya été a biôm ba jaé bi ne étyi. 22Befam a binga bese be nga zu; nyô ase a nga bili *nlem ésôs a nga soo émvongo, akom, élondo, nsañga, mevale me biôm mese me ne mboon a mvot. Avale te fe fam ése é nga bo jam éziñ ya ve Nti mvot. 23Ba bese be nga bili biyé bi too nyôle blum, mfô a évele, nya ndomboo a mimvote bikela, bikôb beyôm mintômba a betite befe bi ne afip be nga zuu bie. 24Ba bese be nga ve ngab éziñ ya silba a mvot asu Nti, be nga zuu mvean ôte. Ba bese be nga bili bilé bi asé be nga zuu bie asu ya kôm biôm bise ya nkañan. 25Binga bese be mbe atyeñ ôtiñ be nga tiñ a mo map, a zuu biyé be nga tiñ bi too nyôle blum, mfô a évele a nya ndomboo. 26Binga bese be nga bili mbamba minlem ya bo jam, be too fe atyeñ mo, be nga tiñ mimvot bikela. 27Mintômba ya ayoñ mi nga soo meko'o me ôniks me fe asu éfôd a ébuta'a ya tôé. 28Nalé fe bityita'a a mbon, ébi bifufup, ñwo'on bôt ba nyoñ bito a ôlobinda a ne mbamba menyum. 29Bôte bese ya Israél, befam a binga, ba bese be mbe minlem ésôs ya nyoñe ngab ésaé Nti a nga bendé a Môze na é boban, be nga zuu mimvean ane *nlem wo kômbô be Nti.

30Ane Môze a nga jô bôt ya Israél na: Nti a maneya top Betsalél, mona Uri, ndaé Ur, *nda bôte Yuda. 31Zambe a jalé ya nye a *nsisim ya fek, atyeñ a nyeman mboone mevale bisaé mese, 32mfa'a ya bôndé mbamba bisaé ya kôme biôm a mvot, silba a mvot, 33mfa'a ya meko'o me ne édima be ne belane me, mfa'a ya kpwelé bilé a bo mevale me biôm mese ma sili atyeñ. 34A veya fe nye Ohôliab mona Ayisamak ya mvoñ bôte Dañ ngume mvean ya ye'ele bôte befe atyeñe mboone dap. 35A jalé be a atyeñ ya yeme bo biôm bia sili nkpwelan a bi bia sili atyeñ ya mo mfa'a ya ntiñan a nlatan biyé bi ne blum, mfô, évele a nya ndomboo, nalé fe mfa'a ya mbôndan mefe'e ya mevale mesu bisaé mese.

Currently Selected:

Nk 35: BDCB

Highlight

Copy