Est 7
7
Minjuk a awu Aman
(Est 5:7-14; Sam 37:12-15,32-36)
1Ane njô bôt ba Aman be nga ke di be Esthe nga njô bôt éyoñe baa. 2Eyoñe ndian ô maneya, njô bôt a nga beta jô Esthe na: Wo kômbô sili jé? Me ne nkômesane ya bo minkômbane miôé a ve wo ja'ane éfase ya si ma jôô je. 3Esthe, nga njô bôt, a nga yalane na: A njô bôt nge me yeneya *mvam be wo a nge wo yene nalé mvaé, nsili wom ñwô wu: kañese'e nyii ayoñe bôte dam a mamien, nkômbane wom ma kômbô na ô kañese ñwô le. 4Amu be kuaneya bia, ma a ayoñe bôte dame na be jian, be wôé a mane bia, éngôngole momo! Jam afe na nge be too ye kuane bia, befam a binga ane belo, me nga ye tab? évô, ve nsiñ a bo jame di a nji vek abim *abé a bo njô bôt.
5Nde njô bôt Asuérus a nyoñe nkobô a jô Esthe nga njô bôte na: Môt ate a ne za, a a ne vé nyô *nlem ô ne njalan a avale minsimesane te' 6Esthe a nga yalane na: Môte ya ngame yat a nsiñ a ne Aman, mbia môt ate! Eyoñe te Aman a nga su'ulan asu njô bôt ba nga. 7Njô bôt, e ñyaan été, ve kôlô ndian éza éyoñ a ke afube ya *nda njô bôt. Nde Aman a nga yeme na njô bôt a tyi'iya awu dé, nde a nga li'i a ye'elan Esthe nga njô bôte na a nyii nye. 8A nga ku énoñe y'aba *nda vôme Esthe a nga too. Eyoñe te njô bôt a nga so afub a zu *nda ndian. Nde a yôtan a jô na: Ye jôme ji ja kômbô fe jô'ôbô nga njô bôt *nda jé été mise mam me lôô? Ve nné ane njô bôt a nga tote bifia bite bebo bisaé bé be nji fe yange ve buti Aman asu. 9Arbôna, wua ya beba'ale a nga jô njô bôt a too na: A njô bôt, Aman émien a te kôm élé ba tyelé bôt asu ya tyelé Mardôsé e môte nkañete wé ô nga nyii wo. Elé te é tele e nseñe *nda Aman é ne nkôñ yôb tañe méta mewôm mebaé a zamgbwa. Nde njô bôt a bendé na be tyelé Aman élé te yôp. 10Nde be nga tyelé Aman élé a nga kôm asu Mardôsé. Eyoñe te nleme njô bôt ô nga voé.
Bible en langue Bulu © L'Alliance Biblique du Cameroun, 2007, 2015.