Est 4
4
Mardôsé a sili Esthe na a volô
(2 Bb 19:1-4; 2 Minkte 20:3-4; Esd 8:21-23)
1Eyoñe Mardôsé a nga yem jam ese da lôtan, a nga nyabe mengômesane mé, ve jaé nkuta a woban asub a bômane ki tison, a kele a yône ñyône mintaé. 2Eyoñ a nga kui ôsu ya *nda njô bôt, a nga tebe, amu môt éziñ a nji bi ngule ya nyiin été a be'e mengômesane meyep. 3E mebôta mese y'éjôé, vôm atiñe njô bôt e nga kateban, Beyude be mbe ve miñyôn: be nga tyi bidi, be nga kuli mili'i mis a yôn; abui ya be be e nga jaé mengômesane meyep a bômbô asub été.
4Bengo be binga be mbe be saane Esthe a beba'ale bé be nga zu kate nye jam be nga yen, a a nga dañe ko woñ. A nga lôme Mardôsé mengômesane na a vaa ma meyep, ve a nga ben. 5Nde Esthe a nga loone Atak, wua ya beba'ale njô bôt a nga ve na be saane nye, a lôme nye a sili Mardôsé jam da lôt a amu jé a bo avale te. 6Nalé ate Atak a nga ke be Mardôsé e beta nseñ ya tison, ñwô ô mbe *mbé yôb anyiine *nda njô bôt. 7Nde Mardôsé a nga kate nye mam ma lôtan; a nga dañe kobô nye ajô moné y'Aman a nga tiñeti na a ye futi e nkobe njô bôt nge ba wôé Beyude bese. 8A nga ve nye ntilan y'atiñ e nga katebane Suz asu ya jiane Beyude. Mardôsé a nga jô Atak na a kate Esthe jam e né a liti fe nye ntilane te; Atak a ye'elane fe Esthe na a ke be njô bôt a sili nkoon éngôngole wé a suñe fe ajô y'ayoñe dé. 9Atak a nga zu kate Esthe nkobô Mardôsé. 10Esthe a nga kobô Atak a kate Mardôsé na: 11Bebo bisaé be njô bôte bese a bôte ya mebôta m'éjôé ba yem atiñe na: Môt ase, fam nge minga, a nyiine be njô bôt mfa'a nseñe y'été te na a bili nloon, ba ye wôé nye aval? atiñ e né be bôte bese; môt a ne nyiñ ve nyô njô bôt a same ntume or wé. Ve ma me nji bi nloone ya ke be njô bôt den a ntoo melu mewôm mela. 12Nde be nga kate Mardôsé éyalan Esthe.
13Ane Mardôsé a nga lôme bôt be kate Esthe na: Te buni be womien été na ô ne ngule ya fam étam mfa'a ya jam da yange Beyude, amu na ô too e *nda njô bôt. 14Nge wo bene bo jam éziñ éyoñe ji, mvolan wo ye so Beyude vôme mfe a ba ye nyiiban. Ve wo wo ye wu a *nda bôte jôé ja ye man. Ve za *a yem, ndô'ôtô na ô nga tobane bo nga njô bôt amu avale été di. 15Ane Esthe a nga lôme Mardôsé foé nyôna na: 16Kele sulane Beyude bese be too Suz, mi bômbô zaé amu ajô dam. Te diane bidi nge nyu jôm éziñ tañe môse mila a melu mela. Avale te fe bebo bisaé be binga bam a mamien bia ye bo. Eyoñe te ma ye ke be njô bôt akôsa bo na nalé a wosan *atiñ, a nge ma yiane wu, ma ye wu! 17Nde Mardôsé a nga ke a bo avale Esthe a nga bendé nye.
Bible en langue Bulu © L'Alliance Biblique du Cameroun, 2007, 2015.