Mm 26
26
Paul a kobô asu Agripa
(Mt 10:18-20; Mm 9:1-30; 22:1-21; 1Pi 2:12)
1Ane Agripa a nga jô Paul na: Ô bili nkañesane ya kobô ajô dôé! Wôna Paul a nga bete wo a kate mame ba bo'olô nye a jô na: 2Ma yene mvaé a njô bôt Agripa na, môse wu, me kate mame mese Beyude ba bo'olô ma asu dôé. 3Amu womien wo yem metume map a mejô map. Ajô te ma ye'elane wo na ô vô'ôlô ma a mbamba *nlem.
4Enyiñe jam me nga nyiñ aso mongô, ézezañ ayoñe dam e Yérusalém, Beyude bese ba yeme je. 5Ba yem aso ayap, bebien be ne bengaa nge ba kômbô, na me nga tôñ metiñe ya mbunan wongan ne titi, aval ane mone Befarizieñ. 6E môse wu, nge me tele *nda mejô, e ne ve amu ndi nleme ya ngaka'a Zambe a nga ka'a beésa bangan. 7Ndi minlem éte nje meyoñe mangan awôm a mebaé ma yange éyoñ ése, ba bo mbane ya bo bisulan alu baa *môs, te jô'é. Ajô ndi nleme éte, a njô bôt, e nde Beyude ba bo'olô ma. 8Amu jé, e zañe jenan, be nji buni na Zambe a ne wômôlô miñwuan'
9Mfa'a wom, me nga tyi'i fo'o na, ma yiane wosane jôé Yésus ya Nazarét mezene mese. 10A nalé fe nye me nga bo Yérusalém, mamien me nga futi abui mimfufup mi bôte mimbôk, a ngule betuni benen be nga ve ma. Eyoñ be nga wôé be, me nga nyoñe mese'esa'a. 11Me nga ke meba me Zambe mese ya Beyude. Me nga ke ôsu a bo mame mevale meval. Me nga tindi be, be biasé *zen éte. A me nga dañe bo *abé éyoñ me nga dañe minné, a ke éza bitison.
12Nalé ate me nga ke *môs éziñe Damas, a ngule njôane ya betuni benen, nlômane ya ke bo ngumba ésaé. 13Me too *zen, a njô bôt, bebé zañe *môs, me nga yen éfufup é so'o yôp, a dañe ji jôp. A é nga bômane ma, a bôte bia be be bi mbe nsamba. 14Bia be be bese bi nga ku si. Ane me nga wô'ô *tyiñ é kobô'ô ma nkobô Beyude na: A Saül a Saül, wo kpwe'ele ma a jé? E ne wo angôndô na, wo tyañete abo nsoñ. 15Ane me nga yalan a jô na: O ne za a Nti? Nti a nga yalan a jô na: Me ne Yésus, ma wo kpwe'ele! 16Ve da, tebe'e tetele a mebo môé! Amu jame di nde ma yené de e be wo. Me nga tobe wo, ô bo mbo ésaé, a ngaa ya ñyenane wo te yene ma, a biyoñe bife, wo ye ke ôsu a yen. 17Ataté éyoñe ji, ma nyii wo mo Beyude, a mo ya meyoñe bikuu, mme mete ma lôme wo e be be na, 18ô ke kui be mis, a vaa be dibi été, be zu éfufup; be kôlô éjôé *satan a nyiine éjôé Zambe, ane be ne nyoñe njamane ya mam *abé map, a bo benyoñe ngap, baa be mintobane mi bôt, amu mbunane ya buni ma. 19Ataté éyoñe te a njô bôt Agripa, me nji biasé ñyenane ya yôp ôte. 20Ve na, ataté e be bôte ya Damas ôsusua, a ba ya Yérusalém, si ése ya Yudé, a e be meyoñe bikuu, me nga kate be na, ba yiane kôñelane minlem a bulane be Zambe wop. A na, be nyiñ aval ane ba be maneya kôñelane minlem. 21Amu ajô te Beyude be nga kômbô wôé ma, me to *nda Zambe été. 22Amu ngule ya mba'alane Zambe, ma ke ôsu a kañete ba be ne anen a ba be ne tyôtyoé. Bekulu mejô a Môze, be nga taté kobô ajô mame ma ye boban. A me nji beté jam afe yôp. E ne na: 23Krist a nga jibi mintaé. A ne nyô ya ôsu a nga wômô miñwuan. A yiane kate Beyude a bikul ajô éfufup. 24Paul a ngenane a kobô'ô, ane Festus a nga tyi'i nye nkobô a bete tyiñe yôp a jô na: O ne akut, a Paul, abui ñyemane dôé e kuiya wo vôme ya bo akut. 25Paul a nga beta nyoñe nkobô a jô na: Me nji bo akut, a mbaa njô bôt Festus. Ma bo na bôte be wô'ô benya mejôô a mam ma yian. 26E Njô bôte ma kobô ôsu vié a ngul ése, me to ndi, na a yeme mame mana mese. Teke jame da da, da jobetane nye. Me ne ngule ya simesane nalé. Amu mam mete me nji bobane e vôm a ne asoé. 27Me to ndi na, wo buni mame bekulu mejô be nga kobô, a njô bôt Agripa, ye sa nalé' 28Ane njô bôt Agripa a nga jô Paul na: Da li'i wo tyôtyoé e nkobô wôé été na, ô kôñelane ma *nlem me buni! 29Ane Paul a nga yalan a jô na: Ja'ane ana'ana, ja'ane ke ôyap ôsu, jame ma ye'elane Zambe e ne na, sa ve wo étam, ve na, bôte bese mia wô'ô nkobô wom, mi buni, a bo ane ma, ô vaa jôm ve bengôkop.
30Ane Agripa a nga kôlô si baa ngovina Bérénis a bôte ba be be be nga too. 31Eyoñe be nga kôlô, be nga bo émo'o a kui tyiñe na: Môte nyô a nji bo jam a yiane wu de, nge timbi ngôkop. 32Agripa a nga ve nye mo me Festus a jô na: Be nga yiane ji'a suu môte nyô, nge a nga ye bo te kee ajô dé e be njôô nnen.
Currently Selected:
Mm 26: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
