Kạhtukko 2
2
Ạkil reakʼ kuṛại
1E bạbu, ińakʼ katha baṛem ańjomletiń khan
ar amakʼ ontorre ińakʼ sanam hukumkom
bae dohokakʼ khan,
2ar ạkil secʼ monem bitʼ letam khan
ar buj secʼ monem ạwil letam khan,
3hẽ bud lạgitʼem hohole khan
ar ãṭ aṛaṅte bujem hohoae khan,
4ar rupạ ńam baṛae leka ạkilem ńam baṛae khan
ar okowakʼ dhon lekam sendra baṛale khan,
5enḍekhan Probhu Isor botorae do cetʼkana mente,
onam bujhạu daṛeakʼa ar Isorakʼ ạkilem ńama;
6ente Probhu Isorge ạkil doe emokʼ kana,
uniyakʼ moca khonge bud ar ạkil do oḍokokʼ kana.
7Uni do khạṭi ontorren hoṛko lạgitʼ
bude jogao dohoyeda;
ar dhoromte okoeko calakʼkan, onkoren ḍhale hoyokʼte
8uni do dhorom reakʼ bicạre doho daṛeakʼ,
ar uni botoraekankoakʼ hore rukhiyạ daṛeakʼ.
9Ińakʼ katham ańjomle tiń khan,
enḍekhan okaṭakʼ do lek reakʼ, okaṭakʼ do hok reakʼ, okaṭakʼ do dhorom reakʼ
ar okaṭakʼ do bhạlại reakʼkan ona jotowakʼ reakʼ horkom bujhạu daṛeakʼa;
10ente ạkil do amakʼ ontorre bolokʼa,
ar bud do amakʼ jiwiye rạskạ ocoytama.
11Amakʼ boge bạṛicʼ bujhạu reakʼ daṛegeye rukhiyạmea,
ar buj do ame pahramea.
12Ạkilge am do bạṛicʼ hoṛkoakʼ hor khone rukhiyạmea;
hẽ onko khongeye rukhiyạmea
okoe do eṛe kathako roṛ,
13ar ńut horte calakʼ iạte sojhe horko bạgiyakʼkan,
14okoe do bạṛicʼakʼ kạmireko rạskạkʼkan,
okoe do phepṛa horreko rạskạkʼkan,
15ar okoe do konḍeya ar bạṛicʼ horteko calakʼkan.
16Ạkilge am do loṭghuṭi reakʼ ti khone rukhiyạmea,
ar sebel sebel kathaye roṛetʼkan bạṛicʼ maejiuakʼ ti khon hõ.
17Uni do juạn okterege jãwãetetʼe bạgi akadea
ar Isorakʼ bondobose bebatao akada.
18Am do uniyakʼ oṛakʼtem bololen khan gujukʼ secʼem lahakʼa,
ar uni tulucʼem soṅgelen khan gujukʼko ṭhenem seṭerokʼa.
19Okoe uni ṭhenko calakʼ onko do ar tisge bako ruạṛ hijukʼa,
onko do bańcaokʼ reakʼ hor bako ńama.
20Ạkilge onako khone rukhiyạmea
jemon bhage hoṛkoakʼ horte,
Isor botoraekankoakʼ hortem taṛam daṛeakʼ.
21Dhorom hoṛge disạmreko girobasokʼa,
ar miridos hoṛ hõ onareko ṭikạu tahena;
22menkhan disạm khon bạṛicʼko doko kaman ocokʼa
ar bepạtiạrko doko or totʼ giḍi ocokʼa.
Santali Bible © Bangladesh Bible Society, 2021.