Mark 3
3
Borocʼ ti hoṛe bogeyen
(Mathae 12.9-14; Luk 6.6-11)
1Ona tayom Jisu do arhõ sunạgogteye boloyena. Onḍe do nonkan mitʼṭen hoṛe tahẽkana okoe do mitʼ ti borocʼge tahẽkantae. 2Ar Phạrusiko modren adom hoṛ do Jisu dusire paṛaoe lạgitʼ ạtko ńam baṛayetʼkan tahẽkana. Ar jirạukʼ mãhãre Jisu jãhãeye bogekoa se baṅa onate bhageteko tạnkhiyede tahẽkana. 3Jisu do uni borocʼ ti hoṛe metadea, “Beretʼme ar talare teṅgokʼme.”
4Ona tayom Phạrusikoe kuliketʼkoa, “Jirạukʼ mãhãre bhage kạmi ganokʼa se bạṛicʼ kạmi ganokʼa? Jiwi bańcao se bạṛicʼ giḍikakʼ ganokʼa?”
Menkhan Phạrusiko do cetʼge bako roṛ ruạṛadea. 5Unre Jisu do edrete onkoe beṅgetʼatʼkoa ar onkoakʼ keṭecʼ mon iạte bhabna salakʼ uni hoṛe metadea, “Amakʼ ti tiạyrtam.”
Adoe tiyạrketʼ khan ti do boge utạrentaea. 6Unre Phạrusiko do bahrete oḍok hecʼkate Jisu cetʼlekateko gojea ona reaṅ Herod secʼrenko sãote sopolhako dhurạuena.
Probhu Jisuko pańjayede
7Inạ tayom Jisu do acʼren celako sãote doreão aṛeteye calaoena. Ar Gạlil Prodesren ạḍi utạr hoṛ do uniko pańja idikedea. 8Jisu okakoe kạmi akatʼ ona reakʼ katha ańjomkate Jihudạ, Jerusalem, Edom, Jordan gaḍa hanasaren, Tur ar Sidon nagraha beṛhae secʼren gadel hoṛko do uni ṭhenko hecʼena. 9#Mrk 4.1; Luk 5.1-3 Jisu do acʼren celako mitʼṭecʼ huḍiń lạukạ ṭhik dohokakʼe metatʼkoa jemon bhiṛ iạte hoṛko aloko riḍạtʼ ciride. 10Ar ḍher hoṛe boge akatʼko tahẽkante rugiko do uni joṭede lạgitʼko ṭhela ṭhilikʼkan tahẽkana.
11Ar bạṛicʼ jiuko do uniko ńelle khange uni samaṅreko bhindạṛokʼkan tahẽkana ar kikiạuateko metaekan tahẽkana, “Am dom Isorren Hopon kana.” 12Menkhan uni doe sontoretʼko tahẽkana okoe hõ jemon aloko sodore acʼ doe okoe kana mente.
Gelbar apostole bahaletʼko
(Mathae 10.1-4; Luk 6.12-16)
13Ona tayom Jisu do buruteye rakapʼena ar acʼakʼ kusileka uni do thoṛa hoṛ acʼ ṭhene hohowatʼkoa. 14Arko hecʼen khan uni do gelbar hoṛko apostol hudạreye bahalketʼkoa, jemon onko do acʼ são sãoteko tahente, 15bạṛicʼ jiuko oḍok giḍiko reakʼ daṛeye danako ar porcar lạgitʼe kol daṛeako. 16Ar okoe gelbar hoṛe bahalketʼko onko doko hoyokʼ kana, Simon, uni do Patrase bahnakedea; 17Sabdaeren hopon Jakob ar Johan, (nukinakʼ ńutum do Boanergise dohoketʼ tạkina metakʼme huḍurren hoponkin); 18Andreas, Philip, Bartholomae, Mathae, Thoma, Alphaeren hopon Jakob, Thaddae, ar moullobadi Simon, 19ar Jihudạ Iskariot, okoe do bạiriko then Jisui sapʼ ocolede.
Probhu Jisu ar bạṛicʼ jiukoren raj
(Mathae 12.22-32,46-50; Luk 8.19-21; 11.14-23; 12.10)
20Jisu oṛakʼteye hecʼen khan uni ṭhen arhõ nunạkʼ hoṛko jarwayena je, acʼ ar acʼren celako do cetʼge bako jom daṛeada. 21Ado Jisuren peṛako noa khoborko ańjomketʼ khan oḍok ạguiye lạgitʼko hecʼena. Onkoko menkeda, “Uni doe koṅka akana.”
22 #
Mat 9.34; 10.25 Ar Jerusalem khonko hecʼakan tahẽkan sostor baḍaeko doko menkeda, “Unire do Beelsebul menaea. Uni do bạṛicʼ jiuren raj hotete bạṛicʼ jiukoe oḍok giḍiyetʼkoa.”
23Jisu do sostor baḍaekoe hohowatʼkoa ar cetʼako lạgitʼe metatʼkoa, “Soetan do cetʼ Soetane oḍok giḍi daṛeaea?” 24Jãhãṭakʼ rajosṭige apnar talare hạṭińlen khan ona rajosṭi do ohoge ṭikạulena. 25Mitʼṭen gharońj hạṭińlen khan ona gharońj do baṅ ṭikạukʼa. 26Onkage Soetan hõ apnar upạrte teṅgokate acʼakʼ daṛeye rạpud khan uni hõ ohoe ṭikạu daṛelena ar onḍege uni doe caba utạrokʼa. 27Noa katha do sạri kana je, mitʼṭen daṛean hoṛ do bako tol maṛaṅ lekhan okoe hõ uniyakʼ oṛakʼre bolokate jinisko ohoe luṭ daṛeletaea. Menkhane tol maṛaṅle khan doe luṭ daṛeakʼgea. 28Sạrigeń metapekana, manwakoakʼ sanam kại ar Isor upạrte henosta katha do ikạkʼtaea, 29#Luk 12.10 menkhan sonot Jiu upạrte henosta katha do tisge baṅ ikạkʼtaea. Uni hoṛakʼ kại do jaejug hạbicʼ tahentaea.”
30Sostor baḍaeko oneko menletʼ tahẽkan, “Unire do bạṛicʼ jiu menaea,” Onkoakʼ ona katha iạtege Jisu do noa kathae menkeda.
Jisuren eṅgat ar boehako
(Mathae 12.46-50; Luk 8.19-21)
31Inạ tayom Jisuren eṅgat ar boehako do onḍeko hecʼena ar bahrere teṅgokate Jisu hohoae lạgitʼ khoborko kolkeda. 32Unre Jisu beṛhaete ạḍi utạr hoṛko duṛupʼ akan tahẽkana. Adoko metadea, “Amren eṅgam ar boeham ar misramteko bahrereko khojetʼmea.”
33Jisui metatʼkoa, “Okoe kanae eṅgạń ar okoe kanako ińren boehańko do?”
34Ado acʼ beṛhaete duṛupʼ akanko secʼ beṅgetʼ ạcurkateye menkeda, “Noko kangeako ińren eṅgạń ar boehańko do! 35Okoe Isorakʼ sana lekako senokʼkan onkoge ińren, boeha, misera ar eṅgạń kanako.”
Currently Selected:
Mark 3: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
