Mark 1

Johan bạbạptisicʼakʼ porcar

(Mathae 3.1-12; Luk 3.1-17; Johan 1.19-28)

1Isorren Hopon Jisu Mạsiyakʼ bisoetege bhage sombat reakʼ etohopʼ do hoyakana.

2 # Mal 3.1 Jesaea nạbiyakʼ puthire noa katha ol akana;

Ńelme, ińren goḍet do

am lahateń kolekana.

Uni do amakʼ hore teara.

3 # Jes 40.3 (LXX) Hahaṅkarre mitʼṭen hohokạnicʼ reaṅ aṛaṅ,

Probhu Isorakʼ hor tearkataepe,

Uniyakʼ suṛucʼ horko sojhe kataepe.

4Ona katha lekage Johan do hahaṅkarre senkate hoṛkoe bạptisetʼko tahẽkana ar kại khon ikạ ńam lạgitʼe porcaretʼ tahẽkana jemon hoṛko do mon ạcurkate bạptismako ataṅ. 5Onate Jihudạ disạm ar Jerusalem nagraharen sanam hoṛko do oḍok hecʼente Johan ṭhen hijukʼko ehopʼena. Ar tinre onko do akoakʼ kạikoko aṅgocketʼa unre Johan do Jordan gaḍareye bạptisketʼkoa.

6 # 2 Raj 1.8 Johan do ũṭ upʼ reakʼ aṅgrop ar ḍanḍare harta reakʼ paṭheakʼ tahẽkantaea. Uni do pohoko ar bir dumur rasae jometʼ tahẽkana. 7Ar nonka menkateye porcaretʼ tahẽkana, “Iń tayomte mitʼ hoṛe darae kana. Uni do iń khone daṛeangea. Uniyakʼ panahi reakʼ phitạ eṅgotʼkate raṛaetae lek hõń baṅkana. 8Iń do dakʼteń bạptisetʼpea menkhan uni do sonot Jiuteye bạptispea.”

Probhu Jisuakʼ bạptisma ar biḍạu

(Mathae 3.13—4.11; Luk 3.21,22; 4.1-13)

9Onako oktere Jisu do Gạlil Prodes reakʼ Nasaret ato khone hecʼena, ar Johan do Jordan gaḍare uniye bạptiskedea. 10Ar dakʼ khone rakapʼtʼen são sãote Jisu do serma oṛejokʼkan ar sonot Jiu parwa leka acʼ cetanre pheḍ hijukʼkane ńelkedea. 11#Gen 22.2; Ser 2.7; Jes 42.1; Mat 3.17; 12.18; Mrk 9.7; Luk 3.22 Unre serma khon mitʼṭen aṛaṅ ańjomena, “Amge ińren dulạṛiạ Hopon, iń do amreń kusi akana.”

12Noa tayom Jisu do Jiu hotete hahaṅkarteye chaṭa idiocoyena. 13Ar pongel din hạbicʼ Soetan do Jisu laloce udukʼadea ar kạire ńurhạye lạgitʼe kurumuṭukeda. Onḍe do aema bir janwarko tahẽkana, ar serma goḍetko hõ uniko sapʼsorae kan tahẽkana.

Celakoe ńametʼko

(Mathae 4.12-22; Luk 4.14,15; 5.1-11)

14Johan hajotreye bhorao ocoyen khan Jisu do Gạlil Prodesteye calaoena. Ar nonka menkate Isorakʼ bhage sombat porcare ehopʼena, 15#Mat 3.2 “Okte purạu akana, ar Isorakʼ raj do sorakana. Kại khon mon ạcurtape ar bhage sombatre pạtiạukʼpe.”

16Mitʼ din Jisu do Gạlil doreão aṛeteye parom calakʼkan tahẽkana. Unre Simon ar uniren boeha Andreas do doreãore jhạlikin oḍaokan tahẽkana. Ente unkin do jạilạkin tahẽkana. 17Jisui metatʼkinạ, “Dela iń sãote hijukʼben. Iń do hoṛ sasapʼ hoṛiń benao bena.” 18Unkin do unrege jhạlikin bạgi oṭowatʼte Jisukin pańjakedea.

19Ado onḍe khon laha ńokʼe sen idiyen khan Sabdaeren hopon Jakob ar Johan tạkine ńel ńamketʼkinạ. Unkin do lạukạre duṛupʼkate jhạlikin jujutkan tahẽkana. 20Jisu do unkin hõe hohoatʼkinạ, ar unrege ạkinren apat Sabdae do kạmiyạko sãote lạukạrekin bạgi oṭowadete Jisukin pańjakedea.

Bạṛicʼ jiu capaṛ akawade hoṛ

(Luk 4.31-37)

21Jisu ar acʼren celako do Kapharnạhum nagrahateko calaoena. Ar jirạukʼ mãhãre uni do sunạgogre bolokate cetʼakoe ehopʼena. 22#Mat 7.28,29 Ar uniyakʼ cecetʼakʼte hoṛko do ạḍiko hahaṛayena, ente sostor baḍaeko leka do baṅ, bickom ektiạri menakʼtae hoṛ lekae cetʼako kan tahẽkana.

23Ona jokhecʼ sunạgogre bạṛicʼ jiu capaṛ akawade mitʼṭen hoṛe tahẽkana. 24Uni do ãṭ aṛaṅte hohoateye menkeda, “E Nasaretren Jisu, ale tulucʼ amakʼ do cetʼ? Nosṭole lạgitʼem hecʼakana? Baḍaegeạń okoe kanam mente; am do Isorren uni sonoticʼ kanam.”

25Unre Jisu do bạṛicʼ jiu dhomkao kedeteye metadea, “Thirokʼme ar uni khon oḍok calakʼme.”

26Khange bạṛicʼ jiu do uni hoṛe mocṛa mucṛikedea ar kikiạuate uni khone oḍok calaoena. 27Noa ńelte hoṛko do hahaṛayente ako akore kuliyana. “Noako do cetʼ kana? Ar noa ektiạrite perecʼ nãwã cecetʼakʼ baṅ cetʼkan? Ente uni do bạṛicʼ jiukoe hukumako kana ar onko do uniyakʼ kathako bataoetʼtaea.”

28Ar noa iạte Gạlil Prodes reakʼ joto jaegakore Jisuakʼ katha do ạḍi usạra pasnao idiyena.

Ḍher hoṛko bogeyen

(Mathae 8.14-17; Luk 4.38-41)

29Ado sunạgog khonko oḍoken khan onko do Simon ar Andreas tạkinakʼ oṛakʼteko calaoena. Onko sãote Jakob ar Johan hõkin tahẽkana. 30Unre Simon hanhartetʼ do ruạ iạteye giticʼ akan tahẽkana. Ar Jisui hecʼen khan uni reaṅko lạiyadea 31Jisu do uni ṭhen senkate ti sapʼkedeteye beretʼkedea. Ar inạtege uniyakʼ ruạ do chuṭạu gotʼentaea ar onko jom ocoko lạgitʼe sapʼsoratʼkoa.

32Ado enhilokʼ candoe hạsuren khan ạyupʼ jokhecʼ hoṛko do joto lekan rugi ar bhut capaṛ hoṛko Jisu ṭhenko ạguketʼkoa. 33Unre nagraharen hoṛ do ona oṛakʼ reakʼ duạr ṭhen hecʼkateko jarwayena. 34Ar Jisu do ạḍi lekan rogkote jạbun akan hoṛkoe bogeketʼkoa ar bhut capaṛ akatʼko hõe oḍok giḍiketʼkoa. Uni do bhutko bae roṛ ocoatʼkoa, ente onko doko baḍae akade tahẽkana acʼ doe okoe kana mente.

Gạlil Prodesreye porcaretʼkan

(Luk 4.42-44)

35Dosar hilokʼ setakʼ ńut tahẽkanrege Jisu doe beretʼena ar oṛakʼ bạgikate mitʼṭecʼ nisun jaegare senkate koejoṅe ehopʼena. 36Unre Simon ar uniren sãotenko do Jisu sendra baṛayeko ehopʼena. 37Arko ńamkede khan uniko metadea, “Sanamkoge amko ńam baṛayetʼmea.”

38-39 # Mat 4.23; 9.35 Jisui metatʼkoa, “Dela bon, sorteakʼ atokote bon calakʼa jemon onakore hõń porcar daṛeakʼ, ente ona lạgitʼgeń hecʼakana.” Nonkage Jisu do Gạlil reakʼ joto jaegakore senkate Jihudikoakʼ sunạgogkoreye porcarkeda ar bhutkoe oḍok giḍiketʼkoa.

Mitʼṭen murhucʼ jom rugiye bogeyen

(Mathae 8.1-4; Luk 5.12-16)

40Mitʼṭen murhucʼ jom rog hoṛ do Jisu ṭhen hecʼkate ikhṛumenteye menkeda, “Sanalem khanem boge daṛeạńạ.”

41Jisu do uni hoṛre mãyã hecʼadea. Onate ti tiạrkate joṭetʼkedeteye metadea, “Iń hõ onkageń khojogokʼ kana, ma saphakokʼme.” 42Ar inạtege uniyakʼ murhucʼ jom rog do boge utạrentaea.

43Unre Jisu do uniye bidạkadea, menkhan ona lahare sontorkedeteye metadea, 44#Lev 14.1-32 “Ńelme, noa katha do okoe ṭhen hõ alom lại baṛaea. Bickom naekeko ṭhen senkate ńel ocokʼme ar saphakʼ lạgitʼ Mose okaṭakʼ samaṅ reakʼ kathae menakatʼ ona samaṅme. Ar nonkate naekeko ṭhenem sạbudokʼa, am dom boge akana mente.”

45Menkhan uni hoṛ do bahrete oḍok senkate sanam jaegare noa khobor lại pasnaoe ehopʼena. Onate Jisu do okaṭakʼ nagrahate hõ sodorte bae bolo daṛeada. Uni do nisun jaegakore tahen hoyentaea; ar enrehõ hoṛko do sanam jaega khon uni ṭhen hijukʼko ehopʼena.

Currently Selected:

Mark 1: SBT

Highlight

Copy

Compare