Mathae 16

Hoṛko do cinhạko khojkan

(Mark 8.11-13; Luk 12.54-56)

1 # Mat 12.38; Luk 11.16 Phạrusiko ar Sạdukiko do Jisu bidạue lạgitʼ uni ṭhenko hecʼena ar serma khon mitʼṭecʼ cinhạ udukʼako lạgitʼko metadea.

2Jisui roṛ ruạṛatʼkoa, “Ạyupʼ jokhecʼ dope mena, ‘dhạrungeae ente serma do arakʼgea.’ 3Ar setakʼ jokhecʼ dope mena, ‘teheń doe hoe daga ente serma do arakʼ ar dhũndgea.’ Serma reakʼ muṭhạn papachnao dope baḍaekana, menkhan okte reakʼ cinhạko do bape bujhạu daṛeakʼ kana. 4#Mat 12.39; Luk 11.29 Niạ bạṛicʼ ar laṭghaṭ piṛhiren hoṛge cinhạ doko ńam bakʼṛakana, menkhan Jona reakʼ chaḍa ar okaṭakʼ hõ onko do baṅ udukʼakoa.” Inạ tayom Jisu do onko bạgiyatʼkoteye calaoena.

Celakoe sontoretʼko

(Mark 8.14-21)

5Doreão hanasako parom calakʼkan tahẽkanre celako do soṅgete piṭhạ iditorako hiṛińkeda. 6#Luk 12.1 Ado Jisui metatʼkoa, “Phạrusiko ar Sạdukikoakʼ khạmi khon sontor akan tahenpe.”

7Noate celako do ako ako talare kheńjer-meńjer baṛayenteko menkeda, “Piṭhạ babon ạgu toraletʼte noa kathae metabon kana.”

8Jisu onae baḍaeketʼ khan onkoe metatʼkoa, “E nase pạtiạukʼko, piṭhạ bạnukʼtapete cedakʼpe kheńjer meńjerokʼ kana? 9#Mat 14.17-21 Ape do cetʼ ńit hõ bape bujhạueda se bape disạyeda, onko mõṛẽ hajar hoṛ lạgitʼ mõṛẽ goṭecʼ piṭhạ reakʼ katha, ar ona tayom do tinạkʼ khạclạkʼpe halaṅ jarwaleda? 10#Mat 15.34-38 Se pon hajar hoṛ lạgitʼ eae goṭecʼ piṭhạ reakʼ katha, ar tinạkʼ khạclạkʼpe halaṅleda? 11Piṭhạ reakʼ katha bạń metapekan do cetʼ bape bujhạueda? Menkhan Phạrusi ar Sạdukikoakʼ khạmi khon sontor akan baṛe tahenpe.”

12Ado un utạrko bujhạukeda, piṭhạ reakʼ khạmi khon sontor akae do baṅ, menkhan Phạrusi ar Sạdukiko reakʼ cecetʼakʼ khon sontor tahene metako kana mente.

Probhu Jisugeye Mạsi kana

(Mark 8.27-30; Luk 9.18-21)

13Jisu do Kạisạriạ Philipi reakʼ elakateye hecʼenre acʼren celakoe kuliketʼkoa, “Hoṛko do Manwa Hopon okoe kanae menteko meneda?”

14 # Mat 14.1,2; Mrk 6.14,15; Luk 9.7,8 Onkoko menkeda, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda Jirimiạ; ar baṅkhan nạbiko modren mitʼ hoṛ.”

15Unre Jisui metatʼkoa, “Menkhan ape do okoe kạnạń mentepe meneda?”

16 # Jhn 6.68,69 Simon Patrase roṛ ruạṛkeda, “Am do Mạsi, jiwetʼ Isorren Hopon kanam.”

17Jisui roṛ ruạṛadea, “Jona hopon Simon, am dom bhạgangea, ente okoe manwa hõ am ṭhen noa do bae sodor akada; menkhan ińren sermaren Babageye sodor akatʼmea. 18Ińiń metam kana, am dom Patras kana, ar noa dhiri cetanrege ińakʼ manḍereń benao rakaba. Norok reakʼ oka daṛege onare bae jitạu daṛeakʼa. 19#Mat 18.18; Jhn 20.23 Iń do serma raj reakʼ kạṭhikoń emama, ar jãhãnakʼge dhạrtirem tol ona do sermare hõ tolge tahena ar jãhãnakʼge dhạrtirem raṛae ona do sermare hõ raṛage tahena.”

20Ona tayom uni do celakoe sontorkatʼkoa jemon okoe hõ aloko lại baṛaye, acʼ doe Mạsi kanae mente.

Acʼakʼ gujukʼ ar jiwetʼ beredokʼ reaṅe lại lahayetʼ

(Mark 8.31; 9.1; Luk 9.22-27)

21Un khonge Jisu do acʼren celako lạiyakoe ehopʼena je, acʼ do Jerusalemte calakʼ hoyokʼtaea ar murubbiko, maraṅ naekeko, ar sostor baḍaeko hotete ạḍi okocʼ duk jojom hoyokʼtaea. Are gocʼ ocokʼa ar pe mãhã hilokʼre gocʼko khon uni do jiwetʼ beredokʼ hoyokʼtaea.

22Unre Patras do begar idikedete nisṛạueye ehopʼkeda, “E Probhu Isor noa do am khon sahaṛokʼma. Am cetanre nonka do tisge oho hoydaṛelena.”

23Jisu do ạcurente Patrase metadea, “Eya Soetan iń samaṅ khon pharakokʼme. Am do iń tạkʼkicʼicʼ kanam. Isor reakʼakʼko do bam moneyakʼ kana menkhan manwa reakʼakʼgem moneyakʼ kana.”

24 # Mat 10.38; Luk 14.27 Ona tayom Jisu do acʼren celakoe metatʼkoa, “Jãhãe ińakʼ horte hijukʼ sanayede khan uni do acʼakʼ kusi sanaleka aloe calakʼma; menkhan acʼakʼ kuruse gogma ar ińe pańjańma. 25#Mat 10.39; Luk 17.33; Jhn 12.25 Jãhãege acʼakʼ jiwi bańcaotae reakʼe monejoṅ, uni doe khuạutaea; menkhan jãhãege iń lạgitʼ acʼakʼ jiwiye khuạutae uni do onae ńama. 26Jãhãege goṭa dhạrtiye hameṭte acʼakʼ jiwiye khuạutae enḍekhan cetʼ porho hoyokʼtaea? Se mitʼṭen hoṛ acʼakʼ jiwi bodolte cetʼe emkea? 27#Mat 25.31; Ser 62.12; Rom 2.6 Manwa Hopon do acʼren goḍetko soṅgekate apat reakʼ ṭhonokanteye hijukʼa. Ar mimitʼ hoṛ akoakʼ kạmi lekae halawakoa. 28Sạrigeń metapekana, nonḍe teṅgo akanko modre adom hoṛ menakʼkoa onko do Manwa Hopon acʼakʼ rajre ạuriko ńele hạbicʼ bako gujukʼa.”

Currently Selected:

Mathae 16: SBT

Highlight

Copy