Mathae 14

Johan Bạbạptisicʼe khũnen

(Mark 6.14-29; Luk 9.7-9)

1Onako oktere Herod do Jisu reaṅe ańjomketʼ khan acʼren kạmiyạkoe metatʼkoa, “Nui doe Johan bạbạptisicʼ kana; unige gocʼko khone jiwetʼ beretʼ akana. 2Ar onatege uni do noako hahaṛa kạmiye kạmikana.”

3 # Luk 3.19,20 Herod do acʼren boeha Philipren bạhu Herodiạ iạte Johan tolkate hajotreye bhorao akade tahẽkana, 4#Lev 18.16; 20.21 Ente Johan doe metade tahẽkana, “Herodiạ bạhu mentem dohoye do baṅ ganokʼtama.” 5Herod do Johan gojeye menjoṅkan tahẽkana, menkhan uni do hoṛkoe botoratʼkoa, ente Johan do mitʼṭen nạbi menteko manaoede tahẽkana.

6Herodakʼ janam din reakʼ rạskạre Herodiạren hoponera do jarwa akanko talareye enecʼente Herode kusi ocokedea. 7Onate Herod do kuṛi jãhãnakʼgeye khoj ona emae lạgitʼe kiriạwadea. 8Ar kuṛi do eṅgattetʼ ṭhene sikhạu maṛaṅ ocoyenteye menkeda, “Johan bạbạptisicʼakʼ bohokʼ nonḍe thạrire emạńme.”

9Onate Herod doe bhabnayena, menkhan acʼ soṅgete jojom duṛupʼ akanko samaṅreye kiriạlen iạte ona emae lạgitʼe hukumkeda. 10Uni do hoṛ kolkate hajotrege Johanakʼ bohokʼe makʼ ńur ocoketʼtaea. 11Ar thạrire uniyakʼ bohokʼ ạgukate kuṛiko emade khan uni do eṅgattetʼe caladea. 12Inạ tayom Johanren celako do hecʼkate mạ̃ṛĩko idikeda arko topakatʼtaea ar senkate ona sombat do Jisuko lạiyadea

Mõṛẽ hajar hoṛe jom bi ocoketʼko

(Mark 6.30-44; Luk 9.10-17; Johan 6.1-14)

13Johanakʼ gujukʼ reakʼ sombate ańjomketʼ khan Jisu do eskarge onḍe khon lạukạte mitʼṭecʼ nisun jaegateye calaoena. Ar gadel hoṛ do onako ańjomketʼ khan eṭakʼ eṭakʼ atoko khon ot otte uniko pańjakedea. 14Ar lạukạ khone pheḍen khan uni do gadel hoṛko ńelte mãyã hecʼadea ar onko modre tinạkʼ rugiko tahẽkan onko jotokoe bogeketʼkoa.

15Ado ạyubokʼ jokhecʼ celako do hecʼkateko metadea, “Noa jaega do nisungea ar bela hõ bạnuea. Onate hoṛko bidạkakome jemon onko do atokote senkate jomakʼko kiriń daṛeakʼ.” 16Menkhan Jisui metatʼkoa, “Onkoakʼ calakʼ reakʼ jạruṛ do bạnukʼa, apege jomakʼ emakope.”

17Celakoko metadea, “Abo ṭhen do eken mõṛẽ goṭecʼ piṭhạ ar barea hako chaḍa ar cetʼge bạnukʼa.”

18Uniye metatʼkoa, “Onako iń ṭhen ạguiype.” 19Tayomte uni do gadel hoṛko ghãsre duṛupʼe hukumatʼkoa, ar ona mõṛẽ goṭecʼ piṭhạ ar barea hako ataṅkate serma secʼ beṅgetʼkateye bhorada. Inạ tayom piṭhại kecakʼketʼte celakoe ematʼkoa ar celako do gadel hoṛkoko calatʼkoa. Ar sanamkoko jomkeda arko biyena. 20Ado jom tayom okako kecakʼ hạricʼ pạsir ńur tahẽyen ona halaṅkate celako do gelbar phạtiạkʼko perecʼkeda. 21Ar tinạkʼko jomketʼ onko modre maejiu ar kạṭicʼ gidrạ chaḍa mõṛẽ hajar herel hoponko tahẽkana.

Dakʼ cetanteye taṛametʼ

(Mark 6.45-56; Johan 6.15-21)

22Inạ tayom Jisu do celako lạukạre dejokʼte doreão hanasa parom lahakʼ lạgitʼe udgạu gotʼkatʼkoa, ar acʼ do hoṛko bidạkoe ehopʼena. 23Ado gadel hoṛe bidạketʼko khan koejoṅ lạgitʼ acʼ eskarge buruteye rakapʼena. Ar ńuhumen khan eskarge onḍeye tahẽyena. 24Unre celakoakʼ lạukạ do tala doreãore tahẽkana ar samaṅ secʼ khone hoeyetʼ tahẽkante ḍheokote lạukạ do botorge sokojokʼkan tahẽkana. 25Ado maraṅ sim rakʼ okte Jisu do doreão cetan cetante taṛamate celako ṭhene hijukʼkan tahẽkana. 26Ar dakʼ cetante mitʼ hoṛ taṛamate hijukʼkanko ńelkede khan celako do botorte, “Bhut, bhut” menkateko kikiạukeda.

27Unre Jisui metatʼkoa,” Dil joṅpe, alope botorokʼa, ińkangeạń.”

28Patrase roṛ ruạṛadea, “E Probhu Isor, am kan khanem enḍekhan dakʼ cetante am ṭhen calakʼ hukumạńme.”

29Jisui menkeda, “Dela hijukʼme.”

Unre Patras do lạukạ khon pheḍkate dakʼ cetante Jisu ṭhen calakʼe ehopʼena. 30Menkhan hoe ńelteye botoren khan unumokʼe ehopʼena ar kikiạuateye menkeda, “E Probhu Isor, bańcaoiń me.”

31Jisu do usạrate tiye tiạrketʼte uniye sapʼgotʼkedea are metadea, “E nase pạtiạukʼicʼ cedakʼem digdhạyena?”

32Ado Jisu ar Patras lạukạrekin decʼen khan hoe do thirgotʼena. 33Ar lạukạre okoeko tahẽkan onko do Jisu sewawadeteko menkeda, “Sạrige am dom Isorren Hopon kana.”

Genesaretre dukhạliạkoe bogeyetʼko

(Mark 6.53-56)

34Tayomte doreão paromkate onko do Genesaret elakate hecʼkateko pheḍena. 35Ar onḍenko hoṛ do Jisuko oromkede khan beṛhaeteakʼ jaegakore hoṛko kolketʼkoa. 36Ar joto dukhạliạko uni ṭhenko ạguketʼkoteko nehõradea jemon onko do uniyakʼ kicricʼ reakʼ ańcarko joṭetʼ daṛeakʼ; ar tinạkʼko joṭetʼketʼ onko do jotogeko bogeyena.

Currently Selected:

Mathae 14: SBT

Highlight

Copy