Mathae 11

Probhu Jisu ṭhen Johanren celako

(Luk 7.18-35)

1Jisu do acʼren gelbar celako hukumakoe mucạtʼketʼ khan, uni do ato ato cetʼako ar porcar lạgitʼ onḍe khone oḍok calaoena.

2Johan do hajotre tahenrege Mạsiyakʼ kạmiko reaṅe ańjomketʼ khan acʼren celako kolketʼkoteye kulikedea, 3“Okoeyakʼ hijukʼ reakʼ katha menakʼtae uni dom am kangea, se eṭakʼgicʼ lạgitʼle koyokʼ hora?” 4Jisui roṛ ruạṛatʼkoa, “Okakope ńeletʼ arpe ańjometʼ onako senkate Johan lạiyaepe. 5#Jes 35.5,6; Jes 61.1 Kãṛã hoṛko ńeńelkana, leḍha hoṛko taṛameda, murhucʼ jom hoṛko bogekʼ kana ar kala hoṛko ańjomeda; gocʼkoko jiwetʼ beredokʼ kana ar reṅgecʼ orecʼko ṭhen do bhage sombat reakʼ katha lạiyạgokʼ kana. 6Bhạgangeae uni do okoe ińre bae tạkijokʼ kan.”

Johan babotre Probhu Jisuakʼ katha

7Ado Johanren celakoko ruạṛ calakʼkan tahẽkanre, Jisu do gadel hoṛko Johan reaṅ lạiyakoe ehopʼena, “Hahaṅkarte do cetʼ ńeńelpe oḍok senlena? Hoete hilạukʼkan chuchi? 8Se, cetʼ ńeńelpe oḍok calaolena? Mońj kicricʼe horokʼ akatʼ mitʼṭen hoṛ ńeńel? Sạrige okoe mońj kicricʼko horokʼetʼkan onko do rajakʼ oṛakʼreko tahenkana. 9Se cetʼ ńeńelpe oḍok senlena? Jãhãe nạbi? Hẽ, metape kạnạń, uni do nạbi khon hõe maraṅgea. 10#Mal 3.1 Johan doe uni kana one okoe reaṅ sostorre ol akan:

Ńelme, ińren goḍet do am lahateń kolekana,

uni do am lahate senkate amakʼ hore teara.

11Sạrigeń metapekana, maejiuko khon janam akan modre Johan bạbạptisicʼ khon maraṅ do ar okoe hõ bạnukʼkoa. Menkhan serma rajre okoe do joto khone huḍińge uni do Johan khon hõe maraṅgea. 12#Luk 16.16 Johan bạbạptisicʼakʼ okte khon ńit hạbicʼ serma raj doko jormoṭetʼ kana, ar okoeko jormoṭetʼkan onkoge ona doko recʼjoṅkana. 13Ente joto nạbi ar ạn do Johan hạbicʼgeko nạbileda. 14#Mal 4.5; Mat 17.10-13; Mrk 9.11-13 Noa kathape pạtiạuakʼ kan khan enḍekhan ańjompe okoeyakʼ hijukʼ reakʼ katha tahẽkan uni Eliạ doe nui Johan kangea. 15Ańjom lạgitʼ lutur menakʼtaeicʼ doe ańjomma.”

16“Niạ piṛhiren hoṛ do okoe tulucʼ iń jurikekoa? Onko do nonkan gidrạko lekanako okoe do bajarre duṛupʼkate eṭakʼ gidrạko hohoateko metakokan, 17‘ale do ape lạgitʼ tiriole oroṅkeda, menkhan bape enecʼlena; homor halaṅkedale, ar koṛam hõ bape ceṭakʼlena.’ 18Johan do hecʼkate jom hõ bae jometʼ tahẽkana ar ńũ hõ bae ńũiyetʼ tahẽkana, onate hoṛko meneda unire do bhut menaea. 19Ar Manwa Hopon do hecʼkateye jom-ńũiyetʼte hoṛkoko meneda, ‘hạni ńelepe, mitʼṭen lebṛa ar darkha rasa hoṅgoricʼ, mạsul uṭhạuko ar bạṛicʼ hoṛkoren gate.’ Menkhan ạkil je khạṭige ona reakʼ porman do acʼakʼ kạmikorege menakʼa.”

Bin pạtiạukʼkan ato ar nagrahako

(Luk 10.13-15)

20Ado Jisu okako ato ar nagrahakore ḍher hahaṛa kạmikoe kạmiletʼ onako jaegaren hoṛko do mon bako ạcurletʼtakoa. Onate uni do onako jaega nisṛạue ehopʼena, 21#Jes 23.1-18; Jeh 26.1—28.26; Joe 3.4-8; Amo 1.9,10; Sak 9.2-4 “Hae amre, E Khorashin, hae amre E Bethsaeda! Aben talare oka hahaṛa kạmiko hoyakan, ona do Tur ar Sidon reakʼ nagrahare hoylen khan ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa. 22Sạrigeń metaben kana, bicạr dinre abenakʼ khon Tur ar Sidon reakʼge boroṅ sahaokʼa. 23#Jes 14.13-15; Gen 19.24-28 Ar E am Kaparnạhum! Baṅ do serma hạbicʼem usul ocokokʼ? Tishõ baṅa, am do patal puritem giḍi ocokʼa. Okako hahaṛa kạmi amre hoyakan, onako Sodomre hoylen khan enḍekhan teheń hạbicʼ ona do tahẽkokʼa honaṅ. 24#Mat 10.15; Luk 10.12 Sạrigeń metaben kana, bicạr dinre abenakʼ khon boroṅ Sodom reakʼge ḍher sahaokʼa.”

Probhu Jisuakʼ hoho

(Luk 10.21-22)

25Ona tayom Jisui menkeda, “E Baba, ot ar sermaren Probhu Isor. Amiń sarhaoetʼmea, ente am do ạkilan ar budanko ṭhen khon noako reaṅ dom oko dohoakada, menkhan kạṭicʼ gidrạ lekanko ṭhen dom sodor akada. 26Hẽ Baba, amakʼ sana lekage noa do hoyakana.

27 # Jhn 3.35; Jhn 1.18; 10.15 “Ińren Baba do sanamakʼge ińakʼ tireye jimạ akada. Baba chaḍa Hopon do okoe hõ bako baḍaeyede kana ar Hopon chaḍa Baba hõ okoege bako baḍae edekana, Hopon okoe ṭhen Baba sodoreye menjoṅkan unige uni doe baḍaeyea.

28“Ape okoe do laṅga ar bojhatepe ten akan, dela iń ṭhen hijukʼpe, ińgeń jirạu ocopea. 29#Jir 6.16 Ińakʼ arãṛ gogpe ar iń ṭhen khon cetʼ joṅpe, ente iń do mạ̃hir ariń nindhạngea. 30Onate ontorre jirạupe ńama, ente ińakʼ arãṛ do algagea ar ińakʼ bojha do rawalgea.”

Currently Selected:

Mathae 11: SBT

Highlight

Copy