Josuạ 4
4
1Ar nonkate Israelkoren goṭa jạtrenko jordan gaḍako paromen khan Probhu Isor do Josuại metadea, 2“Am do mimitʼ gusṭiko khon mimitʼ hoṛkate jotote gelbar hoṛ bachao joṅme. 3Onkom metakoa, tala gaḍa reakʼ oka jaegare naekekoko teṅgo akan ona jaega khon jemon gelbar goṭecʼ dhiriko halaṅ ạgui ar ape sãoteko senokʼ ar teheń ńindạ oka ṭhạ̃irepe tahena onḍege ona hõko idiyma.”
4-5Josuạ do Israelren mimitʼ gusṭiko khon mimitʼ hoṛkate okoe gelbar hoṛe bachaoletʼko onko hohowatʼkoteye metatʼkoa, “Jordan gaḍate bolokate aperen Probhu Isorakʼ goha-sinduk ṭhen senokʼpe ar Israelkoren gelbar gusṭiko lạgitʼ mimitʼ goṭecʼkate gelbar goṭecʼ dhiri gokʼ ạguiype. 6-7Noako dhiri do ape talare mitʼṭecʼ cinhạ leka tahena. Ar tayom daram din aperen hopon ar hoponerako ona dhiri reakʼ maneko kulilepere onkope lại daṛeakoa, Probhu Isorakʼ goha-sinduk tinre jordan gaḍa talate gokʼ paromokʼkan tahẽkana unre ona gaḍa reakʼ ạtukʼ do teṅgo thirlena. Noako dhiri do Israelko ṭhen mitʼṭecʼ cinhạ leka tahena jemon jaejug hạbicʼ ona katha doe disạ ocoko.”
8Israelko do Josuạwakʼ hukum lekageko kạmikeda. Probhu Isor do Josuại metade tahẽkan lekage Israelko do akoren gelbar gusṭiko lạgitʼ jordan gaḍa tala khon gelbar goṭecʼ dhiriko halaṅ ạgukeda. Ar ona tayom do onako idiketʼte okare ńindạko tahẽyen onḍegeko dohokeda. 9Jordan gaḍa reakʼ oka ṭhạ̃ire goha-sinduk gogokʼ naekeko teṅgo akan tahẽkan onḍe Josuạ do arhõ gelbar goṭecʼ dhiriye dohokeda. Ona dhiriko do teheń hạbicʼ onḍege menakʼa. 10Gaḍa paromokʼ babotre Mose do Josuại hukumade tahẽkana. Onate hoṛko lạiyako lạgitʼ Josuại em akawade Isorakʼ hukum leka hoṛko jotowakʼ ạuriko cekae hạbicʼ goha-sinduk gogokʼ naekeko do gaḍareko teṅgo tahẽkana ar hoṛko do usạra gaḍako paromena. 11Ar sanamkoko paromen khan naekeko do Probhu Isorakʼ goha-sindukante hoṛko samaṅteko rakapʼ hecʼena. 12Mose okae hukum oṭoletʼ tahẽkan onkage Ruben ar Gad gusṭiren sanamko ar Manasi gusṭiren adha hoṛko do lạṛhại lạgitʼko sapṛaoente Israelko lahate gaḍako paromkeda. 13Lạṛhại lạgitʼ pongel hajar hoṛ do khanḍa bhanḍawante Probhu Isor samaṅre lạṛhại lạgitʼ gaḍa paromkate Jerikho reakʼ ṭạnḍireko senena.
14Enhilokʼ Probhu Isor do sanam Israelko samaṅre Josuại maraṅ ocokedea. Ona iạte hoṛko do Mose leka Josuạ hõ jonom bhorko manaokedea.
15Probhu do Josuại metadea, 16“Goha-sinduk gogokʼ naekeko jordan gaḍa khon rakapʼ hijukʼ metakom.” 17Ona iạte Josuạ do naekeko jordan gaḍa khon rakapʼ hijukʼe hukumatʼkoa. 18Ar onate Probhu Isorakʼ goha-sindukko gokʼ idiyetʼkan tahẽkan naekeko do tala gaḍa khon ghuṭuteko rakapʼ hecʼen sãote gaḍa dakʼ do arhõ ạtukʼ ehopʼena ar lahate leka dakʼ do banar sa se rakapʼena.
19Bochor reakʼ pạhil cando reakʼ gelakʼ dinre hoṛko do jordan gaḍa khonko rakapʼ hecʼente Jerikho purub simạ reakʼ Gilgolre senkateko ḍerayena, 20ar Josuạ do jordan gaḍa khon halaṅ ạgu akatʼ gelbar goṭecʼ dhiri do nonḍegeye dohokeda. 21Ona tayom uni do Israelkoe metatʼkoa, “Tayom daram din aperen bõsko tinre dhiri reakʼ mane onkoren apatkoko kulikoa, 22unrepe lạiyakoa, ‘Israelko do kuṭhạ̃ṛ otte taṛamate noa jordan gaḍako parom hecʼakana.’ 23Ar arakʼ jalapuri ạurile parom hijukʼ hạbicʼ aperen Probhu Isor do cetʼleka doreãoe ańjetʼ ocoletʼ onkage jordan gaḍa hõe ańjetʼ ocokeda. Ar gaḍa ạuripe parom hijukʼ hạbicʼ aperen Probhu Isor do ale samaṅre jordan gaḍae ańjetʼ ocoletʼ tahẽkana. 24Uni do noae kạmikeda jemon dhạrtiren sanam jạtrenko baḍae daṛeakʼ, Probhu Isorakʼ ti do daṛeangea ar jao ghuṛi jemon aperen Probhu Isorpe botorae.”
Currently Selected:
Josuạ 4: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
