Josuạ 10
10
Siń candoe teṅgo thiren
1Jerusalemren raj Adoni-Sedek doe ańjom ńamkeda, Josuạ do Ae nagraha hatkateye jarkhar akada ar Jerikho ar onaren rajakʼ cetanre okae ceka akatʼ onkage Ae ar onaren rajakʼ halot hõe hoyocoakada. Uni do arhõe ańjomkeda, Gibeonko do Israelko sãoteko bondobos akada ar onko sãote menakʼkoa. 2Onate uni ar uniren hoṛko do botor caṛhaoatʼkoa, ente Gibeon do raj nagraha lekan nagrahage tahẽkana. Noa do Ae nagraha khon hõ maraṅ nagraha tahẽkana ar onaren sanam herel hoṛ do daṛeangeko tahẽkana 3Ona iạte Jerusalemren raj Adoni-Sedek do Hebronren raj Hoham, Jarmutren raj Piram, Lakhisren raj Japhiạ ar Eglonren raj Debir ṭhen niạ nehõre kolkeda, 4“Ape do dela hijukʼte Gibeon nagraha akromon lạgitʼ goṛowạńpe, ente onko do Josuạ ar Israelko sãoteko bondobos akada.”
5Niạ katha ańjomkate onko mõṛẽ goṭen Amori rapajko, metakʼme Jerusalem, Hebron, Jarmut, Lakhis ar Eglonren rapajko do akoren lạṛhại phạdko jarwa mitʼketʼkoa. Ar ona tayom do akoren lạṛhại phạdko soṅgekate Gibeon sor senkateko ḍerayena ar nagrahako akromonkeda. 6Unre Gibeonrenko do Gilgal reakʼ ḍerate senkate Josuạ ṭhen sombatko kolkeda, “Amren golamko do alom bạgi giḍilea. Ma usạra hecʼkate goṛowaleme, ente Amorikoren rajko do buru ṭoṭha khon hecʼkate ale upạrte akoren lạṛhại phạdkoko jarwa akatʼkoa.”
7Niạ sombat ańjomkate Josuạ do acʼren sanam lạṛhại phạdkoante Gilgal khone oḍok hecʼena. Ar uni sãote Israelren sanam birbanṭa hoṛko tahẽkana. 8Probhu Isor do Josuại metadea, “Alom botorakoa; onko do amakʼ tireń soprotkoa. Onko do okoege am samaṅre bako teṅgo ṭarhao daṛeakʼa.”
9Gilgal khon oḍok kate goṭa ńindại taṛam senen tayom Josuạ do ackage onkoe akromonketʼkoa. 10Probhu Isor do Israelko samaṅre onkoe andmandao ocoketʼkoa. Onate Probhu Isor do Gibeonre Israelko hotete onkoren ḍher hoṛe gocʼketʼkoa. Beth-Harante rakapʼ calao akan horre Probhu Isor do Israelko hotete onkoe khudạu idiketʼkote Aserka ar Makeda hạbicʼ goṭa hore ńẽtʼ idiketʼkoa. 11Israelko samaṅ khon tinre onko do Beth-Haran bạgikate Aserkate pheḍ hecʼakan horteko ḍạṛ paskaokʼkan tahẽkana unre Probhu Isor do serma khon lạṭu lạṭu arel onko cetanreye ńuratʼkoa. Onate Israelko sãote lạṛhạire tinạkʼko gocʼen ona khon areltege ḍher hoṛko gocʼena. 12Oka hilokʼ Probhu Isor do Israelkoakʼ tire Amorikoe jimạketʼko enhilokʼge Josuạ do Israelko samaṅre Probhu Isore metadea,
“E siń cando, Gibeon cetanre
teṅgo thir akae tahenme,
E ńindạ cando, Ajalon buru sokṛare
senkate teṅgokʼ hapekokʼme.”
13Onate siń cando doe teṅgo thirena
ar ńindạ cando hõe teṅgoyena,
one tin hạbicʼ Israel do
acʼren bạiriko cetanre ạuriye hala purạu.”
Noa katha do Jaserakʼ puthire ol akana. Unre siń cando do tala sermareye teṅgo thirena ar hạsurokʼ do mitʼ dine dirikeda. 14Inạ laha se tayom nonkan din do ar tishõ bań hoyakana Probhu Isor do manwakoakʼ katha nonkae dohoakada mente. Enhilokʼ Probhu Isor do Israelko huyạteye lạṛhạilena. 15Ar inạ tayom Josuạ do sanam Israelkoante Gilgal reakʼ ḍerateye ruạṛ calaoena.
Amorikoren rajkoakʼ gujukʼ
16Onko mõṛẽ goṭen Amorikoren raj do Makeda nagraha ṭhenakʼ mitʼṭecʼ danderreko ńir okoyena. 17-18Ar danderre oko akan mõṛẽ rajko reakʼ sombat tinre Josuạko baḍae ocokedea unre uni doe menkeda, “Dander reakʼ duạrre lạṭu dhiri giṛgạu ạgukate esetʼkakʼpe ar ona pahrae lạgitʼ thoṛa hoṛko dohokope. 19Menkhan hape akae alope tahena; aperen bạiriko laga idikope, tayom secʼ khon akromonkope ar akoakʼ nagrahate alope sen ocoakoa. Aperen Probhu Isor do apeakʼ tire onkoe jimạ akatʼkoa.”
20Nonkate Josuạ ar Israelko do Amoriạkoko ńẽtʼ cabaketʼkoa. Onate joto lekako gocʼena; menkhan tinạkʼ sarecʼko tahẽkan onko do akoakʼ pạcrite esetʼ nagrahareko aderketʼkoa. 21Inạ tayom Israelren lạṛhại phạdko do Makeda reakʼ ḍerate Josuạ ṭhenko ruạṛ calaoena. Israelko upạrte ar celege jãhãnakʼ roroṛ bako dilleda.
22Ona tayom Josuại menkeda, “Dander reakʼ duạr jhijpe ar onko mõṛẽ goṭen raj iń ṭhen oḍok ạgukope.” 23Onate ona dander khon onko mõṛẽ goṭen rajko oḍok ạguketʼkoa. Noko do Jerusalem, Hebron, Jarmut, Lakhis ar Eglonren rajko tahẽkana. 24Onko raj do tinre Josuạ ṭhenko ạguketʼkoa unre uni do sanam Israelkoe hohowatʼkoa ar acʼ sãote okoeko senapoti lạṛhạiko senlen onkoe metatʼkoa, “Dela hijukʼpe ar noko rajko totkare lebetʼkope.” Onate onko do sen sorkate rajkoakʼ totkako lebetʼketʼtakoa.
25Josuạ do onkoe metatʼkoa, “Alope botorokʼa, ar alope as chuṭạukʼa. Daṛeanko hoyokʼpe ar monre dil dohoype. Ente okoe bạiriko sãote lạṛhại lạgitʼpe oḍok calakʼ onko sanamkoakʼ dosa Probhu Isor do nonkageye hoe ocoytakoa.” 26Ona tayom Josuạ do onko raje gocʼketʼkoa ar mõṛẽ goṭen darereye akakatʼkoa. Ar ạyupʼ dela deli hạbicʼ mạ̃ṛĩ do darere akage tahẽyena.
27Ar siń candoe hạsurokʼ jokhecʼ Josuạwakʼ hukumte hoṛko do dare khon onkoakʼ mạ̃ṛĩko pheḍkeda ar okaṭakʼ danderreko oko akan tahẽkan onarege onkoakʼ mạ̃ṛĩko giḍikada. Ar dander reakʼ duạr do lạṭu dhiriteko esetʼkada. Ona do teheń hạbicʼ hõ onḍege menakʼa.
28Josuạ do enhilokʼge Makedae hatkeda. Uni do ona nagraha ren raj ar sanam hoṛe gocʼ cabaketʼkoa ar onḍenko sanam jiwiyanko hõe maraoketʼkoa, celege jiwetʼ bae doholetʼkoa. Jerikhoren rajre okae cekaletʼ onkage Makedaren rajakʼ dosa hõe hoe ocokeda.
Dạkhin nagrahako reakʼ dosa
29Josuạ do Israelkoren sanamkoante Makeda khon Libna secʼe laha idiyente onae akromonkeda. 30Probhu Isor do ona nagraha ar onḍenko rajko Israelkoakʼ tireye jimạketʼkoa. Ar Josuạ do ona nagraharen hoṛko ar sanam jiwiyankoe gocʼ cabaketʼkoa, celege jiwetʼ bae doholetʼkoa.
31Inạ tayom Josuạ do sanam Israelkoante Libna khon Lakhis secʼe laha idiyena. Uni do Lakhis hõe esetʼ ạcurketʼte onae akromonkeda. 32Probhu Isor do Lakhis hõ Israelkoakʼ tireye jimạkeda. Ar Josuạ do dosar hilokʼ onae hatkeda. Uni do Libna nagrahae cekaletʼ onkage Lakhisren hoṛko ar onaren sanam jiwiyankoe gocʼ cabaketʼkoa. 33Unre Geserren Horam raj do Lakhisren hoṛko goṛowako lạgitʼe oḍokʼ hecʼlena menkhan Josuạ do uni ar uniren lạṛhại phạdkoe bhagaoketʼkoa. Ar sesre celege jiwetʼ bako sarecʼlena.
34Ona tayom Josuạ do sanam Israelkoante Lakhis khon Eglon secʼe laha idiyena. Onko do Eglonko esetʼ ạcurketʼte onako akromonkeda. 35Ar enhilokʼge onko do Eglonko hatkeda ar onḍenko hoṛko gocʼketʼkoa. Lakhisre cetʼlekae cekaletʼ onkage Josuạ do Eglonren sanam jiwiyankoe caba utạrketʼkoa.
36Inạ tayom Josuạ do sanam Israelkoante Eglon khon Hebronte senkate ona nagrahae akromonkeda. 37Onko do nagrahako hatketʼte onḍenko hoṛko, onkoren raj, ar ona aḍepase atokoren sanam hoṛko ar Hebronren sanam jiwiyankoko marao cabaketʼkoa. Ar Eglonre cetʼlekae cekaletʼ onkage Josuạ do Hebron ar onaren sanam hoṛkoe marao cabaketʼkoa.
38Ona tayom Josuạ do sanam Israelkoanteye ạcur senente Debir nagrahae akromonkeda. 39Onko do ona nagraha, ar onaren raj ar ona reakʼ atokoko hatketʼte sanam hoṛko gocʼ cabaketʼkoa. Onko do onḍenko sanam jiwiyankoko marao utạrketʼkoa. Josuạ do celege jiwetʼ bae doholetʼkoa; uni do Libna ar onaren raj ar Hebron reakʼ oka dosae hoyocoletʼtae Debir ar onaren rajakʼ dosa hõ onkageye hoyocokeda.
40Nonkate Josuạ do sanam jaega, metakʼme buru disạm, ar buru dhasna disạm, Begeb ar bilạn disạm, ar onakoren sanam rajkoe bhagaoketʼkoa ar celege jiwetʼ bae doholetʼkoa. Israelren Probhu Isor oka lekae hukumletʼ tahẽkan onkage uni do sanam jiwiyankoe marao utạrketʼkoa. 41Josuạ do Kades-Barnea khon Gasa hạbicʼ ar goṭa Gosen reakʼ Gibeon hạbicʼ sanam hoṛkoe bhagaoketʼkoa. 42Nonkate uni do mitʼ dhaore lạṛhại oḍokkate onko rajko ar onkoakʼ disạmkoe hatkeda, ente Israelkoren Probhu Isor do onko huyạteye lạṛhạilena. 43Inạ tayom Josuạ do sanam Israelkoante Gilgal reakʼ ḍerateye ruạṛ calaoena.
Currently Selected:
Josuạ 10: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
