Bikʼcạrko 6
6
Gideon reaṅ
1Israelko do arhõ Probhu Isorakʼ nońjorre oka bạṛicʼakʼkan onage kạmiko ehopʼena. Onate uni do Midiạnrenkoakʼ tireye jimạkatʼkoa ar eae bochor hạbicʼ onko gobolreye dohoketʼkoa. 2Israelko cetanre Midiạnrenkoakʼ santao do nunạkʼ ḍher idiyena je, Israelko do buru reakʼ paṛakʼre, danderre ar buru cetan reakʼ gaṛkore asrayokʼko ehopʼena. 3Israelko do tinre phosolko eretʼ tahẽkana unre Midiạnrenko, Amalekiko ar purub disạmren hoṛko hecʼkate onkoakʼ disạmko luṭ idiyetʼkan tahẽkana. 4Onko do Israelkoakʼ disạmre jhãp emkate Gasa hạbicʼ sanam jaega reakʼ phosolko nosṭoyetʼ tahẽkana. Israelko jomkate jiwetʼko tahẽ daṛeakʼ nonkan jãhãnakʼge Midiạnrenkoakʼ ti khon baṅ rukhiyạkʼkan tahẽkana, onkoren bhiḍiko, ḍaṅgrako ar gadhako hõ baṅa. 5Onko do akoren ạsul janwarko ar tạmbuko salakʼ pohoko leka jhãke jhãkko hijukʼkan tahẽkana. 6Midiạnrenko do Israelko tulucʼ ạḍi bạṛicʼko beoharetʼ tahẽkana, ar onate onko do Isor ṭhenko rakʼetʼ tahẽkana.
7-8Midiạnrenkoakʼ santao iạte Israelko do tinre Probhu Isor ṭhen rarakʼko ehopʼena unre Probhu Isor do mitʼṭen nạbi onko ṭhene kolkedea. Uniye menkeda, “Israelkoren Probhu Isore meneda, ‘golam oṛakʼ Misor disạm khon ińgeń oḍok ạgu akatʼpea. 9Misor reakʼ ektiạri khon ar sanam sasantaokoakʼ ti khon ińgeń rukhiyạ akatʼpea. Ape samaṅ khon ińgeń laga ńir akatʼkoa ar onkoakʼ disạmiń emakatʼpea. 10Ińiń metatʼpe tahẽkana, ińkangeạń Probhu aperen Isor do. Ar okoeyakʼ disạmrepe girobasokʼkan onko Amorikoren debotako do alope sewawakoa;’ menkhan ape do ińakʼ katha bape ańjomleda.”
11Mitʼdin Probhu Isorren goḍet do hecʼkate Ophra ato reakʼ Elon dare buṭạreye duṛupʼena. Ona jaega do Abieser bõsren Joasakʼ ạidạrire tahẽkana. Onḍe uniren hopon Gideon do Midiạnrenko ṭhen khon guhum okoe lạgitʼ darkha lelen kunḍre onae enokʼkan tahẽkana. 12Unre Probhu Isorren goḍet do Gideon ṭhen ńel ocoyenteye metadea, “E daṛean bir, Probhu Isor do am sãore menaea.”
13Gideone menkeda, “Menkhan E ińren Probhu Isor, am ale sãote menam khan enḍekhan ale cetanre noako do cedakʼ hoyokʼkana? Ar okayena uniyakʼ ona hahaṛa kạmiko one uniyakʼ katha aleren hapṛamko ṭhen khonle ańjomakatʼ, Probhu Isorge Misor disạm khone oḍok ạguletʼkoa mente? Menkhan ńitokʼ uni do aleye dea giḍiakatʼlea ar Midiạnrenkoakʼ tireye jimạ akatʼlea.
14Probhu Isor do uni secʼ ạcurenteye menkeda, “Amakʼ niạ daṛetege Do calakʼme ar Midiạnrenkoakʼ ti khon Israelko bańcaokom, ente ińgeń koletʼmea.” 15Gideone menkeda, “Menkhan E ińren Probhu Isor, iń do cekate Israelkoń bańcaokoa? Manase gusṭiko modre alege joto khon nicạṛ utạrko kanale, ar aleakʼ gharońjrenko modre hõ ińgeń huḍiń utạricʼ kana.”
16Probhu Isore roṛ ruạṛketʼteye menkeda, “Iń do am sãoteń tahena, ar onate sanam Midiạnrenko do mitʼ hoṛ lekagem haraokoa.”
17Gideone menkeda, “Amakʼ dayań ńamakatʼ khan, jemoniń bujhạu daṛeakʼ, sạrige am do iń sãote katham roṛeda ar onate mitʼṭecʼ cinhạ baṛe imạńme. 18Ar ruạṛ hecʼkate am samaṅre ińakʼ dan ạuriń dohowam hạbicʼ alom calakʼa. ”
Uni doe menkeda, “Am ạurim ruạṛ hijukʼ hạbicʼ koyokʼ hor akaeyiń tahena.”
19Gideon do bhitrite bolokate mitʼṭen merom hopon gurkateye isinkedea ar gel irạl keji holoṅ tulucʼ thoṛa bin khạmiyanakʼ piṭhạye benaokeda. Ona tayom onako bahrete ạgukate Elon dare buṭạre Probhu Isorren goḍet samaṅreye dohokeda.
20Unre Isorren goḍet do uniye metadea, “Jel ar bin khạmiyanakʼ piṭhạ do niạ dhiri cetanre dohoyme, ar rase hõ dulakʼme.” Ar Gideon doe onkakeda. 21Unre Probhu Isorren goḍetakʼ tire okaṭakʼ ṭheṅga tahẽkan ona reakʼ agalte ona jel ar bin khạmiyanakʼ piṭhạye ṭunḍukeda. Onate dhiri khon seṅgel rakapʼente jel ar piṭhạye atarkeda, Ar Probhu Isorren goḍet doe chanena. 22Gideon do Probhu Isorren goḍet kanae menteye bujhạuketʼ khane menkeda, “Hae hae, E Probhu Isor, iń do Probhu Isorren goḍet samna sạmniń ńelkedea!”
23Menkhan Probhu Isor do uniye metadea, “Suluk hoyokʼtam ma, ar alom botorokʼa. Am do bam gujukʼa.”
24Unre Gideon do Probhu Isor ńutumte onḍe mitʼṭecʼ pinḍe benaoketʼte ona reakʼ ńutum do Jehowa-Shalome dohokeda (mane do “Probhu Isorge suluktetʼ”). Ar ona pinḍ do teheń hạbicʼ Abieser gusṭikoakʼ Ophrare menakʼa.
25Ona ńindạge Probhu Isor do Gideone metadea, “Ạpumakʼ ḍaṅgra pal khon uni eae serma umerren dosaricʼ ḍaṅgram hataoea. Ar ona tayom Bakʼal debota ńutumte ạpum okaṭakʼ pinḍ do gaṛ lekan ṭhạ̃ireye benao akatʼ ona rạputʼ gejerme ar ona aṛere okaṭakʼ Asera-muṭhạn menakʼ ona hõ makʼ rạpudme. 26Ona tayom ona jaega cetanre amren Isor Probhu Isor ńutumte mitʼṭen mońj okocʼ pinḍ benaome. Ar ona tayom onem makʼ giḍiakatʼ Asera muṭhạn reakʼ kaṭte dosaricʼ ḍaṅgrate mitʼṭecʼ jeredokʼ samaṅokʼakʼ samaṅme.” 27Ona iạte Gideon do acʼren kạmiyạko mod khon gel hoṛe soṅgeketʼkote Probhu Isorakʼ katha lekae kạmikeda. Menkhan acʼakʼ gharońj ar atoren hoṛko botorte sińre baṅkate ńindại kạmikeda.
28Setakʼ jokhecʼ atoren hoṛko do jạpitʼ khon beretʼkate tinreko ńelkeda Bakʼal debotawakʼ pinḍ do rạputʼ gejer akana ar Asera-muṭhạn hõ makʼ giḍi akana ar mitʼṭen nãwã pinḍ benaokate onare dosaricʼ ḍaṅgrae samaṅ akana. 29Unre onko do hạni nại kupulikʼko ehopʼena, “Noa do okoeye kạmi akada? ” Ar suṭhikko hataoketʼ khan, Joasren hopon Gideone kạmi akada menteko baḍaekeda. 30Ar onko do Joas ṭhen senkateko menkeda, “Amren hopon oḍok ạguiyem. Uni do gujukʼ hoyokʼtaea, ente Bakʼal debotawakʼ pinḍe rạputʼ giḍi akada ar Asera-muṭhạn hõe makʼ giḍi akada.”
31Menkhan Joas do acʼ birudre teṅgo akan hoṛkoe metatʼkoa, “Ape do cetʼ Bakʼal debota ńutumtepe lạṛhạiya? Apege cetʼ unipe dogea? Jãhãege uni ńutumteye lạṛhại unige gapa ạuri setagokʼreye gocʼ ocokʼa. Bakʼal do sạrigeye jãhãn debota kan khan uni do apnargeye lạṛhạima, ente uniyakʼ pinḍge rạputʼ giḍi ocoakana.” 32En hilokʼ Gideonakʼ ńutum uni do Jerubakʼale dohoketʼtaea (mane do “Bakʼalge uni tulucʼe lạṛhạima”). Ar Gideon do Bakʼal debotawakʼ pinḍe rạputʼ giḍiletʼte Joase menkeda, “Gideon upạrte Bakʼalge uni tulucʼe lạṛhạima. ”
33Ar Midiạnrenko, Amalekiko ar purub disạmren lạṛhại phạdko jotoko mitʼente jordan gaḍako paromkeda ar Jisreyel buru nalare senkateko ḍerayena. 34Unre Probhu Isorren Jiu do Gideone daṛe ocokedea. Ar Gideon do sakwae oroṅkeda ar Abieser gusṭirenko acʼ ṭhen hecʼkateko jarwayena. 35Uni do Manase gusṭirenko ṭhen hõ khobore kolkeda ar onko hõ uni ṭhenko jarwayena. Uni do Aser, Sebulon ar Napthali gusṭirenko ṭhen hõ khobore kolkeda ar onko hõ daramko lạgitʼko oḍok hecʼena.
36-37Unre Gideon do Isore metadea, “Ńelme, iń do khạrạire bhiḍi upʼ iń dohoyeda. Amakʼ gokʼakʼ lekate ińakʼ tite Israelko bańcaoko lạgitʼem ṭhik dohoakatʼ enḍekhan eken ona upʼ cetanrege sisir paṛaokʼma ar sarecʼ jaegako do rohoṛge tahenma. Enḍekhaniń bujhạu daṛeakʼa, amem menakatʼ lekage ińakʼ tite Israelkom bańcaokoa.” 38Ar onkage hoyena; dosar hilokʼ Gideon do ạḍi setakʼre jạpitʼ khon beretʼkate ona bhiḍi upʼe hotʼkeda ar sisir dakʼ oḍokena. Ar onate mitʼ bạṭi dakʼ hoyena.
39Ona tayom Gideon do Isore metadea, “Iń cetanre alom raṅgaokʼa. Iń do eken ar mitʼ dhaoiń biḍạumea. Ńitokʼ do bhiḍi upʼ rohoṛge tahenma ar otre do sisir ńurhạkʼma. ” 40Enhilokʼ ńindạ Isor do onageye onkakeda. Eken bhiḍiyakʼ upʼ moto rohoṛ tahẽyena ar sarecʼ joto jaegare do sisir ńurhạyena.
Currently Selected:
Bikʼcạrko 6: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
