Bikʼcạrko 13
13
Samson reakʼ janamokʼ
1Israel hoponko do Probhu Isorakʼ nońjorre oka bạṛicʼakʼkan onage kạmiko ehopʼena. Onate Probhu Isor do pongel bochor hạbicʼ Philisṭikoakʼ gobolreye dohokatʼkoa.
2Onako dinre Sora atoren Manoho ńutuman Dan gusṭiren mitʼṭen hoṛe tahẽkana. Uniren oṛakʼ hoṛ do bạńjhigeye tahẽkante cele gidrạge bako tahẽkantaea. 3Probhu Isorren goḍet do uniren bạhu ṭhen ńel ocoyenteye menkeda, “Bạńjhigetem gidrạge bako hoyakantama, menkhan am dom bhạrti hoṛmokʼa ar mitʼṭen koṛa hoponem janamea. 4Am do sontor akae tahenme jemon darkha rasa se jãhãn bubulakʼ se chutakʼ jãhãnakʼge alom joma. 5#Num 6.1-5Ar okoe gidrạm janame uni do tishõ alom hoyo poṭorea, ente uni do janam khonge Isor ńutumte nạsri#13.5: Nạsri: Nạsri hoṛ do Isor ńutumte begar akan hoṛ kanae uni do darkha rasa se jãhãn bubulakʼ se chutakʼ cetʼge bae ńũiya ar upʼ hõ bae hoyo poṭorokʼa (arhõ ńelme Num 6.1-8).ye hoyokʼa. Uni do Philisṭikoakʼ ti khon Israelkoe bańcaokoa.”
6Unre maejiu do jãwãetetʼ ṭhen senkateye menkeda, “Isorren mitʼṭen hoṛ do iń ṭhene hecʼlena. Isorren goḍet lekage uniyakʼ muṭhạn do tahẽkana ạḍitetʼ botorge. Ar oka khone hecʼena ona do bạń kuli ledea ar uni hõ acʼakʼ ńutum do bae lạiyạdińa. 7Uni doe metadińạ, ‘am dom bhạrti hoṛmokʼa ar amren do mitʼṭen koṛa gidrại hoyokʼtama. Onate am do ńit khon darkha rasa se jãhãn bubulakʼ se jãhãn chutakʼ jinisko alom joma, ente janam khon gujukʼ hạbicʼ uni do Isor ńutumte nạsriye hoyokʼa.’ ”
8Niạ katha ańjomkate Manoho do Probhu Isor ṭhen niạ menkateye koekeda, “E Probhu Isor, nehõrokʼ kạnạń Isorren okoeṭakʼ hoṛ do ạliń ṭhenem kollede, uni do arhõ jemone hijukʼ ar okoeṭakʼ gidrại janamokʼ uni lạgitʼ cetʼ cekae jaruṛa ona jemone sikhạuliń.”
9Isor do Manohowakʼ koejoṅe ańjomketʼtaea ar Isorren goḍet do arhõ uni maejiu ṭhene hecʼena. Unre uni do khetreye duṛupʼakan tahẽkana, ar unre acʼren jãwãetetʼ do onḍe bae tahẽkana. 10Onate uni maejiu do usạra senkate acʼren jãwãetetʼe metadea, “Enhilokʼ okoeṭakʼ hoṛ iń ṭhene ńel ocolen uniye hecʼakana.”
11Niạ katha ańjomkate Manoh doe beretʼena ar bạhutetʼ sãote uni hoṛ ṭhen senkateye metadea, “Ińren oṛakʼ hoṛ sãote okoeye galmaraoletʼ uni do cetʼ am kangeam?”
Uniye menkeda, “Hẽ, uni kangeạń.”
12Manoho do uniye kulikedea, “Amakʼ kathako tinre purạukʼa unre gidrạ do cetʼlekan jione khemaoa ar uni do cetʼe kạmiya?”
13Probhu Isorren goḍete roṛ ruạṛkeda, “Amren bạhu okań men akawade ona reakʼ jotowakʼge jemon joton salakʼe manao. 14Darkha rasa khon oka hoyokʼ ona reakʼ cetʼge uni do bae jom ńũ daṛeakʼa. Darkha rasa se jãhãn bubulakʼ se jãhãn chutakʼ cetʼge bae jom daṛeakʼa. Ar okaṭakʼ iń hukum akawade ona mitʼke mitʼ manao hoyokʼtaea.”
15Unre Manoho do Probhu Isorren goḍete metadea, “Merom boda hoponakʼ jel isinkate ạuriliń ạguam hạbicʼ; am do thoṛa ghạṛicʼ tahẽ hataṛokʼme.”
16Probhu Isorren goḍete roṛ ruạṛkeda, “Iń ben sapʼ doholiń khan hõ abenakʼ jãhãn jomakʼ do bạń joma. Menkhan jeredokʼ samaṅokʼakʼ samaṅ ben menetʼ khan ona do Probhu Isor ńutumtege onkae ben.” Uni do Probhu Isorren goḍete tahẽkan Manoho do ona bae bujhạu daṛeada.
17Onate Manoho do Probhu Isorren goḍete kulikedea, “Amakʼ ńutum do cetʼtam? Ente amakʼ katha purạukʼre ạliń do amliń manotmea.”
18Uniye menkeda, “Ńutum do cedakʼem kuliyediń kana? Ińakʼ ńutum do okoege bako bujhạu daṛeakʼa.”
19Manoho do unre mitʼṭen merom boda ar uni sãote anaj samaṅokʼ jinisko ạgukate Probhu Isor ńutumte mitʼṭecʼ dhiri cetanreye samaṅkeda. Ar Probhu Isorren goḍet do unre mitʼṭecʼ hahaṛawakʼe kạmikeda, ar Manoho ar uniren bạhuttetʼ do onakin ńeletʼkan tahẽkana.
20Seṅgel reakʼ lepʼ tinre pinḍ khon cetante serma secʼ rakabokʼkan tahẽkana unre Probhu Isorren goḍet do ona lepʼ seṅgelte coṭteye rakapʼ calaoena. Ar noa ńelte Manoho ar uniren bạhuttetʼ do otrekin ombakʼ hapeyena, 21ar Manoho do unreye bujhạukeda, uni do Probhu Isorren goḍete tahẽkana mente. Ar Probhu Isorren goḍet do unkin ṭhen ar bae ńel ocolena.
22Unre Manoho ar uniren bạhuttetʼkin menkeda, “Alaṅ do Isorlaṅ ńelkedea, ar khạṭige laṅ gujukʼa.”
23Menkhan uniren bạhuttetʼe menkeda, “Probhu Isor do alaṅ gocʼlaṅ reakʼ monsubạge tahẽlentae khan alaṅakʼ tite jeredokʼ samaṅokʼakʼ ar anaj samaṅokʼakʼ do bae ataṅkea, se noako hõ bae ńel ocokelaṅa, se niạko katha hõ bae jạhirkelaṅa.”
24Tayomte maejiuren do mitʼṭen koṛa hopone hoyena ar uniyakʼ ńutum do Samsone dohoketʼtaea. Samson doe hara idiyena ar Isor do uniye bhoradea. 25Samson do tinre Sora ar Estaol tala reakʼ Mahan-dan ńutumanakʼ mitʼṭecʼ jaegareye tahẽkana unre Probhu Isorren Jiu do uniye uskurkedea.
Currently Selected:
Bikʼcạrko 13: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
