Hosea 5
5
Israel upạrte lại sorodokʼkan
1Probhu Isore meneda, “E naekeko, noa katha ańjompe. E Israelren hoṛko, moneyakʼpe. E raj bõsko, luturakʼpe baṛe. Noa ray do ape upạrtege emocokʼkana, ente ape do Mispare jhãmpa leka ar Taborre do tase akatʼ jhạli lekape hoylena. 2Huhulko do heṛan botorko santao kana, menkhan onko sanamkogeń sạjạikoa. 3Ephrayim reaṅ do jotogeń baḍaea; ar iń khon Israel do danaṅre bạnuiya. Ephrayim do ńitokʼe laṭghaṭetʼ kana; ar Israel doe bhonḍ akana.
4“Onkoakʼ kạmi do onkoren Isor secʼ bae ruạṛ ocoako kana. Onkore do laṭghaṭ reakʼ mon menakʼa. Probhu Isor do sạriyakʼte bako baḍae akadea. 5Israelakʼ bạḍạige onko upạrte gohae emetʼkana; Ephrayim, se goṭa Israel do akoakʼ kại iạteko tohodokʼkana ar Jihudạ hõ onko sãoteye tohodotʼ bhindạṛokʼ kana. 6Onko do akoren bheḍa ar ḍaṅgra palkoante Probhu Isor ṭhenko senlenre uni do bako ńamekana; onko khon acʼ doe ocogokʼkana. 7Onko do Probhu Isor ṭhen bepạtiạranko hoyakana; onko do bidhuạ gidrạko janametʼkoa. Ar onatege ńitokʼ molokʼ cando do onkoakʼ porobkoe lakopʼtakoa akoakʼ khet baṛge sudhạ.
8“Ape do Gibiạre siṅgạ ar Ramare do pẽpṛẽtʼpe oroṅeda. Ar Beth-Abnere do hohoatepe meneda, ‘E Benjamin, lạṛhại baṛe ạyur bonme.’ 9Sạjại emakʼ dinre Ephrayim do ujạṛokʼakʼ hoyokʼa. Ar okaṭakʼ do hoyokʼte hõ hoyokʼge ona do Israel gusṭirenko talareń lại sodoretʼkana. 10Jihudạren mukhiyạko do simạna dhiri ocokʼko leka kanako. Ińakʼ edre do onkore banbạsi lekageń paṛao ocoya. 11Ephrayim do acʼakʼ kusileka michạwakʼe pańjayeda uni doe santao ocokʼkana ar bicạrreye lebetʼ gańjao ocoakana. 12Ephrayimko ṭhen do tejo leka ar Jihudạren hoṛko ṭhen do heṛ akan jinis lekageń hoyakana.
13“Ephrayim do tinre acʼakʼ roge ńelkeda ar Jihudạ do acʼakʼ ghaoko unre Ephrayim do Ạsur secʼ ạcur ruạṛkate goṛo ńam lạgitʼ uni maraṅ raj ṭhen hoṛe kolketʼkoa. Menkhan uni do rog hõ bae boge daṛeataea ar uniyakʼ ghaoko hõ bae bes daṛeakʼa. 14Ephrayim ṭhen ar Jihudạ ṭhen do dhạcri kul lekageń hoyokʼa. Unkin doń or cirạkinạ ar kaṭra kuṭrạkateń bạgi oṭoạkinạ. Iń do unkiniń idikinạ ar unkin bańcaokin lạgitʼ do celege bako tahena. 15Ar tin hạbicʼ onko do akoakʼ dos bako aṅgoc ar iń secʼ bako moneyakʼ unhạbicʼ iń do ińakʼ jaegate ruạṛ senkate onḍeń tahena. Onkoakʼ duk kosṭore onko do gagoj salakʼ iń ṭhenko ruạṛ hijukʼa.”
Currently Selected:
Hosea 5: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
