Genesis 41
41
Pharaoakʼ kukmũ reakʼ bhed
1Noa bar bochor tayom Pharao do mitʼṭecʼe kukmũkeda. Uniye ńelkeda, acʼ do Nil gaḍa aṛereye teṅgo akana, 2ar hahaṛa reakʼ katha do noage, gaḍa khon unre eae goṭen ńelokʼte mońj, moṭa soṭa gạiko rakapʼ hecʼente pạṭiol (nol) ghãsre ạtińko ehopʼena. 3Onko tayom ona gaḍa khon arhõ eae goṭen morotʼ morotʼ gạiko rakapʼ hecʼena. Onko do ńelokʼte roga ar hirkhạgeko tahẽkana. Ar rakapʼ hecʼkate gaḍa aṛeren eṭakʼ gạiko sorreko teṅgoyena. 4Ona tayom onko roga ar hirkhạge ńelokʼ gạiko do onko eae goṭen mońj, moṭa soṭa gạiko utʼketʼkoa. Ar ona tayom Pharao doe ebhenena.
5Uni do arhõe jạpitʼ ruạṛkeda ar dosar dhao kukmũye ńelkeda. Uni doe ńelkeda mitʼṭecʼ guhum budạre eae goṭecʼ bhage gele geleyena. 6Ar ona tayom do arhõ eae goṭecʼ copa copa geleyena. Onako do purub reakʼ hoete tolmocʼge tahẽkana. 7Ona copa copa geleko do ona eae goṭecʼ danawanakʼ gelekoe utʼgotʼkada. Ar ona tayom Pharao doe ebhenena. Uni doe bujhạukeda, okaṭakʼe ńelketʼ ona do eken kukmũ kana mente.
8 #
Dan 2.2
Menkhan setakʼ secʼ uniyakʼ mon do khad badaoentaea. Uni do hoṛ kolkate Misor disạmren sanam gonokko ar muhnidarko ar gunidarkoe hoho ạgu ocoketʼkoa. Ar okaṭakʼ kukmũe ńelakatʼ onae lạiyatʼkoa, menkhan celege ona reakʼ bhed do bako lại daṛeada. 9Unre Pharaoren darkha rasa dudulicʼe menkeda, “Maharaj, teheń ińakʼ mitʼṭecʼ dusi reakʼ katha disạ hecʼạdińa. 10Mitʼ dhao Maharaj do acʼ oṛakʼren guti-kạ̃ṛmĩko cetanreye raṅgaolena. Unre uni do rajakʼ kạd oṛakʼre piṭhạ bekʼnaokoren sordar sãote iń hõ bondikateye doholedińa. 11Unre mitʼ ńindạte bana hoṛ apan ạpin mitʼṭecʼkate liń kukmũkeda. Ar banar kukmũ reakʼge manetetʼ tahẽkana. 12Unre rurukhiyạ dol sordarren mitʼṭen Ibri guti koṛa hõ onḍeye tahẽkana. Ar bana hoṛge ạlińakʼ kukmũ reakʼ katha uni liń lạiyadea. Unre uni do bana hoṛge kukmũ reakʼ bhede lạiyatʼlińạ. 13Ar ạlińakʼ kukmũ reakʼ oka bhede lạiyatʼliń ṭhik onkage jotowakʼ do hoyena. Maharaj do arhõ ińakʼ kạmireye bahal dohṛakedińa menkhan piṭhạ benaoren sordar doe pạsikedea.”
14Unre Pharao do Joseph hoho ạguye lạgitʼ hoṛkoe kolketʼkoa, ar onko do usạra senkate kạd oṛakʼ khon uniko oḍok ạgukedea. Ar Joseph do goco hoyo saphakate kicricʼkoe bodolketʼte Pharao ṭhene hạjirena. 15Unre Pharao do Josephe metadea, “Iń do mitʼṭecʼ kukmũń ńel akada, menkhan okoe hõ ona reakʼ mane do bako lại daṛe ạdińa. Ińiń ańjom akada, kukmũ reakʼ katha lạiyam khan am do ona reakʼ manetetʼem lại daṛeakʼa.”
16Joseph do Pharaoe metadea, “Ona reakʼ daṛe do bạnukʼtińạ. Menkhan Isor do Maharajakʼ kukmũ reakʼ manetetʼe lạiyaea ar uniyakʼ monre suluke danaea.”
17Unre Pharao do Josephe metadea, “Kukmũteń ńelkeda, iń do Nil gaḍa aṛereń teṅgo akana, 18ar hahaṛa reakʼ do noage, gaḍa khon eae goṭen bhage moṭa soṭa gạiko rakapʼ hecʼente pạṭiol (nol) ghasre ạtińko ehopʼena. 19Ona tayom arhõ eae goṭen gạiko rakapʼ hecʼena. Onko do ńelokʼte roga ar hirkhạgeko tahẽkana. Goṭa Misor disạmre ńelokʼte nonka hirkhạ gại do ar okare hõ bako ńelakana. 20Tayomte onko roga, ar ńelokʼte hirkhạ gạiko do lahaten onko eae goṭen moṭa soṭa gạiko utʼketʼkoa, 21menkhan onko ńelte baṅ bujhạulena, onko moṭa soṭa gạiko utʼ ocoyena mente, ente onko do lahate lekageko ńelena. Ar ona tayom do jạpitʼ khoniń ebhenena. 22Tayomte iń do arhõń kukmũ dohṛakeda. Ar kukmũteń ńelkeda mitʼṭecʼ budạre eae goṭecʼ maraṅ ar danawanakʼ guhum geleyena. 23Ar ona tayom do eae goṭecʼ copa copa geleyena. Ar onako do purub reakʼ hoete tolmocʼena. 24Ar eae goṭecʼ copa copa gele do ona danawanakʼ gelekoe utʼkeda. Iń do noako katha gonokkoń lạiyatʼkoa, menkhan celege noa reakʼ mane do bako lại daṛeạdińa.”
25Unre Joseph do Pharaoe metadea, “Maharajakʼ noa banar kukmũ do mitʼgea. Isor okae ceka lạgidokʼkan onage Maharaj ṭhene sodor akada. 26Eae goṭecʼ moṭa soṭa gại reakʼ mane do hoyokʼ kana eae bochor ar danawanakʼ eae goṭecʼ guhum gele reakʼ mane hõ eae bochor kana. Amakʼ banar kukmũge mitʼgea. 27Tayomte oneko rakapʼ hecʼen eae goṭecʼ roga, ar ńelokʼte hirkhạ gạiko ar purub reakʼ hoete tolmocʼ akan eae goṭecʼ copa gele, noa banar reakʼ mane do hoyokʼkana akal reakʼ eae bochor. 28Isor okae cekae lạgidokʼkan ona do Maharaje udukʼ akawadea, ar ona kathage iń do Maharaj ṭheniń lạiyeda. 29Goṭa Misor disạmre nonkan sãwãe eae bochor hijukʼkana one unre ḍher phosolko arjaokʼ, 30ar ona tayomge eae akal bochor hijukʼ kana. Unre ḍher arjao akan phosol reakʼ katha hoṛkoakʼ mon khon ocogokʼa, ente noa akal iạte disạm do jarkhar cabakʼa. 31Noa akal iạte disạm reakʼ bhage din reakʼ kathako hoṛkoakʼ monre disạ baṅ tahena. Noa do maraṅ akalge hoyokʼa. 32Noa kukmũ do Maharaj bar dhaoe ńel ocoakana. Noa reakʼ mane do hoyokʼkana, Isor doe niṭ dohoakada ar hako pakoge ona doe hoeocoya.
33“Ona iạte Maharaj ńitokʼ nonkan mitʼṭen akelan ar bujhạntar hoṛ bachao joṅme. Ar uni cetanre Misor disạm reakʼ bhar dohoyme. 34Ona chaḍa eṭakʼ kạmiyạko hõ uni sãote dohokom. Disạmre eae bochor tinre bạ̃ṛti phosol hoyokʼa, unre jemon mõṛẽ hĩs reakʼ mitʼ hĩsko hatao. 35Ar onako din lạgitʼ bạ̃ṛti phosolko jarwaete onko do tayom daram jom lạgitʼ Maharajakʼ tabere mimitʼ nagrahare onako doho jarwaete rukhiyại reakʼko bebostae. 36Eae bochor Misor disạmre oka akal hoyokʼ unre jomakʼ lekate phosol jemon doho jarwakʼ ar akalre disạmren hoṛ jemon aloko gujukʼ.”
Joseph do Misorren disạm cakʼlaoicʼe hoyen
37Josephakʼ noa bebosta reakʼ katha do Pharao ar uniren sanam kạmiyạko ṭhen bhagege bujhạuena. 38Pharao do acʼren kạmiyạkoe metatʼkoa, “Nui hoṛre nonkanakʼko menakʼa one okaṭakʼ do noa dhạrti reakʼ baṅkan. Nui leka do okoe bon sendra ńamkea?”
39Niạ tayom Pharao do Josephe metadea, “Isorge jotowakʼkoe baḍae ocoakatʼmea ar am lekan bujhạntar ar ạkilan hoṛ do celege bạnukʼkoa. 40#Apos 7.10Onate amge raj oṛakʼ reakʼ sanamakʼ bhar do hataome. Ar ińren sanam porja do amakʼ hukum lekageko senokʼa. Iń do eken raj lekate am cetanreń tahena.” 41Pharao do Joseph arhõe metadea, “Disạime, iń do goṭa Misor disạm cetanre amgeń dohoketʼmea.”
42 #
Dan 5.29
Ona tayom Pharao do acʼakʼ ti khon mohor chapakatʼ mundạm bocʼkate Josephe horokʼadea. Ar mońj utạrakʼ kicricʼe emadea ar hoṭokʼre sona reakʼ mala hõe horokʼadea. 43Noa tayom Joseph do acʼakʼ rajosṭi reakʼ dosarakʼ rãt gạḍireye duṛupʼkedea. Ar gạḍi calakʼ oktere Joseph laha lahateko roṛ sodorkeda, “Ikhṛumokʼpe, ikhṛumokʼpe.” Ar nonkate Pharao do goṭa Misor disạm reakʼ bhar Joseph cetanreye dohokeda.
44Tayomte uni do Josephe metadea, “Ńitʼ hạbicʼ raj minạńrehõ enhõ goṭa Misor disạmren hoṛ do amakʼ hukum lekage duṛupʼ arko teṅgona.”
45Pharao do Josephakʼ nãwã ńutum Sapnat Paneahe dohoketʼtaea. Ar On nagraharen naeke Poṭipheraren hoponerat Asnat tulucʼ Josephe baplakadea. Noa tayom Joseph do goṭa Misor disạm dãṛãn lạgitʼe oḍokena.
46Joseph do tinre Misorren raj Pharaoakʼ kạmireye bahal ocoyena unre uniyakʼ umer do pegel bochor tahẽkana. Uni do Pharaoakʼ raj dorbar khon oḍokkate Misor disạm reakʼ sanam jaegae dãṛã ạcurkeda. 47Ar ona eae bochor Misor disạmre asambheṛ phosol hoyena. 48Unre Joseph do ona eae bochor hạbicʼ Misor reakʼ ḍher arjawakʼ phosolko do nagraha reakʼ gola oṛakʼkoreye dohokeda. Uni do mimitʼ nagraha ar ona beṛhaeteakʼ khetko khon phosol ạgukateye jarwa ocokeda. 49Nonkate uni do jalapuri reakʼ gitil leka asambheṛ jomakʼe doho jarwakeda. Ar nunạkʼ ḍher phosol dohoyena je, ona do soṅ khon hõ ḍherge tahẽkana. Onate uni do ar bae soṅleda.
50Akal lahare On nagraharen naeke Poṭipheraren hoponera Asnatakʼ kukhire Josephren barea gidrạkin janamena. 51Joseph do maraṅicʼ hoponakʼ ńutum Manaseye dohoketʼtaea (metakʼme “Hiṛińkakʼ”). Uniye menkeda, “Isor do ińakʼ sanam duk ar iń babawakʼ oṛakʼ reakʼ katha ińakʼ mon khone ocokʼakada.”
52Ona tayom dosaricʼ hoponakʼ ńutum do Ephrayeme dohokeda (metakʼme “Joanakʼ ”) Uniye menkeda, “Oka disạmre iń do dukiń ńamketʼ ona disạmrege Isor doe jo baha ocoakadińạ.”
53Inạ tayom Misor disạm reakʼ ḍher phosol reakʼ ona eae bochor do cabayena. 54#Apos 7.11Ar ona tayom do akal reakʼ eae bochor ehopʼena. Ar Josephakʼ katha lekage jotowakʼ hoyena. Aḍe pase disạmko hõ noa akal khon rukhiyạ bae ńamleda, menkhan Misorre do okare hõ jomakʼ reakʼ okulạn baṅ tahẽkana. 55#Jhn 2.5Ar Misor disạmren hoṛ do tinre reṅgecʼreko paṛaoena ar Pharao ṭhen jomakʼko koekeda unre Pharao doe metatʼkoa, “Joseph ṭhen calakʼpe. Ar uni okaṭakʼe metape, ona baṛe onkaepe.”
56Noa akal do goṭa disạmrege pasnao idiyena. Ar tinre maraṅ akal hoyena unre Joseph do sanam murại oṛakʼkoe jhicʼkeda ar Misorrenko ṭhen jomakʼe ạkhrińkeda. 57Ar eṭakʼ disạmkore hõ maraṅ akal hoyena, onḍenko hoṛ hõ Joseph ṭhen khon jomakʼ kiriń idijoṅ lạgitʼ Misorte hijukʼko ehopʼena.
Currently Selected:
Genesis 41: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
