Exodus 4
4
Isor do Mose hahaṛa daṛeye emaekan
1Menkhan Mose do roṛ ruạṛketʼteye menkeda, “Israelko bako pạtiạuạń ar ińakʼ katha jodi bako ańjomtiń? Onkoko mendaṛeakʼa, ‘Probhu Isor do am ṭhen bae ńel ocoakana.’ ”
2Unre Probhu Isor do uniye metadea, “Amakʼ tire ona do cetʼ kana?”
Uniye menkeda, “Mitʼṭecʼ ṭheṅga kana.”
3Probhu Isore menkeda, “Ona do otre giḍiyme.”
Mose do ṭheṅga otreye giḍiketʼ sãote ona do mitʼṭen bińe hoyena. Ar Mose do ona ńelteye dạṛetʼkan tahẽkana. 4Menkhan Probhu Isor do Moseye metadea, “Amakʼ ti tiạrtam ar canḍbol sabme.” Adoe sapʼketʼ khan ona do arhõ ṭheṅga ruạṛena.
5Ona tayom Probhu Isore menkeda, “Noam onkaea jemon onkoko pạtiạukʼ, onkoren hapṛam Abraham, Isahak ar Jakobren Probhu Isor do sạrige am ṭhene ńel ocoakana.”
6Probhu Isor do arhõ uniye metadea, “Amakʼ ti do ḍanḍa totolakʼ cetanre menakʼ kicricʼ reakʼ bhãj bhitrire dohoyme.” Mose do onkageye kạmikeda. Menkhan tiye oḍokketʼ khan uniyakʼ ti do ponḍge murhucʼ jom rog leka ńelena. 7Unre Probhu Isore menkeda, “Amakʼ ti do arhõ onḍege doho ruạṛme.” Mose do arhõe onkakeda. Menkhan tinre tiye oḍokketʼtaea unre uniyakʼ ti do hoṛmo reakʼ eṭakʼ hạṭińko leka mońjge hoyena.
8Unre Probhu Isore menkeda, “Onko bako pạtiạuam se pạhilakʼ cinhạ reakʼ jãhãn dam bako emam enḍekhan onko do hoedaṛeakʼa dosarakʼko pạtiạuakʼa. 9Menkhan onko ona banar reakʼ okaṭakʼge bako pạtiạuakʼ se amakʼ katha bako luturakʼ enḍekhan am do Nil gaḍa khon thoṛa dakʼ rakapʼkate otrem dula. Onate dakʼ do otre mãyãm leka hoyokʼa.”
10Mose doe menkeda, “Menkhan E Probhu Isor, iń do rawal moca hoṛ doń baṅkana. Lahatehõ bạń roṛ daṛeakʼ kan tahẽkana ar am sãote katha roṛ tayom hõ bạń daṛeakʼ kana. Ińakʼ mocare katha do aṭkaokʼtińa, ente ińakʼ alaṅ do hamalgetińạ.”
11Menkhan Probhu Isor do uniye metadea, “Manwakoakʼ moca do okoeye benao akada? Okoe uni doe kala, guṅgạ are kãṛã ocoakadea? Ar ńeńel lạgitʼ daṛe do okoeye emakawadea? Uni do cetʼ iń Probhu Isorgeń baṅkana? 12Ńitokʼ do calakʼme. Ińge katha roṛ lạgitʼ iń goṛowama ar okaṭakʼ roroṛ hoyokʼtam ona hõń cetʼama.”
13Moseye roṛ ruạṛkeda, “E Probhu Isor, ińiń nehõram kana, jãhãe hotete noa khobor baṛe kolme.”
14Noa katha ańjomkate Probhu Isor do Mose cetanreye edreyena. Uni doe menkeda, “Amren dadam Liwi Aron do cetʼ bạnuiya? Ińiń baḍaea uni do ạḍi napae katha roroṛe baḍaea. Uni do am tulucʼ ńapamokʼ lạgitʼe hijukʼ kana. Are ńellem khan uni do ạḍiye kusikʼa. 15Ar tinre uni sãote katham roṛa unre unim lạiyaea cetʼ roroṛ hoyokʼtaea mente. Iń do aben bana hoṛge katha roṛ lạgitʼ iń goṛoabena ar cetʼ cekae hoyokʼa ona hõń cetʼabena. 16Am huyạte Aronge hoṛko sãote kathae roṛa, jemon uniyakʼ mocage amakʼ moca ar am do uniren Isor lekam hoyokʼa. 17Amakʼ noa ṭheṅga do iditoraeme ar ona hotetege onako hahaṛa kạmi dom kạmiya.”
Mose Misorteye mohnḍakʼkan
18Noa tayom Mose do acʼren hońhartetʼ Jethro ṭhen ruạṛ senkateye metadea, “Misor disạmre ińren peṛa pạrbhạko ṭhen ruạṛ sen ocoạliń ben. Ạliń do senkate liń ńelkoa ńit hõ jiwetʼ menakʼkoa se baṅa.”
Jethro do Moseye metadea, “Ṭhikgea Do calakʼben, ar abenakʼ bhạlạiy hoyokʼ taben ma.”
19Midiạn disạmre tahenrege Probhu Isor do Moseye metade tahẽkana, “Am do ńitokʼ Misorte ruạṛ calakʼme. Ente okoeko hoṛ am gocʼmeko menetʼ tahẽkan onko do celege ar jiwetʼ bạnukʼkoa.”
20Unre Mose do acʼren bạhu ar gidrạko gadhareye decʼketʼkote Misor disạmteye ruạṛ calaoena. Ar Isorakʼ ona ṭheṅga hõe iditorakeda. 21Probhu Isor do Moseye metadea, “Okako hahaṛa kạmi lạgitʼ daṛeń ematʼme ona do Misor disạmte ruạṛ senkate Pharao samaṅrem onkaea. Menkhan uniyakʼ mon nonkań keṭecʼ ocoytaea onate uni do hoṛko bae sen ocoakoa. 22Ona tayom am do Pharaoem metaea, Probhu Isore meneda, ‘Israel doe ińren pạhilicʼ hopon kana. 23#Exo 12.29Ińiń metatʼme tahẽkana ińren pạhilicʼ hopon do sen ocoaeme jemon ińe sewa daṛeạń. Menkhan bam sen ocoadete amren pạhilicʼ hoponiń gojea.’ ”
24Misorte calakʼ hor reakʼ mitʼṭecʼ ḍerare Probhu Isor do Mose goje lạgitʼ uni samna sạmniye hecʼena. 25Unre Sipora do mitʼṭecʼ dharanakʼ dhirite acʼren gidrạwakʼ laha hartae getʼketʼtaea. Ar Moseyakʼ jaṅga#4.25-26: Jaṅga: Noa “jaṅga” adomko do herel hoṛakʼ hereltetʼ tulucʼ hõko juriyetʼkana. ṭhene capatʼgotʼkada are menkeda, “Am do mãyãmte ńamicʼ ińren jãwãekanam.” 26Unre Probhu Isor do Moseye aṛakʼkedea. Khatna babotre Sipora do ona kathageye menleda.
27Inạ tayom Probhu Isor do Arone metadea, “Hahaṅkarre senkate am do Mose tulucʼ ńapamokʼme.” Unre uni doe calaoena ar Isorakʼ burure Moseye ńamkedea are cokʼadea. 28Ar Probhu Isor okaṭakʼ memen lạgitʼe kolakade Aron do onae baḍae ocokedea. Ona chaḍa okako hahaṛa kạmi reakʼ hukum Probhu Isore emakawade ona hõe lạiyadea.
Misor disạmre Mose ar Aron
29Ona tayom Mose ar Aron do Misorte senkate Israelren sanam murubbikin jarwaketʼkoa. 30Probhu Isor do Mose okaṭakʼ kathae metade tahẽkan ona sanamakʼge Arone baḍae ocokedea ar hoṛko samaṅre ona hahaṛa kạmikoe udukʼkeda. 31Onate Israelko doko pạtiạuena. Ar tinreko ańjomkeda, Probhu Isor do Israelkoakʼ duk sasete ńelakada ar onkoe hiriakatʼkoa unre onko do otre ombakʼkate Probhu Isorko sewawadea.
Currently Selected:
Exodus 4: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
