Exodus 15

Mose ar Mạriạmakʼ sereń

1 # Sod 15.3 Noa tayom Mose ar Israelko do Probhu Isor ńutumte noa sereńko sereńkeda:

“Iń do Probhu Isor ńutumteń sereńa,

ente hoṛkoakʼ mẽtʼre uniyakʼ ṭhonok maraṅentaea.

Sadom ar aswari dolrenko do

unige jalapuri reakʼ dakʼreye giḍikatʼkoa.

2 # Ser 118.14; Jes 12.2 Probhu Isorge ińakʼ daṛe, unige ińakʼ sereń do;

ińakʼ bańcao do unirege menakʼa.

Probhuge ińren Isor do;

uniyakʼgeń sarhao sereńa.

Uni do iń ạpuńren Isor kanae;

uniyakʼ ṭhonok reakʼ iń sereńa.

3Uniyakʼ ńutum do Probhu Isorge, uni doe lạṛhại bir kana.

4Pharaoakʼ rãt gạḍiko ar palṭonko do

unige jalapuri reakʼ dakʼreye giḍikatʼkoa;

Pharaoren bachao akan palṭonko do

arakʼ jalapurireko unum gocʼena.

5Onko do khạndri dakʼreko loṭomena

dhiri leka jalapurireko tạpukʼena.

6“E Probhu Isor, ektiạrite perecʼ amakʼ ona jojom ti do,

hẽ ona jojom ti do bạirikoe chaka chunketʼkoa.

7Okoe am upạrteko teṅgoyen

amakʼ maraṅ ṭhonokte

onko do latartem giḍikatʼkoa;

ar amakʼ jal jalaokʼkan edre do

busupʼ leka onkoe lo maraoketʼkoa.

8Amakʼ sãhetʼte

dakʼ do jarwayena.

Ar ḍheokote perecʼ dakʼ do

ḍhipi leka teṅgoyena,

ar athantar dakʼ do jalapurire jomaṭ badhaoena.

9“Bạiri doe menkeda, ‘onkoń khudạukoa, ariń sapʼkoa,

ar onkoakʼ jiniskoń hạṭińjoṅa;

iń do onkoakʼ jiniskote apnar iń perejokʼa.

Ar tarwaṛe sapʼkate onkoń khudạukoa.’

10Menkhan am dom oṅketʼte hoeyem ạgukeda,

ar jalapuri hõ onkoe loṭomketʼkoa.

Onko do khạndri dakʼre sisạ lekako tạpukʼena.

11“E Probhu Isor,

Debko modre am leka do okoe menakʼkoa?

Okoe menakʼkoa am leka sonot ar ṭhonokanicʼ

ar sarhao sereńkore botoranicʼ do?

Ar hahaṛawakʼ kạkʼmiyicʼ hõ okoeyakʼ menakʼtaea?

12Am do amakʼ jojom tiyem tiạrketʼtama,

ar dhạrti do onkoe utʼketʼkoa.

13Amakʼ asambheṛ dulạṛtem chaḍao ạguketʼkoa

ar amge onko dom ạyurkoa.

Apnarakʼ daṛete amakʼ sonot oṛakʼre

amgem ạyur ạgukoa.

14Ona katha ańjomkate eṭakʼ jạtrenko do botorteko thar tharaokʼa,

ar Philisṭiko do monreko dhak dhakaokʼa.

15-16Edomren sordarko do botorteko keklesedokʼa;

ar Moabren mukhiyạko doko thar tharaokʼa,

ar botoranakʼ samaṅreko paṛaokʼte

Kananrenko do dilko adtakoa.

E Probhu Isor, amren hoṛkoakʼ sen joṅakʼ

ạuri mucạdokʼ hạbicʼ,

amren chaḍao akan hoṛkoakʼ sen joṅakʼ

ạuri mucạdokʼ hạbicʼ

amakʼ maraṅ daṛe samaṅre

onko jạtrenko do dhiri lekako ńur tahena.

17Amge amren hoṛko ạgukate poha leka

amakʼ bururem rohoekoa.

E Probhu Isor, am apnar tite benaoakʼ

onage amakʼ tahen oṛakʼ do;

E Probhu Isor, amakʼ tite benaoakʼ

onage amakʼ tahen ṭhạ̃i do;

18E Probhu Isor, jaejug hạbicʼ amgem rajokʼa.”

Mạriạmakʼ sereń

19Pharaoren sadomko, rãt gạḍiko ar aswariko tinre jalapurireko boloyena unre Probhu Isor do jalapuri reakʼ dakʼ onko cetanreye ạgu ruạṛkeda. Menkhan Israelko do jalapuri talate kuṭhạ̃ṛgeko taṛam paromena.

20Aronren miserat Mạriạm do mitʼṭen maejiu nạbigeye tahẽkana. Uni do toblae sapʼkeda, ar uni tayom tayomte eṭakʼ maejiuko hõ tobla sapʼkate enecʼ enecʼteko oḍok hecʼena. 21Moseyakʼ sereń reakʼ roṛ ruạṛre Mạriạm do noa sereńe sereńkeda;

“Ape do Probhu Isor ńutumte sereńpe,

ente hoṛkoakʼ mẽtʼãhãre uniyakʼ ṭhonok do maraṅena.

Sadomko ar aswariko do

unige doreão dakʼreye khadleketʼkoa.”

Dakʼ reakʼ bebosta

22Tayomte Mose do arakʼ jalapuri khon Israelkoe idiketʼkoa. Onko do pạhilre Sur ńutuman mitʼṭen hahaṅkar jaegareko seṭerena. Ona hahaṅkar jaegare onko do pe din hạbicʼ dãṛã dãṛãte okarehõ dakʼge bako ńamleda. 23Tayomte onko do Mara#15.23: Mara: Noa reakʼ mane do “haṛhatʼ.” ńutumanakʼ mitʼṭen jaegareko seṭerena, menkhan onḍenakʼ dakʼ do haṛhatʼgete bako ńũ daṛeada. Onate ona jaega reakʼ ńutum do Marako dohokeda (metakʼme “haṛhatʼ ”). 24Ar hoṛko do Mose upạrte karacʼ kurucʼenteko menkeda, “Ńitokʼ ńũi reakʼ dakʼ do okarele ńama?”

25Noa katha ańjomkate Mose do Probhu Isor ṭhene rakʼkeda. Uni do Mose mitʼṭen dareye udukʼadea. Mose do dakʼre ona dareye topoketʼ khan dakʼ do ńũi lek hoyena.

Probhu Isor do onḍe biḍạureye paṛaoketʼkote onko lạgitʼ mitʼṭecʼ niạm ar ạne bandhaokeda. 26Uni doe metatʼko tahẽkana, “Ape do aperen Probhu Isorakʼ kathape bataotaea ar uniyakʼ mẽtʼre oka lek reakʼ kan onape onkaea ar uniyakʼ hukumkope luturakʼa ar uni emakʼ sanam niạmpe dohoya, enḍekhan Misriko cetanre okako rog iń ạguletʼ ape cetanre ona bạń ạguya. Ar iń Probhu Isorge ape doń bogepea.”

27Niạ tayom onko do Elimko metakʼ mitʼṭecʼ jaega ṭhenko seṭerena. Onḍe do gelbar goṭecʼ dakʼ jharna ar eae goṭecʼ khijur dare tahẽkana. Ona dakʼ jharna sorrege onko doko ḍerayena.

Currently Selected:

Exodus 15: SBT

Highlight

Copy