Dosar Biboron 28

Bebatao reakʼ jo

(Levitikus 26.3-13; Dosar Biboron 7.12-24)

1 # Bib 11.13-17 “Aperen Probhu Isorakʼ purạ batao akaepe tahen ar teheń okań hukumapekan ona joton salakʼpe dohoy, enḍekhan dhạrtiren eṭakʼ jạtrenko khon ape doe usulpea: 2Ape do aperen Probhu Isorakʼ kathare batao akaepe tahen enḍekhan noako sanamakʼ bhorpe ńama ar ona do ape sãote hõ tahena.

3“Apeakʼ tahen ṭhạ̃i ar khet-baṛgeko reakʼ jotowakʼ cetanre bhor paṛaokʼa.

4“Ar bhorpe ńamte apeakʼ gharońjren hopon ar hoponerako hõ bhoranko hoyokʼa, ar apeakʼ khet baṛgere ḍher phosol hoyokʼtapea ar mĩhũ- merom ar bhiḍiko hõ ḍherko bạḍokʼtapea.

5“Apeakʼ phosol reakʼ khạclạkʼ ar holoṅ reakʼ ḍạlicʼ hõ bhoranakʼ hoyokʼa.

6“Ar din hilokʼ jionre bhorpe ńama.

7“Bạiri lekate okoe ape upạrteko teṅgokʼ onko do Probhu Isorgeye nonkakoa jemon ape ṭhenko bhagao ocokʼ. Onko do mitʼ horte apere jhãpko ema menkhan eae horteko dạṛ pạnḍuja.

8“Apeakʼ murạiko cetanre Probhu Isorakʼ bhor tahena ar jãhãnakʼrege hatpe em onarege uni doe jo-baha ocoytapea. Aperen Probhu Isor do acʼakʼ noa disạmregeye bhorapea.

9“Aperen Probhu Isorakʼ kathakope manao arpe ganao ar uniyakʼ hortepe taṛam enḍekhan uni do acʼakʼ gokʼakʼ lekate, acʼren begar akan jạtrenko lekateye teṅgo rakapʼpea. 10Unre dhạrtiren sanam jạtrenko ńela, Probhu Isorakʼ ńutum iạtege apeakʼ oprom do hoyokʼa, ar onate apeko botorapea. 11Ar okaṭakʼ disạm emape reakʼ Probhu Isor do aperen hapṛamko ṭhene gokʼletʼ ona disạmre ạḍiye bhorapea, metakʼme apeakʼ gharońjkoren hopon ar hoponerako do bhoranko hoyokʼtapea, mĩhũ, merom ar bhiḍiko hõ ḍherko bạḍokʼa ar khetre hõ ḍher phosol hoyokʼtapea.

12“Apeakʼ disạmre okte nạpitre dakʼkoe kolte apeakʼ sanamakʼ kạmiko lạgitʼ Probhu Isor do acʼakʼ murại khon, metakʼme sermae jhicʼapea. Onate aema jạtrenko rinpe emakoa, menkhan ape do okoe ṭhen khon hõ rin bape hataoa. 13Probhu Isorgeye nonkae hoeocoya jemon sanamko khonpe usulokʼ, metakʼme jaṅga latarre do bae dohopea. Aperen Probhu Isorakʼ okako hukum teheńiń emapekan onakope luturakʼ khan ar joton salakʼpe manao arpe ganao, enḍekhan jaogepe usulokʼa, ar bape jaṅga latar ocokʼa. 14Teheń okako hukumiń emapekan, onako modre jãhãṭakʼ khon etom se końe secʼ senkate eṭakʼ Isorko secʼ alope ghańjeṛokʼa ar alope sewawakoa.

Bebakʼtao reakʼ sarap

(Levitikus 26.14-46)

15“Menkhan aperen Probhu Isorakʼ katha bape ańjomtae ar teheńakʼ noako hukum ar niạmko joton salakʼ bape manao ar ganao, enḍekhan noako sarap do ape cetanrege paṛaokʼa ar ape sãorege tahena;

16“Apeakʼ tahen ṭhạ̃i ar khet-baṛgeko hõ ape sãote sarapakʼ hoyokʼa.

17“Apeakʼ phosol reakʼ khạclạkʼ ar holoṅ reakʼ ḍạlicʼ hõ sarapanakʼ hoyokʼtapea.

18“Ape hõ Sarapankope hoyokʼte apeakʼ gharońjre hopon ar hoponerako hõko komaokʼa, khetre phosol hõ komaokʼa, mĩhũ-meromko ar bhiḍiko hõ komgeko hoponokʼtapea.

19“Ar din hilokʼ reakʼ jionre sarapankope hoyokʼa.

20“Bạṛicʼakʼko kạmi iạte Probhu Isor do apeakʼ sanam kạmireye sarap apea, uni do ḍamaḍol ar nisṛạuge apereye kola, ar onatepe heṛ idikʼa ar thoṛa okte khangepe marao utạrokʼa. 21Okaṭakʼ disạmpe dokhol lạgidokʼkan Probhu Isor do onḍe nonkae hoeocoya jemon ape talare mahamạriko paṛaokʼte sesre disạm khonpe caba utạrokʼa. 22Probhu Isor do raj rogte, ruạkote, jaljalaokʼ ruạte, ṭan paṅgla ruạte, dakʼ ṭan ar phosol copakʼ ar jhãorãkʼ rogkoteye ńẽtʼpea; ar ạuripe marao cabakʼ hạbicʼe khudạu baṛapea. 23Amakʼ bohokʼ cetan reakʼ serma do tamba leka ar latar ot do mẽṛhẽtʼ leka keṭecʼ hoyokʼa. 24Probhugeye nonkaea jemon apeakʼ disạmre dakʼ bodolte serma khon dhuṛi ar gitilge ńurokʼa. Ar ạuripe caba utạrokʼ hạbicʼ ape cetanre onako ńurokʼa.

25“Probhu Isorgeye nonkaea jemon ape do aperen bạiriko samaṅrepe bhagao ocokʼ. Ape do mitʼ horte jhãpe ema menkhan onko do eae horteko dạṛ pạnḍuja. Dhạrtiren eṭakʼ sanam rajosṭiren hoṛ do apeakʼ halot ńelte botorteko keklesedokʼa. 26Apeakʼ mạ̃ṛĩ do coṭren cẽṛẽko ar otren janwarkoakʼ jomakʼge hoyokʼa, onko laga ńirko lạgitʼ do celege bako tahena. 27Probhu Isor do Misor disạm reakʼ ojo, ganḍ, dạd ar khasrakoteye ńẽtʼpea ar onako khon celege bako boge daṛeapea. 28Uni do koṅka-kuṅki, kãṛã ar andmandteye ńẽtʼpete ạḍiye kosṭo ocopea. 29Kãṛã hoṛ ńutre cetʼ lekae ṭạmḍạu baṛae onkage ape hõ sińrepe ṭạmḍạu baṛaea; ar jãhãnakʼ kạmirege bape jo-bahakʼa. Ape do jaoge santao arpe luṭ ocokʼa; ar ona khon bańcaope lạgitʼ celege bako tahena.

30“Okoeṭakʼ maejiu sãote baplakʼ lạgitʼem ṭhik dohoy uni tulucʼ do eṭakʼ herel hoṛe giticʼmidokʼa. Oṛakʼpe benao joṅgea menkhan onare bape tahẽ daṛeakʼa. Darkha bagwankope benaogea menkhan ona reakʼ jo do bape jom daṛeakʼa. 31Apeakʼ mẽtʼãhã samaṅrege aperen ḍaṅgrako gurkotapea, menkhan onkoakʼ mitʼ kuṭrạ jel hõ bape jom daṛeakʼa. Aperen gadhako do jor-julumkateko idikoa, menkhan onko do ar bako em ruạṛkakoa. Aperen bhiḍiko do aperen bạirikoakʼ tireko paṛaokʼa; ar noa muhin khon bańcaope lạgitʼ do celege bako tahena. 32Aperen hopon ar hoponerako do eṭakʼ jạtren hoṛ ṭhenko soprotkoa. Onko lạgitʼ koyokʼ hor iạte apeakʼ mẽtʼ do kãṛãkʼtapea, menkhan jãhãnakʼ cekae reakʼ cetʼ daṛege baṅ tahentapea. 33Bin oprom jạtren hoṛko do apeakʼ jumi reakʼ phosol ar apeakʼ khaṭaoakʼ reakʼ kuṛạiko joma ar ape do jiwetʼ jonompe santao ocokʼa. 34Ar apeakʼ mẽtʼ okae ńel onatepe koṅka cabakʼa. 35Probhu Isorge apeakʼ gunṭhikore, jaṅgakore ar jaṅga reakʼ talka khon bohokʼ hạbicʼ bis-phoṛakoteye ńẽtʼpea ar ona do tisge baṅ bogekʼtapea. Ona bis-phoṛa do jaṅga talka khon bohokʼ hạbicʼ sanam jaegarege hoyokʼa.

36“Ar okoeṭakʼ rajpe bahale Probhu Isor do uni ar ape bondikate idipe lạgitʼ nonkan mitʼ jạtrenko ṭhene jimạpea okoe do bape oromakatʼko ar aperen hapṛamko hõ bako baḍae akatʼko. Onḍe ape do kaṭ ar dhiriren deb-murtikope sewawakoa. 37Probhu Isor okoe jạtrenko talareye chirchạturpe onko do apeakʼ ona ńelte botorteko keklesedokʼa, ar ape do landa-dhutʼ ar cigạri baragpe hoyokʼa.

38“Ape do ḍherpe er rehõ komgepe ira, ente pohoko do apeakʼ phosolko jomtapea. 39Ape do darkha bagwankope benao joṅa arpe joton haraea menkhan tejoko do darkha joko jom cabaetapete bape samṭao daṛeakʼa se ona reakʼ rasa hõ bape ńũ ńama. 40Apeakʼ goṭa disạmrege jạitun dare do tahengea menkhan ona reakʼ jo do jhurokʼte sunum do bape ojokʼ ńama. 41Okoeko hopon ar hoponerako hoyokʼtape onko hõ ape ṭhen bako tahena, ente onko do bondikateko idiocokʼa. 42Pohoko do hecʼkate apeakʼ disạm reakʼ dare-nạ̃ṛĩko ar phosolko jom siṭhạ utạra.

43“Ape talare girobasokʼan eṭakʼ jạtren hoṛ do ape khonko usulokʼa ar ape dope copotʼ ocokʼa. 44Onkoge rinko emapea menkhan ape ṭhen khon do bako hataoa. Ar ape cetanreko tahena ar ape dope jaṅga latar ocokʼa.

45“Noako sarap do ape cetanrege paṛaokʼa. Ape do aperen Isor Probhu Isorakʼ bape bataoetʼtae iạte ar uni okako hukum ar niạme emakawatʼpe ona bape senakʼkante noako sarap doe khudạu baṛapea are sapʼ tiyokʼpea ar sesre ape dope marao utạrokʼa. 46Noako sarap do hahaṛa cinhạ ar hahaṛa kạmi lekate ape ar aperen bõsrenko cetanre jaejug hạbicʼ tahena. 47-48Sanamakʼ sareṛakʼko tahẽkan jokhecʼ rạskạ salakʼ aperen Probhu Isor bape sewawade tahẽkante ape do tetaṅ ar ạḍi ṭonṭa talate aperen bạirikope sapʼsorakoa ente Probhu Isorge ape upạrte onkoe kolkoa. Uni do mẽṛhẽtʼ reakʼ arãṛ tarenreye gokʼapea ape ạuripe marao utạrokʼ hạbicʼ.

49“Probhu Isor do sạṅgiń khon, dhạrti reakʼ ses simạna khon nonkan mitʼ jạtrenko ape upạrteye ạgukoa one onkoakʼ pạrsi bape bujhạutako. Onko jạtrenko do pajhaṛ cẽṛẽ leka ape cetanre sã menteye uḍạu ạgukoa. 50Onko do botor mẽtʼãhãwan hoṛko hoyokʼa. Ar murubbiko hõ bako manotkoa ar koṛa hoṛ hõ bako mãyãwakoa. 51Onko do aperen mĩhũ-meromko ar khet reakʼ phosolko jom cabaetapea ar sesrepe marao utạrokʼa. Ape lạgitʼ jãhãn phosol, nãwã darkha rasa, sunum se gại ḍaṅgra se bhiḍi meromkoren hopon hõ bako sarecʼkoa, ar ape do sesrepe marao utạrokʼa. 52Onko do apeakʼ ato ar nagrahako gherao ạcurtapea, ar sesre oka usul ar keṭecʼ pạcri bhitko cetanrepe bhorsakʼkan ona hõ lạnduṛokʼtapea. Ar aperen Probhu Isor okaṭakʼ disạme emape lạgidokʼkan ona disạm reakʼ mitʼke mitʼ ato ar nagrahako gherao ạcurtapea.

53“Arko gherao ạcurakatʼpe oktere bạiriko nonka kosṭoreko paṛao ocopea, unre ape do aperen hoponkope jomkoa, metakʼme aperen Probhu Isore emakawatʼpe aperen hopon ar hoponerakoakʼ jelpe joma. 54Unre ape talare okoe dulạṛteye hara akana are sukhi hoṛkan, uniyakʼ ontorre hõ boeha se acʼren dulạṛiạ bạhutae se acʼren hopon ar hoponerakore mãyã baṅ hecʼaea metakʼme jãhãn jomakʼ hõ bae em hạṭińakoa. 55Uni do acʼren hoponkoakʼ jele joma ar thoṛa hõ bae emokʼa, ente bạiriko tinre apeakʼ ato se nagraha gheraokate kosṭoreko paṛao ocopea unre noa chaḍa ar uni ṭhen do cetʼ jomakʼge baṅ tahena. 56-57#2 Raj 6.28,29; Rakʼ 4.10 Unre ape modre okoeṭakʼ maejiu do dulạṛteye hara akan are sukhi hoṛkan uni hõ acʼren dulạṛiạ jãwãetetʼ se hopon ar hoponerako cetanre jãhãnakʼ cetʼ mãyãge baṅ tahentaea. Hopon se hoponera janame tayom uni hopon se hoponera ar ona tayom hoṛmo khon oḍok akantae baha, okaṭakʼge onko do bae jom ocokoa. Ente aperen bạiriko tinre apeko gherao esetʼkapea ar kosṭoreko paṛao ocopea unre uni do apnarge acʼakʼ ona hoṛmo khon oḍokʼ akan baha ar hopon do hape hapeteye jomea. 58“Noa puthire olakan ạn-ạriko joton salakʼpe senakʼte ona lekape colon, metakʼme ‘aperen Probhu Isorakʼ ṭhonokte perecʼ ar botoranakʼ ńutum bape manot, 59enḍekhan Probhu Isor do ape ar apeakʼ bõsko cetanre nonkan hahaṛa ar kuṭhin dukko ar ḍher din tahen ruạkoe paṛao ocoya. 60Misor disạmre okako rog bighin ńelte botor caṛhaoatʼpe tahẽkan, onkan rogkoge ape cetanreye paṛao ocoya ar onako khon do bape sahaṛ daṛeakʼa. 61Ona chaḍa Probhu Isor do nonkan rog bighin ar dukreye paṛao ocopea one ona reakʼ katha do ạn-ạri puthire baṅ olakan, ar sesrepe marao utạrokʼa. 62Aperen hoṛ do sermaren ipil lekako saṅgelenre hõ aperen Probhu Isorakʼpe bebataoetʼtae iạte thoṛa hoṛge unre jiwetʼpe tahena. 63Ar okaṭakʼ rạskạte Probhu Isore bhạlại akatʼpe ar aperen hoṛkoakʼ lekhae saṅge ocoakatʼtape ona reakʼ rạskạtege uni doe marao caba utạrpea. Ar okaṭakʼ disạmpe dokhol lạgidokʼkan ona disạm khon rehetʼ sudhạpe totʼ giḍi ocokʼa.

64“Ona tayom Probhu Isor do dhạrti reakʼ mitʼ simạna khon eṭakʼ simạna hạbicʼ sanam jạtrenko talareye chirchạturpea. Onḍe do ape ar aperen hapṛamkoren kaṭ ar dhiriren bin oprom murhutʼkope sewawakoa. 65Onko jạtrenko talare suluk do bape ńama, ar jirạukʼ lạgitʼ apnarakʼ jãhãn ṭhạ̃ige baṅ tahentapea. Onḍe Probhu Isor do dhak dhakaokʼkan mon ar loraokʼkan jiwi ar as akan koyokʼ horakatʼ mẽtʼe emapea, ar apeakʼ ontor do be asteye perecʼ ocoytapea. 66Apeakʼ jiwi do aka akan baragge tahena ar siń ńindạ botortepe luyutʼ luyudokʼa. 67Ar setakʼ jokhecʼ dope mena, ‘ạyubokʼ ma,’ ar ńindạ jokhecʼ dope mena, ‘setagokʼ ma,’ ente botorte apeakʼ mon do luyutʼ luyudokʼtapea ar mẽtʼ do aema lekanakʼkoe ńel ocopea. 68Misorte calakʼ reaṅ iń metatʼpe tahẽkana, tishõ ona horte do taṛam baṅ lagao apea; menkhan Probhu Isor do unre jahajte Misor disạmteye kol ruạṛpea. Onḍe do guti ar kạ̃ṛmĩ lekate bạiriko ṭhen kiriń ocokʼpe khoja menkhan celege bako kirińpea.

Currently Selected:

Dosar Biboron 28: SBT

Highlight

Compare

Copy