2 Rapajko 2
2
Eliạ do sermateye rakapʼ ocoyen
1Probhu Isor do tinre mitʼṭecʼ hoe bharḍo talate sermate Eliạ rakapʼ idiye menetʼ tahẽkana unre Eliạ ar Elisae do Gilgol khonkin oḍok hecʼena. 2Eliạ do Elisaye metadea, “Am do nonḍege tahẽ hataṛokʼme; Probhu Isor do Bethelte calakʼe menakawạdińa.”
Elisae doe menkeda, “Jiwetʼ Probhu Isor ńutumte ar amakʼ jiwi ńutumteń kiriạkʼ kana am do bạń bạgiwama.” Onate unkin do Bethelte kin senena.
3Bethelren cela-nạbiko do Elisae ṭhen senkateko menkeda, “Am do cetʼ bam baḍaea, Probhu Isor do teheń amren mạlik am ṭhen khone idiyea mente?”
Elisaye roṛ ruạṛkeda, “Hẽ, baḍaegeạń. Ape do niạ babotre ar jãhãnakʼ cetʼge alope roṛa.”
4Inạ tayom Eliạ do uniye metadea, “Elisae, am do nonḍe tahẽ hataṛokʼme; Probhu Isor do Jerikhote calakʼe mitạńkana.”
Elisaye menkeda, “Jiwetʼ Probhu Isor ńutumte ar amre kiriạkateń meneda, iń do bạń bạgiwama.” Onate unkin do Jerikho tekin calaoena.
5Jerikhoren cela-nạbiko do Elisae ṭhen senkateko menkeda, “Am do cetʼ bam baḍaea, Probhu Isor do teheń amren mạlik do am ṭhen khone idiyea mente?”
Elisae roṛ ruạṛkeda, “Hẽ, baḍaegeạń. Ar niạ babotre ape do ar jãhãnakʼ cetʼge alope roṛa.”
6Inạ tayom Eliạ do uniye metadea, “Am do nonḍege tahẽ hataṛokʼme; Probhu Isor do jordan gaḍa hanasa parom calakʼe mitạńkana.”
Uniye roṛ ruạṛkeda, “Jiwetʼ Probhu Isor ńutumte ar amakʼ jiwi ńutumteń kiriạkʼ kana, iń do bạń bạgiwama.” Onate unkin do calakʼtege kin tahẽyena.
7Eliạ ar Elisae do jordan gaḍa aṛere senkate kin teṅgoyen khan unkin khon thoṛa sạṅgiń ńokʼre mõṛẽgel cela-nạbiko hõ hecʼkateko teṅgoyena. 8Eliạ do acʼakʼ hoṛmo reakʼ oyonakʼe lạṭumkeda ar onate jordan gaḍa dakʼe dalkeda. Onate dakʼ do bar hạṭińena ar unkin do rukhạṛge kin paromena.
9 #
Bib 21.17
Arkin parom calaoen khan Eliạ do Elisaye metadea, “Lạiyạń me, am ṭhen khon ạuriń rakapʼ ocokʼre iń do am lạgitʼ cetʼ iń cekaea?”
Elisaye roṛ ruạṛkeda, “Amakʼ jiu reakʼ dobṛa baṛe ińre paṛaokʼma.”
10Eliại menkeda, “Am do mitʼṭecʼ muskilakʼgem koe akadińạ. Enhõ am ṭhen khoniń idi ocokʼre ińem ńel ńameń khan am do onam ńama; ar bam ńel ńameń khan do bam ńama.”
11Unkin do galmarao tulucʼ kin calakʼkan tahẽkanre ackage mitʼṭen seṅgel reakʼ rãt gạḍi ar seṅgelren sadomko hecʼkate unkinko begarketʼ kinạ ar Eliạ do mitʼṭecʼ hoe bharḍo talate sermateye rakapʼ ocoyena. 12#2 Raj 13.14 Elisae do ona ńelte ãṭ aṛaṅteye menkeda, “E ińren ạpuń, E ińren ạpuń, ńelme, Israelakʼ rãt gạḍi ar aswariko.” Inạ tayom Elisae do ar bae ńel ńamledea. Unre uni do acʼakʼ kicricʼe or cirạketʼtaea.
13Ona tayom Eliạwakʼ hoṛmo khon ńurakʼ oyonakʼe halaṅketʼte jordan gaḍa aṛereye teṅgoyena. 14Ar ona oyonakʼte uni do dakʼe dalketʼteye menkeda, “Eliạren Probhu Isor ńitokʼ do okare menama?” Are dalketʼ khan dakʼ do bar hạṭińena, ar rukhạṛgeye paromena.
15Jerikhoren okoe nạbiko onḍeko teṅgo akan tahẽkan onko do Elisae hijukʼko ńelkede khanko menkeda, “Eliạren jiu do Elisae cetanreye thamgạḍi akana.” Onko do Elisae sãote ńapamokʼ lạgitʼko senena ar otre ombakʼkate ḍobokʼ adeteko metadea, 16“Ale do amren mõṛẽgel daṛean gutiko nonḍe menakʼlea; ale do senkate amren mạlik le sendra ạguiyea. Hoedaṛeakʼa Probhu Isorren Jiu do uni rakapʼ idikate jãhãn buru se jãhãn soḍokʼreye doho oṭoakadea.”
Elisae doe menkeda, “Baṅ, alope calakʼa.”
17Menkhan onkoko jormoṭkede khan lajaoenteye metatʼkoa, “Ṭhikgea, Do calakʼpe.” Unre onko mõṛẽgel hoṛko do Eliạ sendraye lạgitʼko calaoena. Ar pe din hạbicʼko sendrakedea ar bako ńamledea. 18Unre Elisae do Jerikhoreye tahẽkana. Onko do Elisae ṭhenko ruạṛ hecʼen khan onkoe metatʼkoa, “Iń do cetʼ bạń manaletʼ pea?”
Elisawakʼ hahaṛa kạmi
19Mitʼdin ona nagraharen hoṛko do Elisaeko metadea, “E aleren mạlik, am mam ńeletʼkange niạ nagraha do sạrige napaegea, menkhan noa reakʼ dakʼ do baṅ bhagea ar ot iạte maejiukoakʼ hoṛmoren gidrạ hõko nosṭokʼ kana.”
20Elisae menkeda, “Iń ṭhen mitʼṭecʼ nãwã cukạkʼ ạgukate onare thoṛa buluṅ dohoype.” Unre onko do uni ṭhen onako ạgukeda.
21Elisae do unre dakʼ reakʼ jharna ṭhen senkate onare buluṅe chiṭiạuatʼteye menkeda, “Probhu Isore meneda, ‘iń do noa dakʼ iń bogekeda. Noa dakʼ do ar tisge baṅ gujukʼa ar gidrạko hõ bako nosṭokʼa.’ ” 22Elisaeakʼ katha leka teheń hạbicʼ ona dakʼ do mońjge menakʼa.
Elisaeko landa dhutʼaekan reakʼ kuṛại
23Elisae do onḍe khon Bethelteye senena. Ar horte calakʼ jokhecʼ ạḍi utạr huḍiń koṛako do nagraha khonko oḍokʼ hecʼente uni siṛogadeteko metadea, “E ceḍe, ceḍe bohokʼ, ma rakapʼ calakʼme.” 24Elisae do onko secʼ ạcurenteye beṅgetʼatʼkoa ar Probhu Isor ńutumteye sarapatʼkoa. Unre bir khon barea banakin oḍok hecʼente onko modren pongel bar goṭen koṛa kin khanḍa khunḍiketʼkoa. 25Inạ tayom uni do karmel buruteye senena ar onḍe khon Samariạreye ruạṛ senena.
Currently Selected:
2 Rapajko 2: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
