2 Bõsbudạ 33
33
Jihudạren Manase raj
(2 Rapajko 21.1-9)
1Manase do gelbar bochor umerre raje hoylena ar Jerusalemre mõṛẽgel mõṛẽ bochor raje calaokeda. 2#Jir 15.4 Probhu Isor do Israelko samaṅ khon okoe jạtrenkoe laga ńirletʼko tahẽkan onko leka hirkhạwakʼko kạmikate Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana. 3Uniren apat Hiskiạ do okako than boṭkocʼkoe marao giḍiletʼ onako uni do arhõe jut arokeda. Ona chaḍa uni do Bakʼal debota ńutumte pinḍko ar mitʼṭecʼ Asera khunṭiye benaokeda. Uni do sermaren ipilkoe sewawako kan tahẽkana are ḍobokʼako kan tahẽkana. 4#2 Bõs 6.6 Okaṭakʼ oṛakʼ reaṅ Probhu Isore menletʼ, “Iń do jaejug Jerusalemren tahena,” Probhu Isorakʼ ona oṛakʼre uni do pinḍkoe benaokeda. 5Probhu Isorakʼ oṛakʼ reakʼ banar racarege uni do sermaren ipilko ńutumte adomakʼ pinḍkoe benaokeda. 6Ar Bin-Hinom buru lodamre uni do acʼren hoponko seṅgelreye samaṅketʼkoa. Okoe do bạṛicʼakʼ cinhạkote tayom daram reakʼ kathako lại daṛeakʼkan tahẽkan, onko jạdu udukʼko ar gukʼniko ar bhutko hotete ar bạṛicʼ jiuko sãote jopoṛaoko dohoyetʼ tahẽkan onko tulucʼe solhayetʼ tahẽkana. Ar Probhu Isorakʼ mẽtʼre ḍher bạṛicʼakʼ kạmikate uniye bekusi ocoyede tahẽkana.
7 #
1 Raj 9.3-5; 2 Bõs 7.12-18 Uni do okoe murtikoe lakʼ rokʼ ocoketʼko onko do Isorakʼ oṛakʼreye dohokatʼkoa. Niạ oṛakʼ reaṅge Probhu Isor do Dạud ar uniren hopon Solomone metatʼkin tahẽkana, “Niạ oṛakʼ ar Israelren sanam gusṭiko tala khoniń bachao akawan niạ Jerusalemge iń lạgitʼ jaejug tahen oṛakʼ iń benaoa. 8Ar Israelko okako hukumiń em akatʼko, metakʼme Mose hotete okako ạn-ạri ar niạmkoń emakan ona joton salakʼko pańjae enḍekhan okaṭakʼ disạm do aperen hapṛamkoń em akatʼko onḍe khon onko do ar tishõ bạń laga ńirkoa.” 9Manase do Jihudạ ar Jerusalemren hoṛko bạṛicʼ horteye ạyurketʼkoa; ona iạte Probhu Isor do okoe jạtrenko Israel hoponko samaṅ khone marao giḍiletʼko onko khon hõ ḍher bạṛicʼakʼ kạmiko ehopʼena.
Manaseye kastao kan
10Probhu Isor do Manase ar uniren hoṛko ṭhen kathae roṛetʼ tahẽkangea menkhan onko do ona bako luturatʼtaea. 11Onate Probhu Isor do onko upạrte Ạsur rajren subedarkoe ạguketʼkoa. Onko do Manaseko bondikedea ar hoṛmore ạṅkusko lagaoadete pitạl reakʼ sikṛikoteko hạṛi paṭakateko idikedea. 12Ar Manase do muhinreye paṛaoen khan uni do acʼren Probhu Isor ṭhen dayae khojkeda ar acʼren hapṛamkoren Isor samaṅreye nindhạnena. 13Uniyakʼ koejoṅ ańjomte Probhu Isor do daya hecʼadea ar uniyakʼ nehõr joṅakʼe ańjomketʼtaete Jerusalem ar uniyakʼ rajosṭiye ruạṛ ạguketʼtaea. Unre Manase doe bujhạukeda, Probhu kangeae Isor do.
14Tayomte uni do Dạud nagraha bahre reakʼ pạcri do buru lodam reakʼ Gihon dakʼ jharna khon Ophel buru beṛhae pạchim secʼ hako phaṭok duạrte bolokʼ hor hạbicʼ arhõ usul pạcriye benaoketʼte onae kajak ruạṛkeda. Uni do Jihudạ reakʼ pạcrite esetʼ sanam ato ar nagrahakore subedarkoe bahalketʼkoa.
15Uni do Probhu Isorakʼ oṛakʼ khon debotakoakʼ muṭhạnkoe oḍok giḍikatʼkoa. Uni do Jerusalemre ar Probhu Isorakʼ oṛakʼ reakʼ buru cetanre okako pinḍe benao ocoletʼ onako hõe oḍok keda. Ar nagraha bahreteye giḍikada. 16Ona tayom uni do Probhu Isorakʼ pinḍ arhõe jut arokeda ar ona cetanre helmel ar gun makʼnao samaṅokʼakʼe samaṅkeda. Uni do Jihudạren hoṛkoe hukumatʼkoa jemon onko do Israelren Probhu Isorko sewawae. 17Ar hoṛko do unhõ than boṭkocʼkore janwar dãṛẽko samaṅetʼko tahẽkana, menkhan onko do akoren Probhu Isor ńutumtegeko samaṅetʼko tahẽkana.
Manasewakʼ gujukʼ
(2 Rapajko 21.17,18)
18Manaseakʼ eṭakʼ sanam kạmiko reakʼ katha, Isor ṭhen uniyakʼ koejoṅ ar Israelren Probhu Isor ńutumte ńeńelko okako kathako metade tahẽkana ona jotowakʼ do “Israelren rapajkoakʼ Itihãs” ńutumanakʼ puthire ol menakʼa. 19Uniyakʼ koejoṅ reakʼ katha, ar uniyakʼ nehõr joṅte Isorakʼ daya reakʼ katha, uniyakʼ sanam kại ar bepạtiạr reakʼ katha, Isor samaṅre ạuri nindhạnokʼre than boṭkocʼkoe benao ocoletʼ ar Asera muṭhạn ar lakʼ rokʼ akatʼko murtiko reakʼ joto katha do ńeńelkoakʼ puthire olakana. 20Tayomte Manase do acʼren hapṛamko ṭhene senena ar raj oṛakʼrege uni doko topakadea. Ar uniyakʼ jaegare do uniren hopon Amon do raje hoyena.
Jihudạren Amon raj
(2 Rapajko 21.19-26)
21Amon do bargel bar bochor umerre raje hoylena ar Jerusalemre bar bochor raje calaoketʼa. 22Uni do acʼren apat Manase lekage Probhu Isorakʼ mẽtʼre oka bạṛicʼakʼkan onageye kạmiyetʼ tahẽkana. Ar Manase okoe murhutʼkoe rokʼ benaoletʼko Amon do onkogeye sewawako kan tahẽkana ar janwarko hõe dãṛẽyetʼko tahẽkana. 23Menkhan uniren apat Manase leka Probhu Isor ṭhen do bae nindhạnlena; uni do kạkạitegeye tahẽyena.
24Amonren kạmiyạko do uni upạrteko soṛojontroketʼte raj oṛakʼrege uniko khũnkedea. 25Menkhan Amon raj upạrteko soṛojontroletʼ disạmren hoṛko do onko jotoko gocʼketʼkoa ar uniren hopon Josiạ do uniyakʼ jaegareko rajkedea.
Currently Selected:
2 Bõsbudạ 33: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
