1 Samuel 8
8
Israelko do rajko khojkana
1Samuel doe haṛamen khan Israelkoakʼ bikʼcạrtako lạgitʼ acʼren hopone ojokʼ bahalketʼkinạ. 2Uniren maraṅicʼ hoponakʼ ńutum do Joel ar dosaricʼ hoponakʼ ńutum do Obiyạ tahẽkana. Ar unkin do Ber-sebare kin bicạretʼ tahẽkana, 3Menkhan unkin do ạkinren apattetʼ leka do bạkin calakʼkan tahẽkana. Unkin do behok secʼte dhon hameṭjoṅ reakʼ aste dhorom reakʼ horkin bạgiyatʼ tahẽkana. Unkin do ghus hataokate hok reakʼakʼ kin behok ocoyetʼ tahẽkana ar behok do hok reakʼ lekakin hoyocoyetʼ tahẽkana.
4-5 #
Bib 17.14
Ona iạte Israelkoren murubbiko doko mitʼena ar Ramare senkate Samuelko lạiyadea, “Ńelme, am dom haṛamena ar amren hoponkin do amakʼ horte bạkin taṛameda, onate eṭakʼ jạtrenko leka abo bicạrbon lạgitʼ mitʼṭen raj baṛe teṅgoaleme.”
6“Ar ale calaole lạgitʼ mitʼṭen raj ojokʼ bahalem,” Menkhan Samuel do hoṛkoakʼ niạ katha do bhage bae metatʼa. Ona iạte uni do Probhu Isor ṭhen koejoṅe ehopʼena. 7Unre Probhu Isor do uniye metadea, “Hoṛ okako metamkan onage onkaeme. Ente am do bako nihạ̃t giḍi akatʼmea, menkhan onko do ińgeko nihạ̃t giḍi akadińạ jemon onko cetanre aloń rajokʼ. 8Misor disạm khon onko oḍok ạguko tayom khon teheń hạbicʼ ińre okako kạmi akatʼ onko do am cetanre hõ onkageko kạmi akada; ar iń bạgikate debotako sewawako kana. 9Ńitokʼ do onkoakʼ katha manao takome; menkhan onkom sontorkoa arem galmarao akoa, onko cetanre okoeye rajokʼa uni do onko cetanre cetʼ lekae colona mente.”
10Ar okoeko raj reakʼko khojletʼ Samuel do Probhu Isorakʼ sanam katha onkoe baḍae ocoketʼkoa. 11Uniye menkeda, “Okoe do raj lekate ape cetanreye rajokʼ uniyakʼ beohar do nonka hoyokʼtaea; uni do aperen hoponko lạṛhại phạdko lekate kạmireye lagaokoa; onko modren adomko do rãt gạḍi cakʼlaokoko hoyokʼa, ar adomko do aswariko hoyokʼa ar adomko do rãt gạḍi laha lahateko dạṛ idiya. 12Uni do acʼ lạgitʼ adom do hajarko cetanre, adomko do mõṛẽgelko cetanre senaputiye dohokoa. Ar eṭakʼko do acʼakʼ jumi cas ar phosol samṭao kạmire ar lạṛhại reakʼ khanḍa bhanḍa ar rãt gạḍiko reakʼ soroṅjamko benao lạgitʼe lagaokoa. 13Aperen hoponerako do mahkaokʼ sunum, isin basaṅ ar piṭhạ rapakʼ kạmireye lagaokoa. 14Uni do apeakʼ joto khon bhage jumi, darkha rasa ar jạitun bagwanko hataokate acʼren kạmiyạkoe emakoa. 15Apeakʼ anaj ar darkha rasa reakʼ mitʼ hĩs hataokate uni do acʼren rajren kạmiyạko ar eṭakʼ kạmiyạkoe emakoa. 16Uni do aperen guti kạ̃ṛmĩ ar aperen bhage juạnko ar gadhako hataokate acʼakʼ kạmireye lagaokoa. 17Aperen bhiḍi palkoren gel hạtiń reakʼ mitʼ hạṭiń uni doe hataoa ar ape do uniren golampe hoyokʼa. 18Enhilokʼ ape do unipe khojakade raj iạtepe raga, ar Probhu Isorpe hohowaere hõ uni do bae luturatapea.”
19Menkhan hoṛko do Samuelakʼ niạ katha bako moneyatʼtaea. Onkoko menkeda, “Baṅa, ale do mitʼṭen rajgele khojkana. 20Enḍekhan ale do eṭakʼ sanam jạtrenko lekale hoedaṛeakʼa. Aleren raj do aleye bicạrkatalea ar ale laha khone lạṛhạiya.”
21Ar Samuel do hoṛkoakʼ sanam kathako ańjomkate Probhu Isor ṭhene lạikeda. 22Onate Probhu Isor do Samuele metadea, “Am do onkoakʼ katha ańjomme ar onko do mitʼṭen raj teṅgoakome.”
Unre Samuel do Israelkoe metatʼkoa, “Do, ape do apan ạpin oṛakʼte ruạṛ calakʼpe.”
Currently Selected:
1 Samuel 8: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
