1 Samuel 16
16
Sạmuel do Dạude ojokʼ bahalkede
1Probhu Isor do Sạmuele metadea, “Sạul do Israelkoren raj mente doń nihạ̃t giḍiakadea, onate am do ar tinạkʼ din uni lạgitʼem dukokʼa? Am do ńitokʼ dereńre sunum hataokate oḍokokʼme. Ente iń do Bethlehem atoren Jisại ṭheniń kolmea. Uniren hoponko mod khon iń ńutumte mitʼṭen raj hoyokʼ lạgitʼ iń bachao dohoakadea.”
2Sạmuele menkeda, “Cekate iń doń calakʼa? Sạul niạ kathae ańjom lekhan uni do khạṭigeye gocʼ giḍikạńạ.”
Probhu Isore menkeda, “Am do mitʼṭen phẽṭaṛ mĩhũm iditorayea arem mena, Probhu isor ńutumte samaṅokʼ lạgitʼem hecʼakana. 3Ar ona samaṅokʼakʼem samaṅ jokhecʼ Jisạiyem neotaea. Ona tayom cetʼ cekae hoyokʼtama onań lạiyama. Ar okoeyakʼ kathań lạiyam unige iń ńutumtem ojokʼ bahalea.”
4Sạmuel do Probhu Isorakʼ katha lekageye kạmikeda. Ar tinre Bethlehemteye seṭerena unre atoren murubbiko do botorte thar tharaokʼ tulucʼ uni sãote ńapamokʼko oḍok hecʼena. Onko doko kulikedea, “Am do cetʼ suluk montegem hecʼakana?”
5Sạmuele roṛ ruạṛkeda, “Hẽ, iń do suluk montegeń hecʼakana. Iń do Probhu Isor ńutumte janwar samaṅokʼakʼ lạgitʼgeń hecʼakana. Ape do sonotokʼpe iń sãote niạ samaṅokʼakʼre seledokʼpe.” Niạ menkate uni do Jisại ar uniren hoponkoe sonot ocoketʼkoa ar ona samaṅokʼakʼre seledokʼ lạgitʼe neotaketʼkoa. 6Onkoko hecʼen khan Sạmuel do Eliabe ńelkede khan mon monteye menkeda khạṭige Probhu Isorren ojokʼicʼ hoṛ do acʼ samaṅreye teṅgo akana.
7Menkhan Probhu Isor do Sạmuele metadea, “Uniyakʼ rup se tinạkʼe usula ona do alom ńela, ente uni doń nihạ̃t akadea. Manwa okaṭakʼe ńel onate do jãhãnakʼ do baṅ cekakʼa, ente manwa do bahre rupko ńela menkhan Probhu Isor do ontorgeye ńeleda.”
8Ona tayom Jisại do Abinadabe hohoadete Samuel samaṅteye taṛam ocokedea. Sạmuele menkeda, “Probhu Isor do nui hõ bae bachao akadea.” 9Ona tayom Jisại do Samae uni samaṅreye taṛam ocokedea; menkhan Samuele menkeda, “Probhu Isor do nui hõ bae bachao akawana.” 10Nonkate Jisại do acʼren eae goṭen hoponko Sạmuel samaṅteye taṛam ocoketʼkoa, menkhan Sạmuel do Jisạiye metadea, “Probhu Isor do noko modren okoe hõ bae bachao akawana.” 11Ona tayom uni do Jisạiye kulikedea, “Noko chaḍa cetʼ ar koṛa do bạnukʼkotama?”
Jisạiye menkeda, “Jotoko khon huḍińicʼ sarecʼ menaea; uni do bhiḍikoe gupikana.”
Sạmuele menkeda, “Hoṛ kolkate nonḍe hoho ạguiyem. Ar ạuriye hijukʼ hạbicʼ jojom do babon duṛupʼa.”
12Onate Jisại do hoṛ kolkate acʼren huḍiń utạricʼ hopone hoho ạgukedea. Uni do juruṅ juruṅ arakʼgeye tahẽkana ar ńelokʼte hõ mońj ar mẽtʼkin hõ ạḍi napae tahẽkantaea. Unre Probhu Isor doe menkeda, “Nui kangeae uni do, am do unige ojokʼ bahalem.”
13Unre Sạmuel do dereń reakʼ sunumante uniren boehako talareye ojokʼkedea. Ar enhilokʼ khon Probhu Isorren Jiu do Dạud cetanreye hecʼena. Inạ tayom Sạmuel do Ramoteye ruạṛ senena.
Sạulakʼ kạmire Dạud
14Unre Probhu Isorren Jiu do Sạule bạgiyadea ar Probhu Isor ṭhen khon mitʼṭen bạṛicʼ jiu hecʼkate maraṅ botor udukʼaye ehopʼena. 15Ona ńelte Sạulren kạmiyạko do uniko metadea, “Isor ṭhen khon mitʼṭen bạṛicʼ jiu hecʼkate am do maraṅ botore udukʼam kana. 16E aleren mạlik, am samaṅre jarwa akan noko golamko hukum akome jemon senkate nonkan mitʼṭen hoṛko sendra ạguiye okoe do bhage peṛesaṅe banam daṛeakʼ. Ar tinre uni bạṛicʼ jiu do Isor ṭhen khone hijukʼa unre uni do peṛesaṅe banama ar onate mońjem ạikạua.”
17Onate Sạul do acʼren kạmiyạkoe metatʼkoa, “Enḍekhan nonkan mitʼṭen hoṛ sendra ńamepe okoe do bhage peṛesaṅe banam daṛeakʼ ar iń ṭhenpe ạguiyea.”
18Uniren kạmiyạko modre mitʼ hoṛe menkeda, “Iń do Bethlehemre Jisạiren mitʼṭen hoponiń ńelakadea. Uni do ạḍi bhage peṛesaṅe banam daṛeakʼa. Uni do mitʼṭen dilan bir hõ kanae. Ar ạḍi napae kathae roṛa ar ńelokʼte hõe napaegea, ar Probhu Isor do uni sãote menaea.”
19Niạ katha ańjomkate Sạul do Jisại ṭhen hoṛ kolkateye roṛgotʼkada jemon uni do acʼren koṛa Dạud acʼ ṭhene kolkae. 20Unre Jisại do jauḍicʼ piṭhạ, harta reakʼ thulire darkha rasa ar mitʼṭen merom hopon noako mitʼṭen gadhareye ladekeda ar acʼren koṛa Dạud do Sạul ṭhene kolkadea.
21Dạud do Sạul ṭhene hecʼen khan acʼakʼ kạmireye dohokedea. Ar Sạul do uni ạḍitetʼe dulạṛede tahẽkana ar Sạulren khanḍa bhanḍa asenicʼe hoyena. 22Unre Sạul do Jisại ṭhen kathae kolgotʼkada, “Dạud do ińakʼ kạmirege dhurạu akae tahẽocoaeme, ente uni do ạḍiń kusi akawadea.”
23Isor ṭhen khon tinre uni bạṛicʼ jiu do Sạul cetanreye hijukʼkan tahẽkana unre Dạud do acʼakʼ peṛesaṅe banametʼ tahẽkana. Nonkate Sạul do ạḍi mońje ạikạuetʼ tahẽkana ar suluke ńametʼ tahẽkana, ar uni bạṛicʼ jiu hõ uni khone ocokʼ calakʼkan tahẽkana.
Currently Selected:
1 Samuel 16: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
